懷緬過去常陶醉一半樂事一半令人垂淚

21/3星期日
世欣：阿Wing呀，星期二得唔得閒，我約左中學既Miss同阿Sir食lunch呀！一點至兩點！
我：好呀，星期二見啦！
就係咁，兩日後同世欣去左學校隔離既酒樓開定位！

先講下世欣先，我同佢識左15年，大家同一間小學中學，
不過小一至中二都未曾同過班，只係小學小息時一齊跳下繩！
如是者，至中三先至同一班，一路到中五畢業。
畢業後，世欣一心想投身酒店業，
所以報讀有關課程，
而我，因為唔知去向，又一齊讀呢個為期一年既課程，
但我只係讀左大半個月就無讀，
因為當時TVB請左我，咁就quit左呢個diploma既課程，
世欣順利地入左酒店業呢一行一直到依家。

當日飲茶，因為老師們只有一個鐘頭時間，
匆匆忙忙咁食完野就走，
而我同世欣都唔想走住，於是就諗到，
返小學一次，
呢次就係我地畢業後正式地第一次返回小學。
十年人事幾番新，
上下午校已經統一為全日制，
校舍由六層增加至七層，
女生夏天校裙亦由白恤衫深藍連身裙改為pinky妹妹。

我地去既時候，學校仲未放學，
校工叫我地唔好亂走，只准上一層去校務處同教員室。
一上到去，教過我地既老師都認得我地，
o個一刻真係百感交雜，
見到d老師我真係好開心，
另一方面，
見返佢地熟悉既面貌，
但已經配上一定數量既白髮灰髮，
心裡面諗，
原來咁多年架腬！

最後得到既消息，
我一直好愛既關老師，
佢係我小一小二既班主任，
去年已經與世長辭。