朋友問我最近怎樣？我講逐日咧臆謎猜。伊講群組內底考人的智力、視力抑是『腦筋急轉彎』彼種愛激頭腦的問題，伊攏閃遠遠。

我講我的臆謎猜無法度走閃。

不時愛臆的是名詞。一篇文章寫著我愛的一位印度作家：鍾芭．拉希莉 ，想袂出我最後讀的伊的作品是啥？叫做，叫做……，叫做一種花，敢若和湳仔地（沼澤地）有關係。

離開電腦，看一時仔電視新聞，閣去頭前沃花，最後才想著：《低地的風信子》。紲落去（suà--lo̍h-khì，接下來），想起彼本寫「你親像一枝弓，囡仔是uì（從）你身軀射出去的生命之箭，…….」的冊，伊叫啥名？兩字。米洗好，菜洗好，一盤肉丸仔炊好，才想著，叫做《先知》，紀伯倫寫的。

我欲買的物件慣勢寫條仔貼佇冰箱頂頭，一日竟然連「醋」都袂曉寫，想講彼是米做的，共寫做「米」爿；毋過，愈看愈無成，落尾才想著去提欲回收的空矸仔來看。

一日，早起十一點，我和阿圓看著公車外面一片開甲真鬧熱的花，講：「哇！有夠媠！」啥物花，兩人攏講袂出。後來佇阿雲兜（tau，家）食飯，開講，唱歌，逐家嘻嘻嘩嘩，我猶幾若遍撥工恬恬去想彼是啥物花？花枝長長，花一蕊一蕊排落來。一年轉去員林，外甥載阮姊妹仔去看彼種花，一大片的花海，足壯觀！

竟然隔轉工，我猶想袂出彼个花的名。上方便的辦法是上網搜揣（tshiau-tshuē，搜尋），毋過，無相片，有淡薄仔困難；而且，步步靠網路，無好好仔用腦，欲失智較快！

捌（曾）佇附近小公園看著彼種花，遐（hia，那兒）的植物攏有插花名的牌仔。彼个下晡，我趁出去買果子的時欲過去看；猶未行到公園，忽然間，一時靈感，想著「葵」字。

蜀葵。BINGO！就是伊。

蜀葵毋是時常看著的花，想袂起來猶有理由；一遍和小妹去花市，看一盆一盆紅記記的花，足影目。問小妹彼叫啥，伊講：「刺仔花。」我講：「華語。華語的名較普遍。」花也足普遍，社區內有人的厝會伸出一大片這種花，若棚仔。佇歐洲，伊嘛開甲真風神、聳鬚；佇希臘雅典，我翕（hip，照）過一張彼種花對塗跤開到三樓的相片。甚至，我家己的陽台也有種一欉；雖然花開甲無啥情願，我猶是逐日共伊沃水！伊叫啥？伊叫啥？小妹講免想甲遮爾（tsiah-nī，這麼）食力，來問賣花的就好啊。

這種花也著共人問，敢袂歹勢？

阮小妹無像我有靠家己想的決心，倚去問；花農講：『九重葛。』

我愛看狗仔，in（牠們）的面、in的表情攏足心適。佇公園運動的好處包括會當看著無仝品種的狗仔。一个放假日，我看著的狗仔真濟種，有柴犬、邊境

牧羊犬、哈士奇、雪納瑞、台灣烏狗……。毋過有一種狗，我想袂出伊叫啥。身軀肥肥，尻川大大，跤短短仔，足古錐。聽講in真神經質，一點仔聲就予伊吠袂煞，閣真愛和別的狗冤家；英國女王身軀邊定定有幾若隻彼種狗。……那（邊）運動，那想，到欲轉去厝的紅磚仔路行完，才想著伊是『柯基』。

每一日總是有愛臆的謎猜，莫去想，也會當過日；毋過，該臆的無想著，就掛心、毋甘願。一日若超過三遍愛臆謎猜，會鬱卒；想出來的時，才恢復信心，安慰家己：「好佳哉。」臆謎猜的好處是，拍拚想的過程，會「牽親引戚」，想起相關的地點、風景和人物，等於是共家己的記持和智識叫醒，順紲（順便）整理家己的頭腦。

玉蕙講伊嘛不時有這款情形。我知，阮不時佇電話中講「彼个，彼个」、「敢若，敢若」。

有一遍是公開的場合。

佇彼个講按怎對待親友的演講，伊講起頂日去看蹛（tuà，住）院的阿兄。「伊這陣佇一个治療中心，叫做，叫做……」親像曲盤的針行袂順，直直「叫做，叫做」，聽眾恬恬等伊想起來。

我心內想，「敢精神病療養中心？」毋過，無聽伊講過阿兄有精神問題。過一觸久仔，有人細細聲試探問：「加護病房？」

著！逐家攏笑出來，明明是遮爾普遍的詞！

2022年3號《文訊》雜誌