以前固然睇過, 加上老豆當年係吳宇森周潤發迷, 不論 <阿朗的故事> 、 <英雄本色> 定 <監獄風雲> 等等都睇過 N 次。唔係唔好睇, 不過印象一 D 都唔深刻, 直到o係英國夜欄人靜睇 <喋血雙雄> 。終於認同周潤發果種魅力, 只有佢先至可以同一支槍襯得咁緊要。



『做我地呢行通常都會留返最後一粒子彈, 一係殺人, 一係自殺』 - 阿莊 (周潤發)



唔知道喋血點解, 用英文字典一查之下發現解 bloodbath , 咁應該就係解一身都係血。套戲大致講道義o係黑社會已經唔存在, 偏偏殺手阿莊係好重情既人, 殺手既正義感動左本來出賣佢既經理人 (朱江) 、俾佢意外打盲左既歌手 Jennie (葉倩文) 同埋 本來要拉佢既李 SIR (李修賢) 。

有說呢套係鬼佬既港產 CULT 入門片, 我唔係好知點解, 可能就係因為經常o係槍林彈雨之間敵人會因為主角要講對白而停低。記得最後其中一幕講到阿莊同李 SIR 一齊殺出重圍中, 鏡頭一轉佢地傾緊計, 然後李 SIR 話『人情債係一世都還唔晒架, 祝你好運』跟手教堂上層就跳兩個嘍囉落黎俾佢地殺。

對李修賢無乜感覺, 但o係戲入面好鐘意佢對阿莊果種欣賞, 尤其係佢坐o係阿莊舊屋張單人梳化沈思, 鏡頭交替兩個人一樣既動靜, 最後佢仲扮阿莊退後開槍, 嚇親自己個拍擋曾爺, 完美一幕。

覺得套戲有好多對白都幾係『為成為經典』而出現, 所以有時會覺得佢地講野唔係好順或者離晒題。



『你唔可能羸晒成個世界架。記住, 輸左唔等於失敗丫。』 - 曾爺 (曾江)



最後一定要提葉倩文戲入面幾首歌, 氣氛非常配合, 睇完套戲我諗唔少人會對原聲大碟相當有興趣, 可惜應該未存在過, 極可惜。



(p.s. 總有 <無間道> 陰影... 包括李 SIR 話『你都唔似一個殺手』時, 阿莊話『你都唔似一個差人』; 同埋以上 B 碟既碟面...)