講起某一位明星，阿明講：「伊無我的眼緣。」

「眼緣」，第一遍聽著這个辭。以前較捷（ tsia̍p，常）聽序大人講的是，「某乜人無我的緣」。

眼緣kan-na（只）講外表，「無我的緣」主要應當是講個性。

按呢講較忠厚，比直接批評/嫌人較好。毋是伊無好，是無我的緣；可能是我的偏見，也可能是我無眼光。

有時我講某一位明星的喙傷厚，某一位明星「天生歐巴桑面」…..，心內會想，「這種話予伊本人抑是in（她）媽媽聽著，心情一定真䆀（bái，差）。」in袂聽著我的話；毋過，這陣有面冊、有各種社群平台，負面的留言有真大的殺傷力。

仝一位明星，抑是名人，有人佮意，有人討厭。有時我大力推薦的劇抑是明星，人無愛，我會感覺失望、遺憾，拍拚欲改變別人的想法。

《淘氣阿丹》的主角足古錐，尫仔冊和電影攏真好看。故事內底，蹛（tuà，住）附近的威爾森先生不時予阿丹創治（捉弄），雖然毋是故意的，伊講著阿丹，猶是氣怫怫；偏偏威爾森太太足疼阿丹，歡迎伊來。威爾森太太對in翁講：「袂當和你分享我的快樂，真悲傷。」

朋友袂當分享/贊成我的看法，我就有彼種感觸。

不過，聽著「眼緣」、斟酌思考這个詞了後，我想：毋是我的眼光無好，毋是我推薦的劇差，朋友只是對伊無眼緣。朋友推薦的冊抑是電影，我嘛無一定佮意啊。

按呢講起來，緣真重要，莫怪新娘入門的時，媒人會撒緣（鉛）粉，講好話；鉛緣台語仝音。我捌看著有人共一包鉛粉囥（khǹg，放）佇門頂頭的氣窗；新娘出出入入，應該攏會受著鉛粉的祝福。