彼个牌子的王梨酥真有名，也好食。毋過，我會一遍一遍去買，主要是伊的公司佇阮厝附近；所以提王梨酥做伴手的時，我會講笑：「阮兜的土產。」

伊閣有一个予人呵咾的優點：真大範，若去，攏會招待你啉茶，配一塊王梨酥。茶好啉，門前小小仔的園，有五六欉流蘇樹仔，有石頭造景；閣有一窟淺淺的水，種水草和蓮。坐佇長桌仔和朋友啉茶，破豆，看風景，氣氛袂輸咖啡廳。

閣有，伊貯*餅的長型素色布袋仔有耳，真好用。有人用來囥*便當，抑是溫水罐。我一个序細共伊吊佇浴間囥衛生紙，中央鉸開抽紙的所在滾花布邊；實用閣媠。毋過，上厲害的是一个朋友共伊變做藝術品：佇面頂畫水仙花配古詩：淡墨輕和玉露香/水中仙子素衣裳。

這就是彼牌王梨酥的附加價值。

以前，阮翁去日本出張，會買一二十盒去相送；這幾年，干焦*一半擺我買兩盒仔送朋友。

我會記得進前十塊裝的一盒350箍，後來起價，變420；一聲就起兩成，有夠雄。想袂到，頂日去買，一盒500箍矣！

 疫情以前，買餅的人排足長，有時甚至愛有義交來維持秩序；佇內面啉茶的真濟是講日本話、香港話的。疫情這兩三年，門前稀微，見若去買餅、啉茶，攏無幾个人客，有時只有阮兩姊妹仔爾爾。

這遍去，閣再看著排隊的人，也有外國人，內面的桌仔也坐甲滿滿；心內為台灣的景氣恢復歡喜。

人遐爾濟，我無倚去啉茶，直接去買餅。提信用卡出來攄*的時，才知影一盒500箍矣。

無偌久以前，一个朋友講伊欲買，所以我共伊講：「起到500箍矣，你敢欲買？」伊講中秋前伊有去買過，才450箍。可能這个價數已經誠久矣，我去買的時拄好閣起一成。

我佇群組講：「雖然講這站物價攏有較懸，毋過買菜、買日常用品，我並無啥感覺，哪會王梨酥起遮爾雄?」我最近買一領衫、一領裙，甚至比舊年買的仝款布料的閣較俗；毋是中國製喔。

一个少年的朋友回：「王梨酥是奢華物；奢華物起價，和一般物價是『脫鉤』的。而且，青菜、日常用品，沓沓仔起價，你不時咧買，當然較無感覺。」

王梨酥是奢華物？按呢講有較嚴重，毋過，伊確實毋是生活必需品。在我這个家庭主婦的想法，500箍來買果子較實在，若去附近彼間賣便菜的，會當買幾若盤素食呢。

貯（té）：盛裝

囥（khǹg）：放

干焦（kan-na）：只有

攄（lu）：刷

2024/1/5《人間福報》副刋