https://youtu.be/-kHf2RBi7HU

浸秫米，挨米漿，硩粿粞，挲圓仔…

水大滾，煠圓仔，炒糖水，撈圓仔… 

較早，欲食一碗冬節圓，自阿公到阿母怹同姒仔就愛無閒幾若工。到這馬，我定定閣會想起阿公騎自轉車載磨好的米漿對巷仔口轉來的形影。

用粿袋仔袋米漿，喙口綁絚囥踮阿公家己作的椅條，面頂靠一支扁擔。扁擔雙頭用索仔綁踮椅條，利用扁擔佮椅條束縛的力頭共粿漿的水分硩出來，流落去椅條下底的鉛桶仔。有當時仔上頂懸閣會加囥一粒石頭，一粒扁扁若枕頭的大粒石頭。

自細漢胃腸就甲種的我，阿母有交代秫米氣毋通食傷濟。

其實，我袂攔食。只不過若看到奇巧的四秀仔，會較好奇爾爾。

古早人講：「冬節紅，過年茫。冬節烏，年頭酥。」 

今仔日外口有雨霎仔，後生嘛煮一鼎圓仔捧去樓頂敬神拜祖先矣。

聽候收落來，食二粒意思意思，感謝佛菩薩保庇一家大細平安。