摧命聖手？No More~
大家都知，我係摧命聖手。龜、鴨、魚、狗、花等等，只要係有生命既野，最後都會好快死喺我手上；記住，係好快。
上次阿燕來澳時，帶佢去買怕醜草之際，自己都貪過癮買左盆玫瑰同一盆怕醜草。急不及待拎返屋企後，為佢地留低左第一張倩影，打算不久後做“遺照”用的。即係同朋友展示我曾經都種過花草時，都可以有張相睇下嘛。你同我睇清楚呢張相：當時玫瑰有三朵紅花；而怕醜草高度非常非常矮，只係比玫瑰個花盆稍高。
然後，有一日我同阿燕傾開怕醜草，我同佢講：死啦～我盆野好似就死咁！佢覆我話佢買返去後，係佢個擅長種植既老竇種，佢本人無乜點理，仲話盆野好健康。
呢個時候，除左怕醜草開始有好多葉轉為黃色外，盆玫瑰亦命不久矣。係，佢仲係有好多綠葉，仲係好茂密，但係三朵花都相繼凋謝。我諗起阿燕當初在暨大時的沙漠玫瑰從來都無開過花。我忽然覺得世界一片黑暗，人間毫無希望。原來我俾廿幾蚊買盆玫瑰，只係為左果三朵花，我亦唔相信摧命聖手既我有本事令盆玫瑰在有生之年再開一次花。三朵凋謝到變黑色既玫瑰花俾我一一剪左落黎，剩低一盆淨綠色既玫瑰，加一盆變黃的怕醜。唉，都已經日日淋水架啦～仲係咁～心都淡埋呀。
然後，世界開始出現曙光。禿頭玫瑰開始出現花蕾，雖然我家毛毛曾經睇死我，話：“都唔知開唔開得成”。不過，最後唔單止開得成，仲一個花蕾接一個花蕾咁生，最多時足有五朵開得燦爛既玫瑰，仲有一個含苞待放既花蕾添～幾驚佢一發不可收拾咁生落去呀！
就係呢個時候，怕醜草雖然經歷過一場暴風雨，纖細既身軀開始傾斜，但係原來佢食左增高丸，不知不覺高到我怕佢頭重腳輕會跌親。唔信？你細心D睇清楚，佢既高度已經由玫瑰個盆躍升至幾乎與玫瑰一樣高，真係嚇親我。（圖中所見既粉紅色愛的淋花壺係毛毛送架！）
再然後，雖然毛毛平時主力佢兩個寶貝女（大細bon~龜），唔多得閒理我果兩盆野，但其實佢成日會問我淋左花未。仲話怕醜草大個仔啦，要換盆，於是我地兩個一齊去Daiso為怕醜草買左個新居，佢終於唔洗用一式一樣既膠盆。呢個打得爛架，望落去真係好鬼死靚。我話怕醜草折腰，毛毛叫我用條繩固定下佢地既位置，最後變左咁既樣～好靚仔好健康呀～
(我係咪好正呀？～～)
to 布甸小狗
佢已經唔係一棵草．．
係一棵樹
布甸小狗
GOODGOODGOOD....怕醜草竟然可以生到如此的高呢~~~~可喜可賀.....
to Desert Rose
今次果然坐言起行..抵讚
Desert Rose
有呀,你仲用你手提幫我影低,仲幫佢改左個名”逆插玫瑰”添,睇嚟我要為佢寫一篇網誌先
to Desert Rose
一個月唔夠咁短命?嘩..睇黎摧花聖手個朵應該過俾你喎~
有咩?有開過花咩?係咪你地寫論文期間既事?如果唔係點解我無見證過呢個鐵樹開花奇跡?
to gypsyho
???
佢地依家好茂盛喎...
我無謀殺佢地喎~
to 我相識的人
咁鬼馬既你~
to 蜜瓜味
其實..係無乜特別意思..
我個fd話寫得搞笑..
我就諗係咪因為係用廣東話寫..
無咁文皺皺囉..
Desert Rose
睇完呢篇裝誌後,我有兩樣野要回應同澄清
第一,我棵怕羞草已經魂歸天國......好似種左唔夠一個月......你棵怕羞草真係好高大靚仔呀
第二,我棵沙漠玫瑰係有開過一次花架!有相為證架
你相識的人
恭喜,開花結果了.正如你的人生一樣,努力阿! :>
蜜瓜味
我想問，你話好稀奇咁用廣東話寫文章，咁之後呢？到底係咩意思？我見你個ｆｒｄ又冇濕你，之後你自己又冇解畫，唔通得我唔明？？
to 水月
謝謝啦~
不過你到底是多久沒來了?
人家用了九年了..
昨天還打算換耶~
有沒有看到我一副埋怨的表情?
水月
正!
我喜歡你版頭的網誌名: 時光飛逝的沉澱
to 風鈴草
好~作為佢主人既我..可以解答你既疑問..
答案係:水...水...同埋水...
所以你以後淨係飲水好啦..知無~?
to 天澤月
咪就係囉~嚇死人咩~
to 紫軒
有呀有呀~我成日玩佢架..
不過玩完一次要好鬼耐先開返..
佢咁保護自己..我無理由再傷害佢..
唯有玩完一次就收手
風鈴草
嘩~不如你幫我問下佢食D左咩高得咁快~等我高返小小都好丫MA~哈哈~
天澤月
你棵草果然一發不可收拾呀
紫軒
你寫得好搞笑啊~哈哈哈~~
你好叻啊!!兩盆都好靚喔!
咁你有無同棵怕醜草玩啊?
to GG
無咁好彩卦..
區區兩棵盆栽變森林?
咁睇黎要叫同事採訪下我先得啦喎
to WING
哈哈哈既時候..
有無發現..
呢篇文章好罕有係用廣東話寫架..
有機會我都想帶你上黎睇下靚仔..
但佢屋企成日都有人..
搞到我怕怕...
GG
一陣變左森林就大件事
哈哈
WING
哈哈哈你既一句’’一發不可收拾’’笑死我啦..哈哈
係WO..真係好靚仔WO,唔通係你毛毛偷偷喂佢食左增高丸既..
我又要去探下靚仔WO....
P.S.燕..你好懶呀,不過我都知你好忙啦..嘻嘻))))
佢已經唔係一棵草．．
係一棵樹