──記訪二二八受難者家屬

怹來，佇佮五十冬前相siang5有風，吹toh驚惶的暗暝。問起汝的身世、汝的行蹤，問起日夜交替無味的彼幾工，咱的城市渚著偌重的紅，猶閣怎樣退色。

怹閣來，看著黑白相片內面，汝的笑容佮汝身後的風景，停睏佇少年人青份的熱天。毋是熱天。彼冬變kah真寒，真濟人亦無願意如此的避法，提燒燒的肉身，藏入冷支支的土跤；有的藏未赴，一半面肉，體現出來，予風刮、予人看。

抑阮，亦是藏未赴的人。只有是屈守佇土跤頂懸殘活，繼續掩嵌汝的消息，以及汝因為寒，煞講袂出嘴的話。

時間並無歇熱，一冬經過，猶閣一冬。汝亦無交代欲藏宓偌久。

怹來，親像來聽我唱曲。即塊曲囥佇心肝上底層，真久攏毋敢放送。阮嘛無愛唱kah遐悲傷，只求佮歷史仝調。阮是汝的未亡人，未亡，為著見證。

2003/10/19初槁
2003/10/26修
─────────．
後記：參與二二八口述歷史的計劃，訪問家屬的時，上予我毋
甘的是受難者的「遺孀」。

◎圖：電影『天馬茶房』劇照。

刊載於＜台灣日報．台灣日日詩＞，2004/02/28