真的好攰，好辛苦！生活係困惑、焦慮同忙碌之中，我雖然可以承受，但係更加討厭呢種生活！

忙碌同焦慮我唔想多講，畢竟呢條路係自己揀ge。已經漸漸明白，過去左ge野，點後悔都挽回唔到，不如試下感恩，搵下選擇呢樣野有咩好處仲好過。而且，好多人都會經歷最焦頭爛額ge 大一生涯，過左去，應該會見到光明啦掛。
不過，最令我受唔到ge，係一次又一次對於人情世故ge困惑。

人地話生命最堅強亦都最脆弱，友誼又何嘗唔係？生命ge堅強同脆弱，至少可以靠自身意志力去維持；但友誼仲加不堪一擊，比玻璃更加易碎，因為唔係你自己一個就話得到事。細細個建立起ge友誼，一定最最堅固，地基夠穩，了解夠深，大家心照不宣，互不猜疑互不妒忌，友誼第一利益第二。中學時期可能會有少少變質，但至少大家未踏到社會，學校同班裏面都依然好團結和諧。
一入到大學，就完全唔係果回事。爾虞我詐、勾心鬥角，一有利益衝突就可以形同陌路。唔通真誠同純真一d藏身之地都冇咩？我唔蠢，我知道一定會遇到d咁ge事咁ge人，將來出到社會遇到ge不平事同不滿ge人亦都會更多，但係我唔想連朋友都做到呢種地步！同果d人相處係冇問題，但我絕對接受不到佢地成為我ge朋友。我要求好高咩？都係想大家真誠d je，但點解我會覺得我越黎越o係心裏面同某d人疏遠ge？可能呢d咪叫相見好同住難囉！習慣唔同，語言唔同，追求唔同，通通唔係問題，價值觀唔同，i'm so sorry，道不同真係不能相為謀。
擦鞋、巴結等等，我都已經嬲左好耐，嬲到唔想再對呢樣野做評論，嬲又冇用，盞激親自己，唯有逼自己習慣左佢，當睇唔到囉。點知，我辛辛苦苦寫出黎ge野，partner一個唔該，揀晒d好著數、對佢有利ge部份，揀完先俾返我。唔好當我咁戇居好冇？我唔出聲唔代表我唔知，我忍你咋！你仲要扮冇野，我同你講，你火候未夠，你"gat"起條尾我知你想點啦，語氣我都聽得出，睇得到！本來對佢，我只係有d睇唔過眼，原來我都係睇每個人睇得太簡單太善良。最後一次，今次合作一定係最後一次。好彩，我夠班，我仲有實力ge渣拿，唔會衰得過你。過左暑假大二分左專業，我寧願少個朋友，都唔想又整到人地偷笑，自己一個白白痴痴咁唔開心，因為自己在乎。
人情世故，我真係真係仲有好多野要學，可惜呢種學習，呢d困惑ge解決，只會令我越黎越唔真，越黎越冇熱情，越黎越要戴住面具做人。

好攰.......好想快d返屋企，好想可以放鬆自己...................

- 2008年6月12日 -