一瞓醒就已經成下午點幾了，嘩～好滿足呀～可以瞓到十個小時，都唔知幾耐無試過可以十點後先起身．．．
一睇手機，嘩～～Birthday message！多謝你地

當我梳洗完一輪，我家姐同媽媽就來玩我了，佢地兩個每人攞左一件包好左的小禮物比我，阿媽份係一條手媡，不過我一睇就覺得熟口熟面，好似係小時候的一條手鍊，我問媽媽係唔係我細個個條鍊，佢好認真咁同我講：“梗係唔係啦！”我“R”晒頭！！“下．．．下．．．下．．．”，就係我當時只有的反應．而我家姐就送左條好幼的光身銀頸鍊比我，條鍊就有個牌仔寫住Anna Sui，就係得咁樣一條鍊，好似應該仲有吊咀，無理由Anna Sui會係咁簡單的．比人玩到“R”晒頭，都唔知咩事～～因為我今年完全無諗過會有咩攪，心理上無準備會比人玩（好似上年咁同我係屋企玩尋寶）．．．所以我無點理到佢地的整古．

佢地見我無咩反應亦都唔玩我了，轉個頭返入房又有多幾盒野係床，我續一將佢打開，第一樣係之前家姐送比我的Anna Sui 頸鍊的索袋，第二樣就呢條頸鍊的閃閃蝴蝶吊咀同皮繩，原來條鍊咁配襯的．．．第三樣同第四樣都係有關係的，就係之前係Just Diamond睇中的Mickey鑽石系列，一對ear ring，第四樣就係一條Mickey手鍊，簡簡單單幾靚ga．我完全無諗過會有Anna Sui 的飾物，更加無諗過會有呢兩樣Mickey的鑽石系列，因為之前係話賣晒唔返貨，點知家姐就係咁古惑，神神秘秘～～呢兩樣就係我第二同第三樣的鑽石飾物（第一樣就係上年８月１５媽媽送的介子）

至於媽媽好似仲未玩夠咁，佢比左一盒方形的禮物我，仲同我講係護膚品，打開花紙一睇，係Biothem的non-stop系列的紙盒一個，搖下搖下，聽到有聲，打開盒一睇，做咩D化妝棉係度ga，仔細一睇，嘩～原來係一條Anna Sui的手鍊呀～～呢條手鍊有好多吊飾扣係上面，係我之前係雜誌入面睇到介紹的，我仲將呢張紙撕左出來Keep起佢，因為條鍊實左太貴了，完全無諗過會擁有，嘻嘻～～太靚太靚了．．．

至於今日的活動，就係去探我家姐一個生左個BB女的朋友．本來今日都有朋友約我出去的，但我只係想懶洋洋咁過～～

到左夜晚，就同屋企人去紅磡食鼎泰豐食小籠包，都有一斷時間無去食了，而家仲有豆沙小籠包，不過我覺得古怪左D囉．．．食完飯就去左UNY，行左一陣就去左家姐朋友屋企，食生日蛋糕許願，而且仲有最後一份禮物（家姐朋友送的），一部桃紅色的colorsplash，呢部機最好用來玩Slap Shot，我仲知呢個桃紅色係書展個時先出，yeah～～我最鐘意的顏色，我最喜的隨意影～～

食完野拆完物，再玩埋EYE TOY２，今日比我有一個大發現，原來EYE TOY2係有一首麵包超人主題曲ga～～正呀～～～