網路一條新聞講，美國田納西州一个人發覺伊的邊境牧羊犬走無去，厝外的監視器有錄著伊最後的身影；毋過，彼箍圍仔人真少，所在足開闊，毋知欲去佗位揣（tshuē，找）。

想袂到，第二工，狗仔家己轉來，後面綴（tuè，跟）一陣羊仔；到厝的時，伊閣佇羊仔邊走來走去，共in（它們）箍好勢才入門 。

 原來，伊發揮邊境牧羊犬的天性，共彼大片山地一个農場飼的羊仔「拐」轉來！

看著遮爾（tsiah-nī，這麼）趣味的短片，真想欲傳予我的好朋友麗莎。

每一遍，看著狗仔心適的行為，攏想欲共伊講。

阮見面、通電話，一定會講著狗。佇Line，分享上濟的也是動物的新聞和個人佮動物接觸的經驗；人和動物之間抑是動物和動物之間趣味的、予人感動的行為，會當予阮大笑，或者共感，非常解鬱。

麗莎是狗仔的守護者；除了厝內「編制內」的狗仔，逐暝無管透風落雨，也一定會騎伊號做「法拉利」的細台三輪車「出勤」，去飼流浪動物。必要的時，會陪愛心媽媽抑是動保團體去相關單位請願、抗議。伊熟似法律，gâu（擅）寫文章、口才閣足好，欲保護動物，欲和公務員理論、計較，較有氣勢。

伊消遣家己，暗時出來飼狗，穿插凊彩，完全親像一个做回收的查某人；去小七買物件，提白金卡出來鑢（lù，刷），店員憢疑，掠伊金金看；外國人欽佩伊的愛心，送狗罐頭予伊，聽著伊的英語，講：「哇，想袂到台灣的英語遮爾普遍。」

毋但逐日飼流浪動物，也會tshuā（帶）in去做絕育手術；受傷抑是有病的，tshuā去醫、去手術，開錢攏無算本。

伊毋是有錢的人；不過，伊樂觀，逐遍煩惱無錢矣，就忽然間有一筆收入。可比得著一筆稿費，可比有企業家央伊寫傳記；上好的是伊的工作室接著一个條件好閣穩定的穡頭（工作）。

有人呵咾伊的善良，講日後會有福報。伊無佮意這種「福報說」，講：「我只是愛in，做我歡喜做的代誌爾。」

狗仔離開世間，阮攏講in去做天使矣；按呢講，較袂悲傷。這陣，麗莎也佇天堂，身軀邊一定也有真濟天使，伊袂孤單。

啊毋知我逐遍佇心內分享予伊的狗仔的新聞，伊有收著無？

《自由時報副刋》2022.8.30