明仔載有機會落雨。

uì（從）禮拜二到禮拜六攏有機會落雨。

佇電視新聞聽著這款報導，我就鬰卒。已經落 kui（整）個月的雨，中間kan-na（只有）一兩日好天；棉被咧欲（teh-beh）臭殕（tshàu-phú，發霉），人嘛欲生菇發木耳矣！閣較嚴重的是，落袂煞的雨影響果子、青菜的種作；做穡人叫苦，家庭主婦嘛為著青菜愈來愈貴唉唉嘖嘖。

毋過，落雨是天公伯的代誌，咱無伊的法度；聽起來予人閣較無佮意（kah-ì，中意）的是，新聞主播口口聲聲講「有機會落雨」。

有機會？機會一般是講正面的、予人歡迎的好代誌，毋是用佇負面的、莫發生較好的。伊有機會當選，伊有機會出國表演，伊有機會升做處長，是一般的講法；除了刁故意講帶刺、彎彎曲曲的話，敢有人講伊有機會落選，伊有機會予人拒絕出國表演，伊有機會袂升做處長？

雨季，上好是「有機會出日頭」；若是日頭赤炎炎一段時間，「明仔載有機會落雨」才是合情理、合文法的講法啊。

2016.6.29《聯合報》副刋