◎所謂臺語文

　　　　　　　　　　　　　　　　　　　　　⊕潘文良

　　陳俐雯（Soliner Chen）小姐，最近寫了一篇題為《台文四界有華語的影》的文章。
　　文章題目，看來著有「問題」——應該是《臺語文四界有華語詞的影》，按爾則正確。
　　呵呵！又佫是一個‥語言佮文字，混雜不清的人！（抑是伊故意混雜不清？）
　
　　俗語講‥「魚還魚、蝦還魚。」
　　所以講‥語言還語言、文字還文字。
　　看來，有一寡人，真正「戇戇分𣍐清」（傻傻分不清）‥「語言、文字」的差別！簡單舉一個例，比如‥
「國語」兩字，若讀作〔ㄍㄨㄛˊ　ㄩˇ〕，即是國語〔ㄍㄨㄛˊ　ㄩˇ〕。
「國語」兩字，若讀作〔ㄍㆦ'ㆶ　ㆣㄧˋ(漳)∥ㄍㆦ'ㆶ　ㆣㄨˋ(泉)〕，著是「台語」〔ㄉㄞ├　ㆣㄧˋ(漳)∥ㄉㄞ└　ㆣㄨˋ(泉)〕。
「臺語」兩字，若讀作〔ㄊㄞˊ　ㄩˇ〕，即是國語〔ㄍㄨㄛˊ　ㄩˇ〕。
「臺語」兩字，若讀作〔ㄉㄞ├　ㆣㄧˋ(漳)∥ㄉㄞ└　ㆣㄨˋ(泉)〕，著是台語〔ㄉㄞ├　ㆣㄧˋ(漳)∥ㄉㄞ└　ㆣㄨˋ(泉)〕。
　　按爾，應該是誠容易理解，「語言、文字」的關係吧！如是‥
共一種語言，會當用各種文字（各國文字），去書寫；
共一種文字，也會當用各種語言（各國語言），去讀講。
　　一個「精通」英文、中文；美語、華語、臺語、客語的人——
看著一篇英文文章，也聽好直接翻作「華語、臺語、客語」，去講出來。
看著一篇中文文章，也聽好直接翻作「美語」去讀。
看著一篇華語文文章，也聽好直接翻作「臺語、客語」去讀。
（一般人，「功力」無夠，也只好將「英文文章」，先翻成「中文文章」，
　則會當用「漢文字語系的語言」，讀得順口。）
　
　　所謂「白話字」，其實也只是用「羅馬拼音符號」，做為「台語」的「記錄文字」，去書寫而已——日本的片假名、平假名；著算韓國的「諺文」，其實也會當用來作「台語」的「記錄文字」。（如《臺日大詞典》。）
但既是「漢文字語系」的語言，用「漢文字」去記錄，當然抑是較適當！
　　用「羅馬符號」去「拼音」，當作是「文字」，書寫（記錄）臺語，敢著較「高級」、較「高尚」？　有一寡臺語人，煞棄嫌家己祖先，所留落來的漢字，一心想要擺脫「漢字的束縛」，而主張廢除漢字，全面用白話字——
臺語人，應該著愛家己，去創製一套文字，則真正有「尊嚴」啦！
使用外國人的物件，也只不過是一個‥「崇洋媚外」的「慕洋人」！
　
　　啥是「臺語文」、啥是「華語文」？啥是「華語式，臺語文」？
　　「漢文字語系」的語言，一向是以「漢文字」，做為記錄的「載具」符號。
譬如「唐詩、宋詞」，乃以「漢文字」書寫，所以‥
臺語人，會當用臺語去吟唱；
客語人，會當用客語去吟唱；
華語人，會當用華語去吟唱；
粵語人，會當用粵語去吟唱——
共款的文字，會當用各族群，無共款的語言去吟唱。
　　你講‥如是「唐詩、宋詞」，到底是啥麼文？
是「臺語文、客語文、華語文」，抑是「粵語文」？
　
　　所謂「華語字詞」，當定義為‥華語人所創製的字詞。
　　所謂「臺灣字詞」，當定義為‥臺語人所創製的字詞。
　　若講「客語字詞」，當定義為‥客語人所創製的字詞。
　　「定義」若無清楚，有人著會「混水摸魚——打迷糊仗」。
　　呵呵！只是‥無論「華語人、臺語人、客語人」，乃至「日本人」——
攏是用「漢字」，創製字詞啊！（當然啦！有一寡「白話字」的「孝子」〔擁護者〕，一心只想要擺脫「漢字」的束縛——所以漢字詞，呣知要用佗一字寫的時陣，著用「拼音作字」來解決。）
　　漢字詞，真大部份，攏是「漢文字語系語言」的「共有資產」，但各族群，總也會有家己的「私奇」字詞，比如‥
臺語人，會用‥㐾、㑑、𣍐、呣等等。
客語人，會用‥𠊎、細妹、按靚等等。
粵語人，會用‥渠、啲、唔等等。
或者是共一種意思，用無共的字詞去表示；著算共一個字詞，也會有無共的意思。比如‥「客人」，華語是「賓客」的意思，但也是「客家人的別稱」，而臺語只是專指「客家人」，若是「賓客」之意，謂之「人客」。
　　所謂「用華語咧寫」，當作「用一寡華語的語法（講法）咧寫」，比如‥
臺語是講「風颱」，文中寫作「颱風」；
臺語是講「人客」，文中寫作「客人」。
臺語是講「棄嫌」，文中寫作「嫌棄」。
臺語是講「講故事」，文中寫作「說故事」等等。
雖然語法（講法），有淡薄仔差別，用無共的字詞去書寫，但大部份的字詞文句，其實攏是「漢文字語系語言」的「共同資產」。
　　臺語字詞，分為文音（讀音）、白音（語音）——
文音（讀音）用於讀書、吟詩等，所對的，即是「書面文」（文言文）。
白音（語音）是一般生活上的口語，所對的，著是「白話文」。
文言，是經過文飾的語言；口語，是淺白易曉的語言。比如‥
　　　　「繁忙」是文言——「無閑」是口語。
　　　　「知道」是文言——「知影」是口語。
　　　　「不用」是文言——「呣免」是口語。
