阿母的觀念

          是彼一工改變的

          從阿彌陀佛到阿門

          閤嘴開嘴

          咱人的一切攏是上帝的

          恩賜

          每日點三支清香

          求佛祖保庇阮厝

          阿母合掌頂禮

          胃出血猶原無情的

          奪去阿爸的喘氣

         〈阿母的哭聲

           愈來愈大聲

           佛祖你在叼位〉

          到彼一工，補習轉去

          機車從阮身上壓過

          腦震盪三個字

          是醫生最後的宣判

          除非有奇蹟出現

          〈三支清香

            敢有路用

            佛祖你在叼位〉

           阿母的朋友

           講起上帝的福音

           「信我者得永生」

           信看覓也好

           伊是最後的希望

           終於醒了

           是醫生給阮生命

           阿母講是上帝賜的

           只要有上帝

           伊著不擱有煩惱  

           阿母講要學豆芽菜文

           伊要和上帝講話

           不免有人做翻譯

           伊要去找上帝