今日已經係4月3號, 距離我上戰場的日子只餘數天了, 依家o既我梗係準備緊糧水, 戰鬥工具, 好等我可以將敵人逐一擊破, 免於戰死沙場.
所以, 如無意外, 今次都應該係我last一次同大家分享我心情生活了, (4月25號前last 一次) 下一篇應該係會好開心o既, 應該係講我已經打完仗, 凱旋回歸, 我一定sure win o既!!!!
依個禮拜, 成個人都痴晒根呀! 朝朝晨咁早起身去爭位, 好似d阿公阿婆咁, 晨早排隊輪米咁~ 自修室囉~ 座位有限, 7點鐘開始可以用會員證排隊, 為o左坐個好位, 大家都不惜晨早, 天未光就開始鬥囉~ 八點半先開門ga, 初初8點三去到都仲有位, 點知人越o黎越多, 大家就越o黎越早, 救命!!!! 朝朝六點幾起身, 拎完張證去仁愛堂, 就去食個好耐o既早餐, 八點半先番去奮鬥~ 好彩有肥茵同埋阿慧陪我咋, 又好彩我溫得唔錯咋~
依個禮拜都抽o左dd時間睇戲, 包括有:<<精武家庭>>, <<見鬼10>>同埋<<哈爾移動城堡>>.
<<精武家庭>>都唔錯o架, 阿嬌打得好正, 好型呀, 搞到我都好想打埋一番, 即刻壓下腿先~ 阿sa雖然係客串, 但係佢都好出, o個句:"悶唔悶呀?" ..." 好, 夠鐘!" 都幾出~
至於<<見鬼10>>, 都幾無謂, 好地地幾個後生仔明明勁驚鬼, 都要玩見鬼, 真係自討苦吃, 有時幾驚, 但係有時都好好笑ga~ 最掃興都係坐我前面o個幾個o靚仔, 鬼咁嘈, 係咪都笑, 好鬼討厭, 好disturb我囉!!! 我忍唔住串o左佢地一句囉~
<<哈爾移動城堡>>, 好好睇呀! 真係好creative, 天馬行空o既構想真係好正!!! 好多角色都好討好, 又好有意思: 反戰!!!! 最正梗係因為我睇日文版, 木村配音呀! 一開聲真係殺死人~ 聽把聲我都就咁俾佢電暈lu.......
我唔係剩係掛住睇戲o架, 我溫書時溫書, 娛樂還娛樂o架~ 我好專心咁溫o左好耐書先去娛樂下o架咋~ 對得住自己o架~ 你地唔好鬧我呀!
另外, 我o係自修室鍾意坐近window o個d位, 近陽光多d嘛~ 成日係咁溫已經好疲倦, 想吸下陽光o既正能量嘛, 點知我附近o個d人成日都走去落curtain, 大佬呀! 發毛o架喇~ 就o黎生埋蜘蛛o架喇~ 你有未呀??
好喇~ 係咁啦~ 我閉關練功喇~ 你地都要俾心機呀! 知嘛???
唔駛太掛住我, 廿零日好快過o架咋!!!!
byebye~