生日，一家人食飯時，我共囝和新婦講想到家己的年紀，就會驚一趒（tiô）；平常時袂去意識著家己已經有這个歲。

為著「安」囡仔（gín-á，小孩）的心，我紲落（接著）講，「毋過，我猶毋免認為家己老，tsit-má（現在）凊凊彩彩（tshìn-tshái）就會拄（遇）著九十歲以上的人。」

故事是按呢：幾日前我和小妹坐公車，有一个行動無偌扭掠（liú-lia̍h，俐落）的阿婆上車，我斜對面一个頭毛殕殕（phú，灰）的查埔人隨徛（khiā，站）起來讓位；毋過我看著我的位對彼个行路一步一步誠困難的阿婆閣較方便，也徛起來。

阿婆就近坐好了後，我的小妹叫我去坐對面的空位，講彼位先生只是頭毛較白，猶未老。

這是真的，彼个人嘛笑笑，招呼我坐；我坐落來了後，心內卻無啥自在，佳哉妹妹邊的位真緊就空落來，我趕緊過去，共位還予彼位先生。

小妹講我敢若咧耍「大風吹」。　

殕頭毛邊仔的老人真有興趣咧看著我「來回走跳」，講台灣是誠有人情味的所在，伊蹛（tuà，住）佇香港六個月，坐車坐船毋捌（不曾）看過有讓位的；佇中國，閣較無這種習慣。

然後伊講，「我無方便讓位，我九十一歲矣！」

阮姊妹仔和殕頭毛先生同齊哇一聲，講看袂出來啊。老人穿百慕達短褲、球鞋，真有元氣的模樣。伊講佮朋友約欲食暗頓，然後欲去啉咖啡。我繼續褒伊看起來真少年，伊愈歡喜；為著欲證明無假報年紀，伊共頭殼頂的鴨舌帽仔掀起來。頭毛櫳 櫳lang（稀疏），有影較老相。

這个故事講煞（suah，結束），我的後生講，「伊哪會欲褪帽仔，敢會當看到年輪？」

（譯自兩年前的華文作品：他為什麼要脫帽？）