嗰日中午按往常嚟講，壹仔都係出去網吧抽機咖喇，不過好似俾班主任講唔知咩出去要請假定點，所以壹仔就留響教室度，度過咗人生最黑暗嘅一個鐘頭……
嗰日中午啱啱好撞正奶燕生日，奶燕切完件戟，就「太公分豬肉」，人手一件，分完有突，冇諗到突然殺出個班主任嚟，好彩好彩，蛋糕仲有淨啫，班主任接過件戟，食咗啖，竟然話嚿蛋糕成嚿磚咁，你食就食喇，仲咁多辯駁，就算唔好味都唔好講出來啊嘛，真係唔鬼識做。
班女見副班長，啊壹仔枱度件蛋糕郁都冇郁過，就諗住今日奶燕生日，飲飽食醉就點都嚟啲餘興節目咖喇，顏小肥行咗過去問：「點解你唔食啊？」
「冇啊。」壹仔唔係幾中意食蛋糕。
「冇？」突然+Min從旁殺出，撳住壹仔兩隻手，顏小肥攞起蛋糕插咗件笑吟吟咁話：「我喂你食呢？」
「唔使喇，喂！唔使喇……」壹仔大嗌，之後俾顏小肥質咗件入口，「我自己嚟，唔使你代勞。」
食下食下，壹仔擺低蛋糕跑咗出去，班女雖然如狼似虎都抓佢唔住，壹仔諗住都唔會再玩咖喇，點知一入去，又俾班女仔上下其手，認真大石壓死蟹。壹仔又俾人監生骾蛋糕，壹仔大鬧：「王兄你人渣！唔幫我！！！」，王兄當冇事發生過。「點解你哋係都針對我啊……」壹仔問。
「鬼叫你唔食蛋糕啊！」
「勳哥夠冇囉！」
大家霎時間望住勳哥，勳哥即刻三扒兩撥食埋件蛋糕。呢個時候值日班長葫蘆入咗嚟，壹仔大叫葫蘆幫手救救佢，葫蘆越嗌越走，走夾唔透。葫蘆後來咁老實嘅人都話：「我唔走，我蠢喇我！」
「神棍又唔搞！」
「人哋Uncle Stick啊，Uncle輩嘅點敢搞啊。」
小肥整咗嚿忌廉，一抹，整到壹仔成個嘴角都係，神棍一直話：「算喇，算喇。」都冇人聽佢支笛，神棍只可以話：「壹仔慘遭女仔蹂躪啊……！」認真似恐怖分子準備割肉參個頭咁……
搞完壹仔，顏小肥留起啲忌廉諗住……下晝，奶燕跑去豬輝度，「啪」一聲，豬輝成塊面好似整咗啲剃鬚膏咁。
唔好意思，講遠咗。不過壹仔真係夠晒好老脾，咁俾人玩都唔還擊。如果將壹仔比作係一座火山，咁佢到底係個死咕咕嘅火山啊？定抑或係「蓄勢待發」嘅活火山呢？還是話，正一俗語所講嘅：「好佬怕爛佬」，而呢個「爛佬」就怕「潑婦」喇。似乎都係要放長雙眼去睇，拭目以待喇。