零四年一月二十一日

今晚同左江及麗全往ＧＨ睇金鷹，去到大家考慮左少許因素買完飛後就往旺角花墟年宵市場（第一次行呢個年宵）。人數比想像中多，慢行左４５分鐘能步進入口。行到差唔多一點趕住返ＧＨ睇戲便搵出口走人，點知一出個達之路出口先知往太子方向已封被迫行九龍塘方向，重要行到九龍塘火車站先能止步（我地明明係係對面既新世紀行黎，而家卻要搭火車往原地）。睇完戲便再踏年宵買今年既心頭好－－水仙，點知行兩行見到一個好好口才既女人售買風信子，見好似好好玩又香又有分紅及紫，便買左一紅一紫（江說大紅大紫，哈哈）！幸好最終能買到水仙，買呢類野真係要合睇緣，唔係買左都會怪怪咁，呢盆我同佢可說是一見鍾情！
行到差唔多５點大家便往ＭＫ食野，一去到先達見到間大字標榜２４小時及車仔麵大家二話不說便入左去。佢倆便好爽快咁碗仔翅丫+螺肉，因為年初一食齋緣故我唯有叫個豆卜韮菜米粉。食兩食大家都覺得的野好難食，使我們深信在坐無一個食客會係熟客仔。突然聽到有班人話點解會黎呢度食架，呢句話使我地更深信大家都係無知地入左黎，真係笑爆！
食完搭泥鯭的回家，有架巴士路過時麗全問『乜今日巴士通宵行駛咩』我當時都以為係掛，點知望下個鐘原來６點幾，係第一班巴士，哈哈！

盆水仙開得好靚好多好香！！