問 - 訪問者  栗 - 栗子君

問：係，好，請問點稱呼呢？

栗：嗯，你可以叫我栗子君。

問：嗯……子君。咁你今年幾多歲？

栗：廿幾。

問：……即係大概係？

栗：睇吓先，1988 …… 1……

問：20。

栗：20。

問：咁你嘅學歷係去到？

栗：大學。

問：大學，咁係修讀啲咩架？

栗：工商管理。

問：工商管理。嗯，咁你平時有無做啲咩運動架？例如打波呀，游水，或者跑步

　　呀咁樣？

栗：有呀，成日都打波。

問：啊成日打添架？即係…… 1個禮拜有無 …… 3次咁呀？

栗：啊唔止添，一得閒就打架喇。

問：打係……踢波？定係籃球呀……

栗：踢波多，籃球都有，但少啲。

問：啊，咁會喺邊度踢波呀？

栗：晏菲路。

問：晏菲……

栗：晏菲路球場，有無聽過？

問：啊晏菲路，即係嗯...... 蒲飛路嗰邊？

栗：嗯……係啦，應該係。

問：啊，咁揀個度係因為近吖，定係快去到所以揀嗰度？

栗：我覺得晏菲路靚啲囉。

問：啊，好，明白。咁你平時會唔會都有啲呀文化活動呀，好似睇戲呀，聽演唱

　　會呀，或者係參觀啲展覽咁？

栗：睇戲都有睇，有時1日會睇1套添。

問：嘩咁密呀？哈 ......

栗：係呀，橫掂唔駛錢嘅。

問：咦？唔駛錢咁好架？

栗：係呀，BT喳嘛。

問：AMC?

栗：BT。

問：IFC?

栗：BT。

問：啊，未聽過添，咁你哋係會員所以唔駛錢？定係 ……

栗：會員？

問：即係你係嗰個院線嘅會員所以唔駛錢，係咪呀？

栗：會員 ……啊，我係fdzone會員。

問：啊，fd……啊朋友……地帶？咁你哋睇戲就唔駛錢嘅？

栗：係呀，全部都唔畀錢架。

問：啊，咁都幾好喎。

栗：係架，我可以推介你入去。

問：係呀？啊，好，多謝你先。咁除咗睇戲呢？有無聽吓歌呀，聽吓演唱會咁架？

栗：都有嘅，都係BT囉。

問：又唔駛錢呀？

栗：係架。

問：咁你有無話特別鍾意邊啲歌手？

栗：江若琳。

問：哈……係，仲有無？

栗：Freeze。

問：啊，Freeze我知邊個，幾個人咁架嘛。

栗：係呀係呀，咦咁你有無玩《神泣限制版》？

問：無喎，咩嚟架？

栗：Game囉，唔駛錢架。

問：啊，又係BT架？

栗：可以BT嘅。

問：都幾好喎。

栗：咁你鍾意聽咩歌？

問：我呀？哈……我聽嗰啲你唔識架喎，青山你識唔識吖？

栗：青山……啊，咩咩《留在我身邊》吖嘛，我知呀，我啲Friend有聽呀。

問：《愛我在今宵》。

栗：係呀係呀，我知呀，何韻詩都有唱呀。

問：啊佢有唱番青山啲歌嘅？

栗：有呀。

問：嗯，哈……咁都幾好喎。好，咁都想問番先，你哋生活作息係點嘅呢？嗱有

　　啲人呢就同我講，佢哋好規律嘅，做咩就安排好哂架嘞，有啲呢，就好隨意

　　哋，睇吓你係邊一種嘞。嗱譬如你平時多數幾點起身嘅呢？

栗：幾點呀？無所謂架喎。

問：啊即係瞓到自然醒嘅？

栗：算係囉。

問：啊咁幾點會食早餐？

栗：唔知喎，好耐無食過早餐喇喎。

問：啊，習慣唔食早餐嘅。咁幾點食午飯？

栗：唔定架喎。

問：大概呢？

栗：有時11、2點，有時2、3點囉。

問：啊，咁係自己整定落街食？

栗：一係求其食啲嘢，一係買上嚟食囉。

問：嗯，咁食完晏之後有咩做？

栗：有時踢吓波呀，有時睇吓書呀，有時聽吓歌囉。

問：啊，會睇書嘅？睇咩書多呢？

栗：《Game Weekly》。

問：係小說吖？定係啲雜誌？

栗：雜誌囉，入面都有小說嘅，又有啲畫咁囉。

問：啊，明白，生活雜誌嗰一類啦。咁幾點會食晚飯？

栗：餓咪食囉，有時會落去麥記食，順便同啲人打機。

問：打機？

栗：係呀，《MonsterHunter》你有無玩？

問：無喎，即係麥當勞有得打機嘅？

栗：可以架，又唔駛錢，最多咪買杯野飲。

問：啊，即係好大嗰個Mon可以用嚟打機嘅。

栗：都唔係好大啫……大過NDS囉。

問：嗯……咁幾點鐘會休息呢？

栗：休息？

問：即係幾點會上床瞓覺呀？

栗：啊，有時唔上床瞓架喎，有時喺梳化就瞓著咗。

問：咁幾點度呢？

栗：唔定架喎。

問：大概呢？

栗：有時6、7點囉。

問：6、7點呀？好早喎。

栗：都幾早架。

問：嗯，真係嘩……健康嘞。好咁都仲想問………………