朋友傳一支短片予我。內容是：大人共一支雞腿伸去一个可能猶未一歲的『洋娃娃』面頭前。伊足歡喜，目睭瞪大大蕊，倚去欲食。毋過，大人送入去伊喙內的，是一湯匙嬰仔食物，有可能是伊無愛食的菠薐仔、紅菜頭。

一遍一遍，唌（siânn，引誘）伊的包括雞卵糕、布丁、漢堡、千層派，看起來攏真好食，連我都予伊唌著；所以有一點仔憤慨，回應兩字：「詐騙！」

我Line這支短片予兩个群組，得著下面的回應：

「遮爾細漢就拄（tú，遇見）著詐騙集團，有夠可憐。對人無信任，大漢以後無定著會發展出反社會人格。」

「這个囡仔真古錐，和露西亞總統普廷嬰仔時代的相片真誠（像）：毋通日後也變做侵略別人國家的獨裁者。」

「足恐怖的教養方式，指鹿為馬，伊的人生應該誠困擾。」

「人格反常一部份原因，就是因為有這款不良爸母。」

不過，也有完全無仝款的看法，有人講伊的囡仔細漢的時，揀食，飼一頓飯，足惱氣。「這位媽媽有智慧，莫怪嬰仔飼甲肥肥白白，真古錐。」

「這種欺騙，姑不而將，出發點是愛。」

有一个反應較心適，伊寫：「我直直咧等彼个囡仔共喙內的物件呸出來，阮囝細漢的時就是按呢反抗；囡仔嘛是真奸，毋是攏遐爾（hiah-nī，那麼）好騙。」