幾鍾意我呢個舊日記，等我cap番出黎，不時睇下先
果時真係好無聊呀我，個日記食晒上堂d Dr.既口頭蟬呀，成日講既野呀，教既書呀，仲有果期熱門野：女子十二藥方、靜心、儲印花、好心好報...
好得

******************************************************



2004 年 02 月 04 日 星期三 【寒冷】




自從組左band之後，日夜擔心會一炮而紅，因為會影響我既學業嘛
又驚比而家d狗仔隊跟喎，要練下點應付d傳媒先得
所以呢，就整左個模擬"撈騷"訪問了，等自己練習下，到時唔會比人問到口啞啞

*******************************
主持：各位好，我地今日星之勿語請左隊樂壇新進組合---「羅阿方周」黎做訪問
羅阿方周：主持人你好~

主持：好，請你地介紹一下你地隊組合丫~
羅：(close up，左下方出現姓名、生日等個人資料)我姓羅。(三秒鐘，講完。沉默。)
阿：(同上，熱情如火，熱過戈壁沙漠)我叫阿花，又稱so so 王，最叻就係so so...(忽然招手)喂~Hi~！(原來錄影期間有fd行過，打個招呼，果然夠晒so so)呀，我頭先講到邊？呀係...(下刪四千五十八個字)
方：(同上)我係高貴典雅既方太...(唱)我決意愛他，祝我愉快吧...黎neway，唱好k~！
周：(陶醉，國語rap，含糊)我不是葉惠美，但我是周太

主持：(呆...)哦，好，咁點解你地個組合叫「羅阿方周」呢？
阿：我地每個人既名各取一字，好似「挪亞方舟」咁，大家同舟共濟，共度時艱，香港人，努力呀！

主持：而家咁多組合充斥樂壇，咁你地響樂壇既定位又係點既呢？
周：(堅定)我地樂隊決定走左派偏右，有中國特色既社會主義路線

主持：(滴汗，左額上方有黑粗直線數條)竟然係咁...咁你地既目標又係點既呢？
方：我地要撼低曲奇，我要打低stephy，爭番方生！(激動)
阿：又或者進軍日本，撼贏「女子十二藥方」亦得，得左。
方：我地仲要開巡迴演唱會，首站菲律賓，沿越南、老撾等地上北極，最終目標係火星。

主持：咁可唔可以介紹下你地既同名專輯---「羅阿方周」？
周：我地第一首plug上台既歌係同名歌，「羅阿方周」，等大家認識我地多d。然後我地四個每人有一首熱播主打，以時間換取空間，務求打入各大電台流行榜。首先派上台既會係羅生既「我不會唱歌」。
羅：我唔會唱的。
周：(補充)呢首歌會因應情況而定，以「數白欖」或者默劇既方式演釋。
羅：(強調)總之我真係唔會唱的。

主持：(訝異)er...咁下一首呢？
阿：食住「女子十二藥方」個勢，第二首個人主打就係我既「世上唯一的花」(手語版)，旺角街頭熱播中

主持：唔，我相信各大電台都好樂意播你地既個人主打...
方：實播啦~唔爭在播埋我首「好心好報」(唔唱版)啦不如。個MV係我老公食左我煮既飯，肚痛響床度典來典去果陣拍架，真係有血(from煮飯時)有淚(from方生，欲哭無淚)。

主持：咁周太呢？大家都有個人作品，你果首又係咩？
周：(遲鈍)...未...諗到....暫時...未有。
主持：(吃驚)下，乜你地隻碟唔係出左喇咩？
方：(搶答)係呀，到時周太諗到出乜歌之後，我地會將首mp3 up上網供人非法下載架喇，唔駛擔心~

主持：除左個人作品，你地既碟仲有咩selling point?
阿：(認真)第一個selling point就係，我地係全港首創以出"紙碟"代替出CD，以杜絕"非法燒碟"既行為，保護我地既知識產權。同埋為左配合我地既路線，我地隻碟入面將會有幾首歌以歌頌我地既恩師，例如「珠姐，你好野」、「歡樂年年」、「suki suki suki」、「1979」

方：為左令隻碟更抵買，隨碟附送我地精心創作既「靜心三百首」，正所謂「熟讀靜心三百首，不搞爛gag也會嘔」，大拿拿三百首，仲抵過百佳儲印花換pan pan呀，肯定吸引唔少師奶同行搶購呀，幾擔心斷貨呀真係，不如我地自己儲定d要黎炒啦...

主持：好了，時間差唔多了，你地仲有咩講？(心諗：唉，好囉，終於做完訪問，呢幾兜友都痴既，紅硬啦...實)

方：(無知)希望我地半年後響紅館開演唱會果陣唔好咁多人黎啦，你知啦，紅館設計到好似倒正方錐體咁，我驚太多人去，個底支持唔住，會?。有咩傷亡就無謂啦~

主持：哦，咁呢層我相信你地唔駛擔心...(心諗：因為唔覺有人會想去睇)好多謝「羅阿方周」接受我地既訪問，下次星之勿語時間再見啦

~模擬訪問。完~
********************************

後記：小妹榮登「聰之日記特約：二月一日超無聊排名榜」既第七位，相信呢篇訪問出街之後，可望坐直升機，躍升上頭三位...