最近去新生代開會班友仔失驚無神會搞笑又無端白事討論鬼咁正經嘅問題，其實開會好唔好玩，真係一時一時，人齊就容易好玩，人少就可以好悶，鬼唔知咩，時下小朋友仲忙過大人，一星期一次，十幾廿人開會，次次開到會都係一個奇蹟。

於是每周開會都用開心態度啦，談談題目吹吹水，我做編輯，都係建議題目，分分工，改改稿，有機會就同大家討論吓，有時間當然又玩吓，個態度就緊係唔當係工作啦，本書keep住出到，d內容又係大家努力成果，雖然排版設計仲係爭d爭d，不過算係咁啦!盡咗力啦!有時低能到認為無脫期，次次順利出版已經係勝利，係呀，業餘季刊，做到三十六期，期期有新料，又專題又街訪又調查又訪問明星，無停過，落手落腳做嘅都係班有心嘅細路，個個星期開會，我有時都學好多嘢，係呀，我係老咗，人過三十，真係唔知十幾歲嘅人仔做緊咩諗緊咩，不過做本雜誌又真係令我keep到青少年最新動態，呢d咪叫苦苦掙扎囉，我都唔想脫節呀，我見過好多人上咗年紀就只會懷緬過去同睇唔起後生仔呀，我後生時答應過自己唔會做呢種人。

搞本雜誌，最重要係，本書出街會好開心，正所謂“生仔咁開心”呢!每三個月生一次，開心到呢！

今期封面專題講校園暴力呀，訪問型仔張孝全呀，悅書房老闆娘講閱讀，仲有介紹澳門塗鴉藝術發展呀，澳門人寫澳門事，唔係好專業，不過做得有無心機你自己睇啦，行書店同報攤見到有，就買本睇吓啦！睇完覺得好又好唔好又好，都比d意見啦，我哋肯聽人講呀，後生仔有咩唔怕講，改到嘅我哋都會改。

毫無疑問，呢篇係一則廣告啦！多謝你睇到呢度。