這是我重病了後的第七本冊。若不是這擺對鬼門關走轉來，我想，遐的作品應該袂有出冊的彼一工。其實是不是有出冊，並不是介重要的代誌，重要的是，這馬的我，佇整理家己的作品的過程中，更加會當專心好好整理家己的一生，用目屎抑是歡喜的心情，走揣彼段美麗的日子，彼段想著會欲家己微微仔日子…………

其實，病後，我對真濟代誌甲物件已經袂閣看真重，親像四十冬來我一直用心計較收集的冊，我從來毋捌拍算有一天欲按怎處理遐的冊，因為遐的冊是我唯一的財產。如果莫有這擺的重病，相信我一定會繼續將遐的冊當做比黃金閣卡寶貝，毋過今仔日的我，凡勢真緊的彼一工，我嘛會雄雄規氣甲遐的冊全部送予恁。（這馬的我已經嘛無體力處理啊）

 既然按呢，為啥物閣欲整理家己的作品，恁一定會認為我是一咧真矛盾的人，範

勢我真正是這種人…………

我是啥物款人我家己知影，我的作品好歹我嘛知影，我閣卡知影我的每一篇作品內底攏有我想欲表達的想法，毋管故事的真假，毋管快樂抑是悲傷，內面攏總藏著一咧百分之一百的我。我親像越頭重新熟似家己，重新發現家己，這是一咧真奇巧的經驗，我定定會問著家己：敢講這是我嘛？…………

二0一三年五月，出院已經九個外月，我攏感覺家己親像才對夢中轉來，──阮對夢中轉來，走揣彼段失去記智的日子…………

阮對夢中轉來，猶原閣咧走揣彼段失去記智的日子…………

【附註】這本冊內底的「火旺仔的死因研究」，是一九八一年二月創作的，所以真

多用字甲教育部二00九年「臺灣閩南語推薦用字700字表」無仝，佇這

特別提出來說明。

──二0一三年六月十四日台灣時報