　　　　「不可」是文言——「𣍐使」是口語。
　　　　「不勝」是文言——「擋𣍐牢」是口語。
　　現代人，「文言」消退，「白話」當道盛行，所謂‥
「我手寫我口——口裡怎講，手裡怎寫。」
　　文言佇生活上，只是較少用，但也呣是𣍐使用！
　　有一寡臺語人，大概是去予「國語教育」，教𠇺「腦筋相佩、頭殼歹去」！
只要是生活上，較少用著、較少講著的，都講‥
「遐是『華語』啦！臺語，無人按爾講！」
如是呣𧧸「文言、白話」差別，將家己會當使用的「資產」，攏總送送予別人去！
聽著實在使人，也好氣、也好笑！
（其實，每一個時代的「白話」，也有所差別！
　今人看古人的「白話」，有的用詞，便也如同「文言」一般；會當講‥
　文言詞，若是較踥用，便有如白話；
　白話詞，若愈來愈少用，講出來，別人聽無，也會被當作是文言。
　簡單講‥若是家己較少聽著的、聽無的，都當作是文言——是「華語詞」。）
　　如「陰森、終於、幹練」等詞，存在幾百、幾千年的語詞——
用華語講，著是華語；用客語講，著是客語；用粵語講，著是粵語——
是安怎，臺語人，用不得、不得用？
　
　　啥是「華語的暗毒」？此乃心懷「瞋恨」之言也！
　　「臺語、客語、華語、粵語」等等，其實攏是「漢文字語系」——
彼此的關係，呣是親兄弟，嘛是堂兄弟、表兄弟、遠房的親情兄弟！
　　「語言」是「交通」（交往、溝通）的工具，若會當「互相尊重」，那麼彼此著「好講話」。
　　若是想要推廣臺語——要向全世界的「華人」（華裔，如華語人、客語人、粵語人），乃至「聽有華語」的外國人，去推廣臺語，
那麼‥「華語」著是「交溝」（交往、溝通）的媒介工具！
臺語人，呣𢓶因為無聊的「政治意識形態」，而將「華語」當作是「仇敵」！
「華語」會當是可運用的「資產」，呣𢓶戇戇，將伊當作是「負債」。
　
■台語註解
【國語】ㄍㆦ'ㆶ　ㆣㄧˋ(漳)∥ㄍㆦ'ㆶ　ㆣㄨˋ(泉)
　　　　kook4~8 gi2(漳)∥kook4~8 gu2(泉)
　①國家統一使用的標準語。
【臺語】ㄉㄞ├　ㆣㄧˋ(漳)∥ㄉㄞ└　ㆣㄨˋ(泉)
　　　　tai5~7 gi2(漳)∥tai5~3 gu2(泉)
　⊕臺灣閩南語。泛指流通於臺灣地區的閩南方言。
　
■相關連結
◎陳俐雯《台文四界有華語的影》。2022.04.28.四　13:40:00
　https://www.peoplemedia.tw/news/762b1061-d8ab-4d78-9ee7-abb48d80ef80
　https://www.facebook.com/groups/kuapiking/posts/5412287308815570/
　
■相關文章
◎潘文良《臺語字詞海更新之三》
　https://mypaper.pchome.com.tw/avun01/post/1380374275#◎臺語字詞海更新之三
◎潘文良《論國語》。2021.11.25.四　11:30:00
　https://mypaper.pchome.com.tw/avun01/post/1380817531
◎潘文良《何謂華語》。2022.04.26.二　12:00:00
　https://mypaper.pchome.com.tw/avun01/post/1381066456
◎潘文良《所謂河洛話》。2022.04.28.四　10:00:00
　https://mypaper.pchome.com.tw/avun01/post/1381069836
============================================================
※本文首舖於「新聞台。潘文良著作集」。
◎潘文良《所謂臺語文》。2022.05.03.二　10:31:57
　https://mypaper.pchome.com.tw/avun01/post/1381076864
※本文佈告於「臺語學院」。2022.05.03.二　10:33:00
　https://www.facebook.com/groups/978821105480673/posts/5708666025829467/
※本文佈告於「臺灣話資料交流所」。2022.05.03.二　10:41:00
　https://www.facebook.com/groups/434167333333483/posts/5070483973035106/
※本文佈告於「母語教學網」。2022.05.03.二　10:42:00
　https://www.facebook.com/groups/317918739507276/posts/680445189921294/
　
■標籤：#題目 #問題 #語言 #文字 #混雜 #故意 #國語 #臺語 #客語 #華語 #白話字 #尊嚴 #定義 #創製 #推廣