有些說話，若由劉華說出來，我會冧爆；若是情人，我會覺得有點核突但會欣然接受，只要不是慣性；但若是由一個素未謀面半秃頭仲要cam cam哋嘅中佬說出來，在正常情況下，我會當場暴斃。

由於工作關係，認識了一個「半秃頭仲要cam cam哋嘅中佬」，雖然只是合作一天的工作伙伴，但礙於我的工作報告或多或少會對他的工作造成影響，所以他對我的過份客氣亦可以理解，但理解不等於接受，而且凡事要適可而止。當我聚精會神地翻閱文件時，他不時問：「進度良好嗎？」、「咁遲都唔食飯，會餓壞身子！」、「覺得焗嗎，冷氣壞咗，已經叫人加緊維修」……我已經以最禮貌的語氣叫佢死開無數次：「有咩需要，我會搵你，唔阻你做嘢啦！」，他就是死心不息，還要以他那陰陽怪氣的聲線跟我說過不停，這種另類熱情實在叫人吃不消。

有一次，我們一同走出辦公室，他走在前面，卻沒有將那道門完全推開，跟在後面的我，差點被那道會自動關上的門撞到，我反射性地慘叫一聲「唉吔！」並再次推開那道門，他(記住，係半秃頭、cam cam哋、陰陽怪氣嘅中佬)，無厘頭的回頭說：「唉吔！你放心，我唔會dum低你唔理你，傻豬嚟嘅！」。當時，我沒有即場暴斃，而且還能鬆容不迫報以微笑，然後若無其事的繼續工作，我對於自己處變不驚的能力評估又晉升一級。