14:00起身，就同父母去東匯飲下午茶。

之後就搭火車去沙田希爾頓剪頭髮，個髮型都幾得意，但要keep就要日日吹，所以都應該會放棄。

漫遊西田，個超市好過以前好多，空間好闊，但都被人填滿。
去百佳搵電鬚刨，但搵唔到。想試小肥羊唔辣湯包煮o既羊肉片，但我無能力同一眾家庭主婦逼，所以希望未來有機會試食。本來想買鹽焗雞腿，但為o左放便，所以改為買o左3個菠蘿包，一路食一路行屈人寺同萬寧，都睇唔o岩電鬚刨。
國美同豐澤已經有我想買o既聯想3000Q電腦，仲會免費有碟升級到Vista，不過我想佢減少少價，或升級到2G Ram先買。（最重要係無$$$……）
新城市棵紅色相機聖誕樹幾得意，聖誕老人巡遊都幾過癮。
「這裡是人，那裡是人；都是人！」花潮o既一幕，新城市都出現；但奇在當我去火車站o果陣，由零食物語出o黎o既蚊o係我前面行過？！？！？！如果佢唔係只顧住睇佢手上面o既粉紅色馬餾盒向前行，而頭部微微向右上方移動，就已經會見到我企o係佢面前，10cm距離都無……

搭火車去旺角，先去實惠取時富送o既地鐵單程車票，再去搵新世界寬頻sales登記。佢地用Netvigator個network，但個月費比我全新裝Netvigator平，最抵死係到時由PCCW師傅上門幫我裝機。
去朗豪坊間Pappagallo買千層芒果古古力蛋糕，如果無酸芒果就非常好味~

行返屋企時，發現自己唔記得o係西田睇電鬚刨……