今晚,幫媽手的時候,從雜亂的報紙中,找到一份十一月三日太陽報,一整版世榮的訪問,內容如下:

葉世榮的愛妻許韻珊(Cynthia)十月一日在寓所暴斃,令世榮失去相處六年的至愛,傷心欲絕.世榮雖然表示這是一個永遠不能復原的傷口,但他未有變得頹喪,更學懂珍惜身邊的每事每物,積極面對人生.

內文:

To My Love Cynthia,

記得和你開始於一九九六年的秋天,當時我跟一大班好友到蘭桂坊玩,當時剛巧遇見你,發覺你為人活潑,又懂得講笑,隨即引起我對你的注意.玩過幾次之後,便對你產生好感,然後我就展開追求.你還記得嗎?我們度過第一個情人節的時候,我送上九十九支玫瑰花給你,逗得你非常高興.這些浪漫情景,仍然歷歷在目.

Cynthia,你對我實在無微不至,無論做咩,你都會萬二分支持我.記得最感動的一次,就係當你聽完我首新歌<<藍天>>時,你突然喊出黎,你仲話好喜歡呢首歌,最難得就係我可以由一個鼓手轉變為一個創作歌手.其實,呢個轉變亦改變我性格,我本身係一個比較內向的人,自從獨立發展之後,久而久之,我就變得健談開朗,呢一切一切都係全靠有你支持.

經過一段時間之後,我倆一直生活得非常開心,並開始我倆的同居生活,曾經一起為搬屋而到處逛傢俬舖,感覺溫馨.之後,我們又養了一隻狗'小汶',每天一起過簡單的生活,十足十一家人.我一早己視你為我的終身對象,並打算明年結婚,所以你發生事當時,我雖然好驚,更一度成為嫌疑犯,但係唔緊要,亦冇得避免,因為當時除了你之外,就得我同隻狗在家中;而且我仲選擇你出殯當日朝早,為你戴上結婚戒指,雖然有傳媒報導我倆是冥婚,但係唔緊要,我覺得呢樣野係我對你愛既表現,你係絕對有資格做我老婆.

Cynthia,你知唔知我依家最辛苦的就係返到屋企對住四幅墻,一返到屋企就會諗番起好多同你一齊的開心片段,我覺得呢個傷口係永遠都復原唔到,但我會積極面對,周圍去好多唔同既地方,努力去克服呢個未好的傷口,繼續積極面對人生.

最後,我想講的是我發覺家駒的離開,令我學懂點樣獨立成長;而Cynthia你的離開,就令我更加學懂珍惜身邊的每事每物;而且我對死亡已不再害怕,認為死係人必經階段,有生之年我會做更多有意義的事,過一段快快樂樂的人生.

世榮

以下是世榮親手寫給女友的信:

to my love cynthia:

當我夢見你伏在我懷抱的
時候,那種感覺非常真實,
很舒服,很開心.雖然你
去了很遠的地方,但是我
仍然感到你的存在,你在
微笑,你在給我鼓勵,請不
要掛心,我會保重自己,我
會繼續努力.
cynthia i love you.
世榮

再次看到世榮的訪問,眼見他積極面對,作為歌迷感到十分欣慰...永遠支持你.