時：接上
景：警局會議室
人：斌、琪、鐸、達、龍、佬

△ 鐸等人在會議室內排排坐。
△ 斌仍未到，眾人開始竊竊私語。
達：（不滿）搞乜鬼呀！啱啱先咁大鑊，開會又未見人。
鐸：唔好咁啦，高層要等吓㗎！（望向門口，好像等人）
龍：做乜呀鐸叔？趕住走呀？
鐸：唔係呀，今日我細姪女嚟報到呀，咁耐都未到，佢唔係咁「冇厘搭烚」㗎……
佬：呀！（突然醒起些甚麼）我知點解陳sir咁遲嘞，梗係要見鐸叔個細姪女。
△ 此時斌推門入房，琪隨其後。
△ 琪向鐸打眼色。
斌：開會之前我想介紹個新同事俾你哋識，（望向各人）高欣琪，巡警嗰度調過嚟嘅，（然後對琪）呢啲係我哋B組嘅手足，（遂個指向介紹）鐸叔、雷達、暴龍、細佬。
琪：（少少怕羞）大家好呀！我叫高欣琪，你哋叫我Yanki得㗎嘞！
斌：好嘞，（指向鐸隔離）你坐住喺嗰度先啦。
△ 琪坐向鐸側，二人交換眼色。
斌：而家正式開會。（拿起檔案）煙雨樓呢單嘢上頭好關注，而且死嗰個又係公眾人物，我哋要打醒十二分精神。
佬：（疑惑）梁得盛係黑底啫，但係呢一兩年佢撈返正行啦，邊個會咁想佢死？
龍：（不屑）撈乜鬼正行呀！成日同啲明星仔見晒報，又掙女又講數，咪又係做埋啲污糟嘢！
達：啲八卦雜誌仲有冇講佢同邊個有仇口呀？八公！
△ 眾人忍不住笑，龍也以笑遮醜。
斌：（正經）點都好，呢樣都可能係線索嚟㗎，唔排除真係啲高層買起佢呢？（笑後嚴肅）之前鑑證嗰邊send咗啲料嚟，初步估計係職業殺手。
鐸：（若有所思）請職業殺手？可能同梁得盛之前啲社團鬥爭有關喎！
斌：（堅定）係呀！所以我哋可以喺呢啲地方到跟。（沉思）而家分工：鐸叔同雷達去睇吓啲針有冇料到，問吓梁得盛呢排有冇同人結怨之類。
鐸、達：Yes, sir！
斌：（續道）暴龍同細佬去查吓梁得盛最近去過啲咩嘢地方，同啲咩嘢人接觸過，我要知得清清楚楚。
龍、佬：Yes, sir！
△ 琪眼光光望向眾人，又不知自己可以做甚麼。
△ 斌似是察覺琪的疑惑。
斌：（靈機一觸）Yanki新嚟嘅，啲嘢未必跟到，不如去摷吓啲file，搜集吓梁得盛嘅黑底紀錄，同埋同佢結過怨嘅黑底！仲有啲類似案例你都搵埋返嚟呀。
琪：（如獲至寶）Yes, Sir！
斌：大家俾心機啦，散會！
△ 斌想離開會議室，眾人似乎鬆一口氣。
△ 琪卻叫斌留步，眾人詫異。
琪：（懇切）各位呀，不如今晚我請大家食飯，我初步報到呀。
斌：（和藹卻冷淡）我唔去嘞，你哋自己去啦！
△ 斌推門離開。
達：（怪責）Yanki乜你咁唔醒目㗎？不嬲呢啲嘢我哋唔預佢㗎嘛！
鐸：（維護）阿琪第一日嚟，佢點知咁多啫？
△ 琪無奈，一臉無辜。
龍：（為眾解圍）唉呀，今晚去邊到食呀？Yanki你話請㗎吓！
琪：（安然）梗係啦……不如食泰國菜呀！
△ 眾鬧哄哄和應。
△ 即cut下場。