松樹

             佇（ti7，在）中正紀念堂的餐廳食飽了後，一个老人行過來，問我是毋是大陸人？

毋是，我是台灣人。

台灣人哪會來遮 （tsia，這兒）食飯？

莫怪伊按呢問，遮的菜較大眾化，主要是做中國觀光客的生理（意）。

我講來看展覽。按呢講較簡單，其實是因為一个朋友佇遮上書法課，所以三人約佇遮見面。朋友拄才（tu2-tsiah，剛才）先離開去上課，另外一个朋友去洗手。

老人共我講伊ui3（從）上海來看囡仔，逐遍來就蹛（tua3，住）一兩個月；伊後生佇台灣食頭路真濟年矣。

你是綴（tue3，跟）團來的？

毋是，家己來。

遮爾厲害！

伊講幾年前佇附近用25萬美金買一間厝；有家己的所在，蹛起來較方便自在。

我心內想，有才調（本事）家己買厝，好額人啊。遮爾黃金的地段，我臆可能是小套房。

我講就近到中正紀念堂散步也真好；所在開闊，樹仔也整理甲真媠。（閣會當揣人開講講話。）

伊講是啊，親像家己的花園；食飽就來行行咧，吹冷氣，看一寡仔活動。

看伊精神遐爾（hiah-ni7，那麼）好，我問伊高壽？

96。

哇！

伊講老矣愛健康，台北上海兩頭走，家己的生活攏家己發落。

我閣哇一聲。這个歲矣竟然飛來飛去，來台灣若行灶跤。

伊共我ui3頭看到跤，講，「你應該也有五十歲矣。」

共我看甲遐少年？我趕緊回答，「有有有。」

我共朋友講，「96歲了，目睭猶閣遮爾好，真無簡單！」

（彼也可能是老人的智慧啦，活到遮濟歲，對「看人減歲」的道理，猶會記得，閣較無簡單！）

2016.11.7《中華日報》副刋