聽著我跋倒閣閃著腰，有朋友講我是毋是犯著太歲，勸我去廟拜拜。伊建議兩間大廟，我笑笑。伊看我無予伊說服，閣再講：「恩主公也真興，uì恁兜去，公車也方便；去行行咧，有拜有保庇。」

著喔，行天宮（恩主公）幾若年無去矣；伊和我有深緣，也有恩情。退休了後，我佇行天宮圖書館彼棟四層樓仔厝上足濟課，畫圖、寫大字、音樂欣賞等等；我和同學耍笑，講關公是咱的校長。

圖書館的冊也袂少，新到的冊和雜誌，大畫家的畫冊和傳記，也隨時會當去掀掀看看咧。所以，有人講伊若毋是佇咖啡廳，就是佇去咖啡廳的路途；我就講：「我若毋是佇圖書館，就是佇去圖書館的路途。」彼段路，uì阮兜行去，十外分鐘就到。

佇遐上課，毋但增加我的智識，熟似著幾若位有才情的老師，也交陪著一寡不時會當做伙食飯、開講、分享作品、看展覽、郊遊的好朋友；予我的生活加較豐富。

進前幾若年，新正年頭，阮一家伙嘛愛去民權東路行天宮行春，祈福；遐信徒足濟，適合過年去沐人氣。有幾年，大後生蹛（tuà，住）佇關渡，阮行春就去北投的行天宮，然後去台北藝術大學散步，食飯，看風景。

這幾年，一方面因為疫情，一方面因為愈慣勢守（tsiúnn）佇厝內，才無出門行春。

早起，我招小妹做伙來去行天宮燒香。

袂當閣講「燒香」矣，行天宮tshuā（帶）頭取消燒香的風俗；所以阮kan-na雙手合十誠心拜拜。

無燒香真好，挨挨陣陣的時，免驚衫去予人的香焐（燒）著，也毋免予煙薰甲流目油。毋過，佇前殿拜天公的時，本底徛足在、真有氣勢的大香爐的所在空空，猶是感覺袂啥慣勢。雖然神無所不在，毋過，有香爐這个大目標，雙手合十的時，才知影目睭向佗位。心內按呢想，竟然去想著一个笑話：一个人講厝內袂使無電視機，「無電視機，哪會知影膨椅愛向佗一向排。」

拜好，去添油香，感謝行天宮的恩情，也求著平安卡。行出來，攑頭看天，白雲薄薄仔，風微微仔吹，人感覺爽快，心情真好。

《文訊雜誌》2023.6月號