◎所謂國語

　　◎自大一點著是臭

　　　　　　　　　　　　　　　　　⊕潘文良　撰

　　有人講‥
「華文教出的‥驚Ｘ啦、怕Ｘ啦、嚇Ｘ啦、畏Ｘ啦、懼Ｘ啦、悸Ｘ啦、怖Ｘ啦！
　臺話文佮客話文，一字『惊』，著有夠用！
　查看英話文、日話文，用出幾字『惊』？」
　　每一種語言、文字，攏有伊的優缺點，也攏有伊的特色！
　　如此「褒已貶他」，實在也呣知，有啥好「展」、有啥好「揚」的？
　　若照伊的意思來講‥
台語用「溡〔ㄑㄧˊ　tshi5〕、濕〔ㄒㄧㆴ　sip4〕、㴷〔ㄉㆰˊtam5〕」，
來形容，無共款程度的濕度，
而華語，呣管程度如何，只是用一字「濕」字，
若須要分程度，只好加上其它形容詞，如「微濕（溡）、濕濕、很濕（㴷）」。
按爾生，敢是「華語」比「臺語」，較簡便、較高明？
是呣是愛講‥
「台文教出的‥溡溡、濕濕、㴷㴷……
　華語文一字『濕』，著有夠用啦！」
　　
　　豈不知，譬如音樂，會當用愈濟音，曲調旋律，著愈豐富？
　　簡單講‥
用「兜、瑞、咪、發、酥、啦、西」七個音，所作的曲，
著比只用「兜、瑞、咪」三個音，所作的曲，更加豐富幾仔倍。
　　如是「驚、怕、嚇、畏、懼、悸、怖、恐」等等，
雖然攏是「同義詞」，但「用處」，卻能有所不同！
台語用一字「惊」字，著會當代表，所有的情境？
如是，家己的缺點、不足之處，煞顛倒變成伊咧「展」、咧「揚」的優點，
煞摕來「褒己貶他」，實在是咧「搧家己的喙䫌——自取其辱」也！
　
　　有一寡人，意識形態作祟，滿腦「仇中、反中」思想，一直喊喝要「去中國化」。
　　豈不知‥台語所使用文字是漢字——漢字是對大陸傳過來的？
（所以‥有人則會主張，台語全面用「羅馬拼音字」——
　如是則有法度，去除漢字〔中國〕，對「台灣人」的束縛。）
　　豈不知‥台語即是閩南語？也只不過是「閩南人」（多數為福建漳州、泉州），來到「臺灣」，因為受日本殖民，或者是外國人影響，而增加一寡詞彙，佮「閩南語」的講法，有所差別而已——九成八以上，攏是共款的嘛！
將「閩南語」，改稱作「臺語」，按爾敢著會當「脫離」，佮閩南語（中國）的關聯與束縛？
　　阿文所謂‥「財產要繼承，祖先呣願認。」
　　每工不時咧「享用」，祖先所留落來的資產——
卻是想方設法、想孔想縫，想要切割、去除，佮祖先的關聯。
真正是「不肖子孫」啊！
　　台語、漢字，敢是台灣人，所創製的？抑是天頂落落來、塗骹爆出來，予台語人用的？
　　若非「傳承」之關係，豈不是‥台語人，「盜版、剽竊、抄襲」，閩南人，乃至中國人的資產？
　　將別人的「羊」，偷牽過來，改稱作〈咩咩〉——
然後講‥「咩咩呣是羊！這是㐾的『咩咩』，呣是別人的『羊』啦！」
如是「自欺欺人」，敢𣍐真好笑？
　　三不五時，看著一寡台語人，意識形態作祟，滿腦「仇中、反中」，一直想要「去中國化」，而講講一大堆，「似是而非」的論說，實在教人，也好氣、也好笑！
　　到底是予「仇中、反中」，舞𠇺煞「反智」？
抑是食了迷幻藥，而看𣍐清楚「真象」，所以則會講講一大堆「幻象」？
呣但家己對「幻象」，信以為真，也要教人相信——
看著實在，也好氣、也好笑；也悲哀、也無奈！
　　　　　　　　　　　　　　　　2021.06.29.二　07:20:00　初稿
===========================================================
├林振福。2021.06.29.二　09:16:00
　　咱台語，一粒「麻仔、沙、塗豆、糖仔、蘋果、西瓜、山、月娘、日頭」——
自細到大，用「粒」用到底。
~~~~~~~~~~~~~~~~~~~~~~~~~~~~~~
├林正雄。2021.06.29.二　09:03:00
　　我個人無「反中」，嘛無去中語化的意思。
　　政治上我主張‥一中一爿、民主和平對等。
