佇Line群組看著一个朋友和in（她）囝的相片，囡仔可能十二、三歲，有夠媠，也會當用「緣投」來形容；若阮媽媽看著，可能會講「真將才」。

我共朋友講，「恁囝毋是普通的緣投；模仔好，印了有成功。」

我捌（曾）和這个朋友做伙學畫圖，伊素描、速寫、創意，能力攏足強，也生做真媠。上特別的是伊的目睭，有笑意，閣真有感情；我捌共伊半耍笑講：「予你按呢看，感覺你足愛我呢。」

所以我講模仔好。

第一遍聽著這款講法是三十外年前，阮媽媽來台北，一个厝邊金金看伊，講：「莫怪恁查某囝媠，模仔好嘛。」這位太太也熟似我的小妹。

這款褒嗦（誇獎）真厲害，兩代攏呵咾著。阮媽媽自然歡喜接受，查某囝、後生予人呵咾，伊從來袂謙虛。

不過，模仔好，也著印了好。我做囡仔的時捌鬥做過紅龜粿/鼠麴粿。過程是共包紅豆沙 / 菜脯米和塗豆麩的秫米（tsu̍t-bí，糯米）粿團貼佇粿模頂頭，用手共伊挲齊匀，然後慢慢仔掀起來。高明的才有法度印出巡（紋路）清楚的龜殼；低路的印出來的可能歪膏揤斜（歪七扭八）。

有的爸母生做真媠，毋過，若「印」了失敗，嘛有可能生一个比爸母bái（醜）濟的後代。有的較運氣，雖然模仔普普仔，囡仔會選著爸/母的優點，就印出較好看的外表。

2020.12.9《人間福報》