我的毛筆毋但（m̄-nā，不但）有夠用，閣有十幾枝囥（khǹg，放）佇屜仔底涼涼仔過日；毋過，聽著阿圓in幾个人欲去三重埔買筆，我也趕緊參一跤綴（tuè，跟）路。

上水墨課的時，有人需要筆，會拜託老師「讓」－－毋是賣，是照原價讓。老師一遍買規百枝，價數較便宜；逐家對老師買的筆也有絕對的信心。

Uì（從）老師遐讓來的小狼毫和小羊毫，隨在我烏白撇幾若年，攏無落毛；用甲變做平頭，免擲掉，提來皴山壁、畫松仔欉也真好用。

老師的筆就是共（kā，跟）這間店買的，in家己開工廠做筆。

這間店無算細間，毋過，筆、墨、墨盤（硯台）、紙和各種畫圖用品囥甲規厝間滿滿，行路都有困難。

阿圓in是熟似的顧客，後來老板tshuā（帶）阮去樓頂較開闊、有長桌仔的所在試筆。

會當一枝一枝隨便提來試，足歡喜。有人對一款筆佮意（kah-ì，中意），逐家就綴咧試看覓。一枝羊毫，毛特別瘦長，真媠，若趙飛燕；一枝筆的毛短短肥肥，浸水膨起來，敢若蒜頭，伊就叫做蒜頭筆。……

試來試去，每一款攏好寫，若毋是想著這是用水寫，一時會掠做（lia̍h-tsò，以為）家己的功夫變好矣。

除了我，其他五个人攏拄好（正好）咧上書法課，對寫大字的筆特別有感覺。我歇誠久無攑過大筆矣，雖然有想著屜仔內一千外箍買的毛筆猶有新的，嘛是綴人買兩枝。橫直佇遮買較俗（便宜），買起來囥也袂歹去。嘛向望日後我會閣練習寫字；書法家攏較長歲壽，寫字若練功，是真好的養生啊。

老板做筆、賣筆有三四十年的歷史，對字畫界真熟，啥人愛用啥款筆攏清楚。我買的兩枝，一款伊講是張光賓和吳品愛用的，「張光賓最近才過身，102歲；伊的告別式親像書畫的展覽場。」「吳品用這款筆寫字兼畫圖，伊毋但是刻印名家，花鳥也誠有名。伊嘛九十外歲矣，伊的學生對伊足好，逐禮拜至少一擺tshuā（帶）伊出去食飯。」

另外一款筆是書法家杜忠誥愛用的。

我的心理真幼稚，用名家愛用彼款筆，敢會較gâu（擅）寫、較gâu畫？

當然是無可能，毋過，感覺會提懸（高）in的身份，加減予我較看重啊。

看我遮爾認真聽，老板閣紹介一款筆，是張大千愛用的；較細枝，才兩百外箍，「當做禮物送人嘛真好。」

逐家選好，老板用刀仔共阮的筆刻字。我央伊刻的，一枝是「靜觀」，一枝是「心適」。

靜觀和我的名靜娟台語仝音；心適是趣味，這半工，開講，啉茶，試毛筆，買毛筆，是一个新體驗，確實真心適。落樓梯閣去店面時，阮紲落（接著）閣買宣紙、墨，真正是大豐收的下晡。

講起來，幾若年前，我買筆的初體驗嘛心適心適。彼遍，朋友報（指點）我去師大對面的書畫社；遐的物件足齊全，大小筆、宣紙、噴金粉的紅紙、畫譜和字帖百百種，攏予我看甲真痴迷。買好付錢的時，為著欲表示家己是有氣質、內行的文化人，我共看起來是頭家娘的婦人講，「筆墨的氣味真芳，做這款頭路足好！」

伊無啥表情，講：「後面咧tsuann（煎）中藥。」

原載2016.9月號《文訊》雜誌