前兩日個Data base唔知做咩登入唔到，
所以今日先可以寫返。

前日係國慶日，
但係一向好少民族志識嘅我都冇諗過放假嘅意義，
總之就係多咗一日假期喇。(^^)

0個日係《無間道ＩＩ》放映嘅日子，
本來想叫人一齊去睇，
點不知：
Nathan : 唔得呀…我而家打緊麻雀。
M巾 : 我都係。
發 : 我都唔睇戲嘅。
譚鋒 :$$$$$$$ …
Arron : 陣間要出街買野呀！
…

冇辦法之下，我就只有去溫書…

(中間部份已由台長加密處理。)

…到九點幾先返到屋企，
雖然有D攰，
不過今日好開心！
(下次再有機會就好喇！^^)

跟住冇機耐就瞓咗喇。

第二日返到學校，
第一堂係Geog堂，
要交功課。
但係我響書包搵極都搵唔到份功課！(哇！)
(睇黎係前日執野去溫書0個陣擺咗響屋企，
又唔記得帶返學喇！)
冇辦法之下只好行最後一步-----
舉手投降！
(本來Ms.Ching要我食晏0個陣返屋企攞架，
好彩完堂之後佢就同我講話可以聽日先交，
但結果都係要寫手冊…唉…)

下晏又去咗食車仔麵，
好彩嘅係尋日響車仔麵檔前趙樂樂冇發生任何事故，
好平穩地食咗佢嘅一餐。
(唔知下個月去會唔會又流多次鼻血呢？呵呵～)

尋日係long day，
所以要上多一堂。
今次係講舊年大學我地之前一屆畢業生讀到degree嘅admission grades，
(CityU 嘅BBAIS 果然靠唔住…)
同場仲加送一本郭Sir話價值HKD$400嘅JUPAS 指南，($400…)
及我地JUPAS揀科嘅access number。
最後就係上一屆嘅畢業生講返佢地上咗degree嘅野。
(令我再一次想令自己更加努力！)

放咗學之後依然係一行五人去溫書，
溫到差唔多八點就去麥當努食野再去自修室溫。
(平時都係響參考圖書館度溫。)
溫溫吓見到Fion，
佢都響度溫緊。
傾咗一陣，
佢話今年A-level想UE攞B。
(佢讀書好叻，
但係CE考得唔係咁好，
我諗佢今次A-level成績一定會更上一層樓。)
之後溫到差唔多成十點先走！
(個頭都溫到有少少暈…嗚…)

今日由於受到尋日勁溫書嘅關係，
個腦硬係好似實咗咁…
不過平時情況更差0個陣都係咁上堂，
所以都好平穩咁響上堂聽書。

上Geog堂0個陣發生咗一幕師生上演嘅「大戲」！
(大戲最拿手的武打場面-----耍、花、槍！)
主角Ms.Ching好刻意地問譚鋒一條問題，
譚鋒又好刻意地答錯。
而最刻意嘅時刻，
就係Ms.Ching 響譚鋒答錯之後贈佢0個句：
「我唔愛你架～」。
咩事呢？

放學後要Geog補課，
但係都淨返冇咩Energy去聽。
好彩Ms.Ching都頂唔順，
講咗冇幾耐就完。
(自開學以來Ms.Ching嘅體力就持繼下降，
唔知係咪要應付多咗課堂以外嘅野，
例如同人出街食飯呀咁呢？)

今日放咗學之後無去同趙樂樂佢地去市中心溫書，
因為我想申請樓下個社區中心嘅自修室。
(可以近D又可以返去食飯嘛！)
Eunice陪咗我去申請做會員，
到咗之後竟然比我見到小花！
(之前完全唔知佢響度做，
可能係呢排少搵佢喇~~”)

申請完返屋企換衫之後就去同Eunice溫書，
去到自修室發覺0個度原來好靜，
而且個個都好用心咁溫書，
好有讀書氣氛吓，
令我不期然咁都好想溫多陣。
(可惜嘅只係開到九點半，
如果佢係開到十一點我諗我都可以繼續。)

見到個個都好勤力之後，
對自己不期然都產生一種推動力。
而家我先覺得之前我自己係好鬼懶，
唉…只好以而家嘅努力去補救當初嘅損失喇。

Just hope that is not too late.