文化上，㑑國家是多元融和(iong5-ho5)，主體清楚，行佇民主建國兮大道上；
語言仝款，多元各有主體，互相尊存，有國民語言自由言論的空間。
　　台灣原住民族語、台語、客語，台灣手語是，二〇一八年十二月廿五日，國家語言發展法，國會立法通過，所明訂的國家語言，而新住民語（住居台灣的國民語言），不但沒有被禁制，也有學校在教喔！
　　只是，日治時期的國語，早已還給日本，現在的中國國語（普通話），仍霸據台灣國家語言發展法的法律之上，國人毫不自知，習以為常——奴才做𪝋久，𣍐記㑑是主！
~~~~~~~~~~~~~~~~~~~~~~~~~~~~~~
├潘文良。2021.06.29.二　10:55:00

　　◎所謂國語

　　　　　　　　　　　　　　　⊕潘文良　撰

　　「國家」成立之條件，是‥人民、領土、主權、政府。
　　多數國家的「人民」，攏是「多民族」（多種族），所以，會有無共的語言、文字、習俗等等——但同處一個區域內，飲食，乃至文化，著難免彼此交流而融合。
　　所以‥多民族（多語言）的國家，必須要有一種「共通的語言」——無共的民族之間，彼此則有法度，交談對話、交流往來。
　　國家政府，推行「通行語」，是必要的政策——只是「推行的方式」，𣍐當是有「強制、壓迫、排斥」的手段——使人反感。
　　簡明言之‥
「推行『國語』（普通話），無呣著——只是手段，有較呣著！
　執行者，變成含有『排斥、輕視』，各族方言（母言）的做法，
　莫怪會令人𣍐爽，引起公憤，留下怨恨！」
　
　　有問‥「為啥『國語』是用『華語』，哪會呣用『臺語』？」
（也有「謠傳」‥「當初選國語之時，臺語只輸華語一票」之說。　所以‥
　客語人，嘛要問‥「為啥『國語』是用『華語』，哪呣用『客語』？」
　原住民，嘛要問‥「為啥『國語』是用『華語』，哪呣用『原住民語』？」）
　　國家通行語言，著愛「好教、好學」——使每一個族群，會當較緊著學起來。
　　如今的「國語」（普通話），源於所謂的「北京語」，是比原本的「北京語」較簡單——簡化為四個聲調（加輕聲），所以是比其他方言，易教、易學。
　
　　種種語文，如同種種民族、膚色、性別等等——豈有「尊卑、貴賤、高下、優劣」之差別？
（只有「貢高我慢」者，則會有「尊卑、貴賤、高下、優劣」之想。）
　　唯有彼此互相尊重，則是和平之道！
　　各民族的語文，用於記錄、流傳各民族經驗、風習、文化等等。
　　政府（執政者），須當「平等對待」，𣍐當「厚此薄彼」，對於弱勢族群，更須要加以輔助、扶持。
　
　　有一寡台語人，大概是「自卑感」作祟，反倒轉來，「以我為尊」，處處做「貴我賤他、褒己貶他」之論說，比如講‥「𣍐曉講台語——著是無愛台灣！」
　　比台語人，較早蹛佇台灣呰片土地的「原住民」，豈不是會當講‥
「你們這些『白浪』！
　在臺灣住那麼久了，都不會說我們原住民語！
　你們到底愛不愛我們臺灣？
　你們是真的愛臺灣，還是假的愛臺灣？」
　　愛臺灣、無愛臺灣，佮講啥麼語言、用啥麼文字，乃至佮啥麼人種、膚色、性別，有啥關係？
　　恔恔人，呣𢓶「讀書讀去尻脊𩩍」，串講串做，一寡「反智」的言行！
~~~~~~~~~~~~~~~~~~~~~~~~~~~~~~
├黃建榮。2021.06.29.二　11:43:00
潘文良：
　　汝是頭殼筋路斷線，或者是胡人製造丌機器儂？
　　閩南是孰讎？中國在佗位？
　　汝祖先，講有佮汝講過，伊是中國儂？
　　是日本中國，或者佗位丌中國？
　　自汝出世至今，共產黨，何時來管過汝，汝將汝所講丌話語，稱之為台語，敢會死儂？
　　台灣佗位對不住著汝，講台語，予汝甚見笑，汝焉能看台灣，如此無目地，是何緣故？
~~~~~~~~~~~~~~~~~~~~~~~~~~~~~~
├潘文良。2021.06.29.二　12:04:00
黃兄：
