曾經有一位我認為係best friend既人...

Best 既意思﹐係“最好”。

當然﹐升得到個個位﹐我同佢經歷過唔少野。
當然﹐當中亦有誤會﹐我地亦曾經反面...各不讓步。

所以就此被命運找到了機會﹐主動地幫我們定奪。

失去聯絡﹐係真係失去聯絡個隻﹐係想找回呢個人都唔知由何去找...
呢D事﹐真係係廿一世紀初都可以發生﹐
令我諗起廿世紀初中國入面D人會因戰亂失去親友既音信個種。
我只係知道﹐佢去o左一個離我好遠既地方...
呢個城市﹐我都唔知有沒有機會會去﹐我亦未去過﹐
沒有地址去到咁大既地方都一定找不到...
但係佢就長期係個度。

唔知呢D係唔係就係緣份﹐又好似唔係﹐
因為表面上呢個人一早己經同我冇關係﹐
我既印象入面既可愛妹妹仔﹐一定已經變晒﹐
唔好話個樣﹐個人一定已經唔再係我識個個佢﹐
畢竟﹐我同佢既聯絡﹐係斷於中學之前﹐
我自己可能都唔一樣o左。
其實我都已經面對同接受o左唔見o左個best friend。
當時我根本做唔到D乜野﹐
我唔會用用係愛情上面既“心死”去形容﹐
只不過我真係冇諗過要或會同呢個人見番。

由第一次失去聯絡計起既第四年既夏天﹐
係我已經有一大班其他圈子既朋友個陣﹐
有一日﹐係我生日前個一日﹐八月十一日﹐
我係澳門既文化廣場自己睇完書諗住番屋企﹐
我見到已經轉校既小學同學Edith Yun。
我其實同佢唔係好岩key﹐不過都熟過一排﹐
我亦都唔清楚佢同乜人熟﹐
不過﹐同佢greet完之後﹐佢單出一句﹕
“妳知唔知XXX番o左來澳門呀? 佢約過我出來呀﹐佢有沒有找妳呀?”

當然係冇。

因為佢走個陣﹐我都無同佢講再見。

但係呢種時候唔理得咁多﹐我都係跑番屋企﹐
將舊電話本子找來。
曾經有至少三年既時間﹐
我可以好自動地打佢個號碼﹐
佢個號碼就好似我自己個號碼咁熟﹐
不過﹐畢竟四年相隔...

“喂﹐唔該找xxx?"
“我係。”佢把聲﹐仲係完全一樣﹐好甜既小孩子聲線。
“妳知唔知我係邊個?” 我覺得我總係好似一個變態佬。
“哎..妳係...妳再講多次野?”
“哈哈哈.." “一聽妳笑就知妳係Jessica啦﹗”
“Hahahahaha....”

我地即日就約出來﹐食野﹐影相...
因為佢第二日就要離開澳門﹐去探人wor..

佢話佢完全唔記得之前我同佢有過唔開心既時候﹐
其實佢講乜野﹐我都會選擇相信﹐係好自然咁就信。

點解我好似D記性咁好ge?

之後佢走左﹐當然有問佢要ICQ﹐地址。

點知﹐我寫個張野﹐唔見o左 -_-
似唔似幾米既故事劇情呢?
哈哈哈哈~~~

我完全覺得係天意。
不過佢係icq度add我﹐所以都係未失去聯絡住。
但係中四既我上網沒有今時今日既我咁多﹐
而且我表哥部舊電腦太慢﹐
我上親網都同佢傾唔到好多野。

好攪笑地﹐我有次個icq死左﹐
再install 番﹐個舊contact list完全唔出番來﹐
我都有search過佢﹐
但係search唔到﹐而且之後佢都沒有再hi我啦。

我亦唔想諗點解。
當時我有其他野煩緊。

跟住佢又再被我打入冷宮。



係再次失去聯絡之後既第四年既四月前﹐
差唔多唔記得我心入面既冷宮入面仲有個人住緊既大學最後一年﹐
亦即係佢生日既前幾日既今日﹐
我收到原先因為聽到Erica開o左個account﹐
而我又想去八下所以去開既friendster account度﹐
收到一個同佢同名既人既message....

我睇唔到個message -_-
開唔到...死friendster。
連send番message俾佢都唔得....

我其實開個account個排﹐search過呢個人。
不過search唔到。點解呢? 我唔知﹐亦沒有研究過。

但係今晚就find到。

雖然都係睇唔到佢係個message度寫o左D乜野俾我﹐
可能佢都唔肯定我係邊個。

我唔知呢個會唔會係為第三次失去聯絡鋪緊路....



我總係覺得今次既佢﹐POP UP完之後﹐
又會好似之前一樣﹐消失係我既生命裡面。