幾個朋友佇內溝溪生態步道散步，看一路的花草。芙蓉花開真濟，有人講，芙蓉拄仔（剛）開的時是白色的，然後沓沓仔變做粉紅的，最後變做大紅的。

有人問：「哪會毋是沓沓仔褪色？」

「自囡仔款款仔變做十八姑娘啦。」

有人講開紅色花彼欉叫作「紅蝴蝶」，有人堅持彼是「鳳凰木」。「植物百科」無來，也無人有辨識植物的應用程式；只好等過後才來裁決。

看著一欉蓮蕉花，我講伊的根會食得，也會當作藥仔。「聽講根磨作粉，就是一種健康的配料，叫作黃啥物。」

「黃庭堅。」阿貴隨應。

我笑起來，北宋大詩人、大書法家和植物有啥關係！

「毋是？啊無敢叫做黃書墩？」彼是伊的書法老師。

落尾我才想著彼叫做「薑黃」。我若講「啥物黃」、莫講「黃啥物」，可能較想會起來。

既然講起書法老師，我問伊有上過另外一位老師的課無？叫作丁、丁、丁……。毋是丁海寅，彼是韓國演員。「是丁、丁……」丁袂出來，我煞唱起來，「Tintarella di luna , tintarella color latte, ……」

彼是我少年的時唱的歌，這陣竟然雄雄想出來；內底就有「丁、丁、丁」的歌詞。Tsit-má（現在）知影這條歌的人可能真少矣。我會記得阮活潑的三姨捌佇阮兜（tau，家）的客廳綴（tuè，跟）這條輕快的歌跳扭扭舞。

啊是啥人唱這條歌？慢慢仔來想。

幾年前，若想袂起人名、地名抑是代誌，我會真鬱卒，失志（挫敗），甚至「氣急攻心」；彼款心情予我想著我的後生學用箸食飯、菜一遍一遍夾袂起來的時，會氣甲哭出來。後來伊箸用慣勢，就袂閣發脾氣；我嘛仝款，想袂起來的愈來愈濟，慣勢矣，就隨在伊去；像人講的：「債多不愁」。我安慰家己，人到一個年紀，就會向彼個茫渺的、記持bái（差）的「境界」行，無必要掛意；顛倒會當提來和朋友講笑，互相落氣。「互相落氣求進步」？毋是，敢若咧比賽啥人的「失智現象」較精采、較好笑。

（本文刊於2022/02/06聯合報副刊）