　　本人「就事論事、對事不對人」。
　　你若要討論，請保持器度，莫做「人身攻擊」！
　　若是要冤家，恕不奉陪！
~~~~~~~~~~~~~~~~~~~~~~~~~~~~~~
├潘文良。2021.06.29.二　12:15:00
　　本人敢有講‥將自己所講的母語，稱之為台語，會死人？
　　本人所反對的，是有人講‥「台語呣是閩南語。」而講‥
「台語即是閩南語。」
　　比如「番茄」，有人講「柑仔蜜」、有人講「臭柿仔」。
　　若是有人講‥
「柑仔蜜呣是番茄、臭柿仔呣是番茄！」乃至‥「柑仔蜜呣是臭柿仔。」
　　會按爾講的人，豈非「反智」之人耶？
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
▽吳彥勳。2021.06.29.二　12:22:00
　　將 1912 或 1949 年，發明的「中國」，當作是漢字的源頭——
才是數典忘祖吧！
~~~~~~~~~~~~~~~~~~~~~~~~~~~~~~
├潘文良。2021.06.29.二　12:40:00
　　阿文所謂‥「台語所使用文字是漢字——漢字是對『大陸』傳過來的。」
　　台灣佮大陸，乃至「中國」，如何分割？
　　無認同家己是「中國人」也罷！
但敢也會當，無認同「中華文化」，抑是「華廈文化」？
　　著算祖公，佇「漢朝」，著「移民」來臺灣居住——
敢著會當佮大陸分割？
　　臺灣佮「清朝」，敢無關係？如何分割？
　　臺灣佮「中華民國」，敢無關係？又如何分割？
~~~~~~~~~~~~~~~~~~~~~~~~~~~~~~
├吳彥勳。2021.06.29.二　14:53:00
　　無先認清楚，啥物是發明出來的「國族認同」？
　　無先看是啥物人，跋臭「中國」這兩字？
　　卻目睭遮著，講人仇中、反中，才是自大又無衛生啦！
　　大漢帝國、大清帝國、淪陷之前的中華民國，攏是無仝款的國家，會宣稱這些國家，攏是「中國」的，也干焦有夠自大的「中國人」，才做會出來。
~~~~~~~~~~~~~~~~~~~~~~~~~~~~~~
├潘文良。2021.06.29.二　15:53:00
　　所謂「中國」（「中華民國」之簡稱也好、「中國人民共和國」之簡稱也罷），也只是一個朝代的名稱——如同「漢」、如同「唐」、如同「宋、元、明、清」——焉知再過百年、千年之後，會變成啥名稱？
　　無愛「中國」，呰個名稱也罷！
但事實如此‥人民推翻滿清，建立「中華民國」（半路走出一個「中華人民共和國）——否認，敢著會使當做無存在？
　
　　人與人之間交惡，乃至族與族、國與國之交惡，是一回事。
　　文化根流，是一回事。
　　台語人、大陸人，共款也是咧過「春節、五月節、中秋節」！
　　台語人、大陸人，共款也是咧拜媽祖、拜關公、拜佛祖！
　　所謂「去中國化」，也只是徒有「口號」，而實際上，卻是難以達成的「政治思想改造計劃」。
　
　　就事論事吧！牽牽有的無的，只是模糊焦點！
　　所以‥台語之「語文」，是台語人，家己所創製的是無？
　
　　馬來西亞，對福建漳州、泉州移民去的，通常稱母語為「福建話」——
台語人，去到馬來西亞，往往「台語嘛會通」——
所以著問講‥「你是對台灣移民來的是無？」
　　福建話、福建語，自然也融合當地，多種民族的文化，而在一寡講法上，有所差異，但佮台語，總是「大同小異」——
　　如是，會當講‥「台語呣是福建話、福建話呣是台語」嗎？
　
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
▽劉和通。2021.06.29.二　14:18:00
潘文良：
　　照你這麼說，現在的美國還是英國的，分不開了？
　　看清時代的潮流視野要開闊，不能局限在一丁點裏打轉。
　　好的關係、好的鄰居、好的朋友，互惠互利，多多益善！
