終於都將兩隻唔生性的智慧牙連根拔起. 其實只有一隻係唔生性的, 係度遮遮掩掩, 搞到連佢對頭哥隻本來好地地都要比人掘埋走. 佢地都陪我走左好多日子, 知道晒我呢幾年食過既野.

我覺得呢兩隻牙某程度上好似我的朋友. 有d朋友, 陪我走左好些日子, 一齊經歷過一d難忘既事情. 當問題出現, 而解決既方法只有離開的話, 雖然係痛苦(真係好鬼痛, 我講隻牙), 但係都冇辦法. 有時係佢離開既同時, 亦會連同一d其他野一齊帶走, 就好似另外哥隻無辜的牙一樣. 都係必要的... 為左大家的好處.

醫生問我幾次要唔要返d牙, 我話唔要. 都已經脫離左, 要呢做乜? 可能有時都會掛住佢地, 但係唔好啦... 望左一眼就算了. 再下來的事, 就係等d牙肉慢慢復原. 我諗, 任何傷口都有痊癒既一日. 我個口, 已經可以如常講野, 我既食慾... 對而家個口既情況睇哩, 所有我咬到既野都無一幸免. 我既適應能力真係唔差呀!

任何傷口都有痊癒既一日. 不過一月又要掘多一隻走... 又要忍多三支勁痛的麻醉針... >_<