呢個禮拜都繼續冇咩心情，返工又日日有大鑊嘢發生，唔係呢間廠話趕唔起 D 貨，就係嗰間廠做錯嘢。搞到有兩日成 10 點至返，於是即刻俾人照肺：哩唔可以以為自紀辭咗職，就可以日日塞典鐘至返喎﹗哩係冇特虔架喎﹗我邊度有話自己有特權啫，一直以嚟都係你自己講之嘛﹗真係蝕錢蝕到你矇咗喇﹗我都費鬼事啋佢，而家我得閒就走去搵裝錶師傅傾計，又打電話俾同我一齊搵緊工既前日文同學，係咁煲電話，哼﹗理得佢吖﹗

上星期四，睇完 YAHOO JP LIVE TALK 之後，發覺自己既日文真係…呵呵呵﹗竟然聽得明喎，仲要明大概 90% 以上添﹗而且剛剛又收到商業日文試既准考證，雖然商業日文會難過日常日文，但係我諗都會幾好成績…啩﹗（<-留個後著俾自己先）之後搵工又見到有份 Purchasing Clerk，click 入去至知原來係日本公司嚟，喺九龍灣，14 個月糧呀~~~返五日呀~~~但係個 post 唔駛講日文，同埋已經登咗成個禮拜添，不過我都照樣 send resume 過去，搏下都好啦﹗跟住又 send 咗 resume 俾另一間 Agency，第二日冇收到九龍灣電話，反而呢間 agency 就搵我，叫我聽日（29/5）下晝上去，於是我已經同同事講定，聽日唔鬼返喇。今次我會背熟 D 英文喇，我唔想再衰喺呢方面。唉﹗都總算係好消息啦﹗

背景講述：因為我好唔開心，於是收埋自己入去公仔裡面，剛剛 w-inds. 嚟咗企喺我旁邊拍嘢，我見到佢哋，但係佢哋見唔到我…

私：…嗚…
涼平：（向慶太、龍一細聲講）喂﹗你哋聽唔聽到有 D 怪聲呀﹗
慶太、龍一：（你眼望我眼）冇喎﹗你係咪未瞓醒呀﹗
私：…嗚…
涼平：（向慶太、龍一細聲講）啊~﹗又嚟喇﹗又嚟喇﹗
導演：各位準備，5、4、3、2…
涼平：（望住公仔）係咪呢度呢﹖（望入嚟）有冇人呀~﹗
私：唉﹗涼平小朋友，節目開始咗喇﹗（笑）

咁就俾人影咗張咁既相喇﹗（哈）