(本篇拙文請用台語讀唸)
古早時，「司公」超渡「人」過奈何橋的工夫好、歹真正有差；好「司公」免揀日子總是生意興旺，而歹「司公」只有堵到好日子這好討賺！台灣五月天的油桐花哪親像兮款堵著好日子的「司公」，四界有人講伊「古睢」講伊「隋」，四界有人行毋知路，假日就爬入山去揚頭看伊花落親像落雪！
油桐啊，油桐；毋免驚惶也毋免啟譙！啥麼時陣爾變做客家人「也」文化標頭？反正來一陣風爾著落一檬花，就有人為爾吟詩、為爾寫詞，毋免管伊是阿扁、阿膨，或者是阿花、阿嬌。爾著惦惦企著山頭乎人看，眾人看爾「隋」，爾著眛「綏肖」！反正，在資本主義「也」商品化社會，講文化是「號肖」話，在這當陣文化可以商品化，當然文化也可以創造！在台灣一切向錢看，有錢攏總「隋」…

幾百年來，台灣人好騙歹教愛錢毋怕死！日本人放一「列」屁，咱就在後壁叩叩「神」（神；台語音，意撈也），少年也可能卡勿知影，日本仔過去給咱講種油桐、飼Giao-a（鳥也，十姊妹）真好賺，咱就飼「歸」厝間、種「歸」山坪。我細漢「也」時陣曾經看一個阿公ㄚ飼真濟十姐妹，有一工我問伊講；
“阿公ㄚ，爾飼這恁濟Giao-a創啥？”
阿公ㄚ應我；
“囝仔兄，爾攏毋知，實在是無聲息！去乎日本仔騙「甲」鈴瓏「轉」”
“飼這陣Giao-a，較輸飼家已這隻LG…….”
朋友ㄚ，台灣人就親像這位阿公ㄚ好騙歹教，隨在人操弄商品市場，欲要Giao-a、欲要食鰻、欲要桐油，就騙咱講這真正好康、價數真正「隋」，到尾ㄚ攏是咱去乎騙「甲」賣某做大舅！

我講這故事是欲乎爾知，油桐是過去日本仔叫咱種，咱種「甲」歸山坪，當日本仔給咱喊一聲「毋要」，咱台灣人就哭爸哭母哭毋知路。擱再來連國民黨政府「嘛」行毋知路，飼一陣飯桶官僚！1977兮年講「蝦米」欲大規模造林，造來造去將台灣低海拔原始林攏總剉剉掉，改種濟濟油桐樹以及其他所謂「也」經濟樹種，害著現之時哪落大雨，就做大水兼發生土石流……。以上我所講就叫做台灣人好騙歹教，日本仔和國民黨哪親像閻羅王開酒店－毋驚死「也」台灣人就叩叩闖去！

話講轉返，油桐無罪！創造新「也」文化「嘛」毋是罪過！只是呼籲政府相關單位毋通「拖屎連」，欲發展觀光是好代誌，但是加想幾款哪較有內涵、真真正正可以結合咱台灣文化精神「也」活動以及物件，乎出門觀光「也」國民同胞知曉去觀光是去看啥、是去體會啥？按爾，咱台灣所發展出來新「也」油桐花文化，乎生理人賺著錢、乎國民同胞真正有文化素養，爾以為是麼？