大家好地地喺個教室度傾偈。虹姐入咗嚟，只係翻咗吓書包，就突然發起癲嚟。一味喺度叱吒咁轉，行上行落，成個日本首相咁，「左藤（騰）右藤」，睇佢個樣好似唔係幾多妥。
阿潔企響虹姐隔籬，諗住虹姐做乜事咁動肝火，點知虹姐見到阿潔就一輪嘴咁問：「你又冇攞咗我部手機啊，有冇啊！！！」
「我無端白事攞你部手機嚟做托啊！」阿潔話冇。
虹姐直情緊張到，連平時都唔整蠱人嘅蒲公英都起疑心，一手推開僕喺張枱閉目養神嘅蒲公英，發現佢冇收埋手機就問：「你有冇收埋我部手機啊！！！」
蒲公英被突如其來嘅虹姐當堂嚇到傻晒。
好衰唔衰，阿君手度拎住部手機，又收入個袖度，搞到虹姐重以為嗰個就係佢部機：「你快啲俾返部機嚟啊！！！」
阿君又特登唔攞部手機俾虹姐睇其實唔係虹姐嘅：「點解要俾你啊！」
「攞嚟啊！！！」虹姐發晒難，伸手去搶。阿君揚咗一揚部手機：「嗱……我咖！」
神棍見到虹姐抓狂嘅樣笑到攤咗喺地，虹姐懷疑神棍撻咗，興烚烚咁沖向神棍：「攞出嚟喇，唔好玩喇！！！」
「邊個同你玩，河馬嘅手機邊個會攞，貪興香啊！」
「慌死唔係上次咁，呃人咩……」阿潔話。
虹姐去返自己個位，喺個書包度摷咗摷，靜咗落嚟。
「哎呀，做咩啊，喺個書包度揾到啊？」
虹姐揞住塊面，真係丟晒大假囉，搞足成日，原來自己嚇自己，擺烏龍。又難怪嘅，我話佢有時自己對住塊鏡都會嚇親喇，見到有隻河馬喎，唔驚就奇。