　　窮兇惡極，不是東西，拒與為伍，「田無溝，水不流」，是最卑微的願望。
~~~~~~~~~~~~~~~~~~~~~~~~~~~~~~
├潘文良。2021.06.29.二　16:06:00
　　如今美國人，除了當地的「原住民」，其他人的先民，大部分，也攏是對英國去的。
　　如是美國人，著算語音變化，而成為「美語」，但美國人，敢會否認‥家己的祖先，是源自英國咧？語言，是源自英語？
　
　　人，通常是「屬地主義」——自然認同，家己所出生的土地、國家。
　　去美國的僑民，所生的囡仔，難免認同美國——
囡仔會講‥「我是美國人！」
但是呣是，會當認同，家己抑是「台灣人」，或者是「中國人」，著無一定囉！
但父母，是來自台灣，抑是來自大陸（中國）——子女如何會當否認咧？
　　
　　阿文每作譬喻‥
　　未來有一工——
　　台語人，移民去月球，第二代、第三代的囡仔，會講‥
「我是月球人，呣是台灣人。
　我講的是月球語，呣是台語！」
　　台語人，移民去火星，第二代、第三代的囡仔，會講‥
「我是火星人，呣是台灣人。
　我講的是火星語，呣是台語！」
　　如同現在，對閩南（漳泉），移民到臺灣，第二代、第三代的囡仔，咧講‥
「我是台灣人，呣是大陸人（中國人）！
　我講的是台語，呣是閩南語！」
　　是謂‥「意識形態」作祟也！
~~~~~~~~~~~~~~~~~~~~~~~~~~~~~~
├劉和通。2021.06.29.二　16:06:00
潘文良：
　　如果兩國是和平相處，他不侵犯我（我斷無侵犯他），現在一些問題，不會是問題，也不會被當作問題提起。
　　至於那時候的情景如何，現在的人，說未知年代的事，多說無意義！
　　統以意識形態框住，或爭論意識形態，均在閃躲問題，無益於釐清事情。
~~~~~~~~~~~~~~~~~~~~~~~~~~~~~~
├潘文良。2021.06.29.二　21:33:00
　　所以，問題是啥麼？
　　請講重點！
　　如果若是認同‥「台語呣是閩南語」，那就講你的見解呀！
~~~~~~~~~~~~~~~~~~~~~~~~~~~~~~
├潘文良。2021.06.30.三　12:22:00
劉和通：
　　看著你的名〈和通〉，但查其義‥中和、通達。和洽、通好。
　　看著你所講‥
「如果兩國，是和平相處，他不侵犯我——我斷無侵犯他。
　現在一些問題，不會是問題，也不會被當作問題提起。」
　　想想也愛笑！有啥好笑咧？　腦海浮現‥
兩個兄弟咧冤家，於是，對外宣告「斷絕兄弟關係」，互相無愛承認，對方是家己的兄弟——
有一日，若是「和好」，著佫是「兄弟」囉？
　　因為兩岸冤家𣍐煞，所以講‥「台語呣是閩南語！」
　　未來若兩岸和平共處，著變成‥「台語即是閩南語！」
　　你的意思，是呣是按爾？
　　台語是呣是閩南語，是因為兩岸和不和平的區別——
親兄弟是呣是親兄弟，是因為冤家抑和好的區別——
若按爾，敢呣是「反智」的言行咧？
　
　　兩岸人民，是「同文同種」——
卻因為兩個「政府」、兩個「政權」，互相對立，而使人民，也𨓚咧對立。
　　政治，是政黨的角力——
政黨成立之初心，攏講是為著「救國救民」——
奈何壯大了後、取得「政權」了後，卻是難以避免，走入‥
「權力使人腐化——絕對的權力，使人絕對的腐化。」之魔咒！
變成為著家己黨的利益，乃至是為私人的利益咧拍算。
　　所以，也有人講‥「政治，是最高明的騙術！」
　　政客，真正是比藝人，較𠢕演哪！
　
　　國民黨佮共產黨，過去有仇——
但「冤家宜解不宜結」，如東西德，終究也行向「和平統一」。
　　共產黨佮民進黨，有啥仇？而𣍐當彼此「和通‥和洽相處、通好往來」咧？
　　政黨佮政黨有仇——人民佮人民，敢有啥仇？
　　政黨如何將家己的仇恨，傳教予人民，教人民去彼此仇恨？
　　比如兩家大人冤家——著傳教囡仔，去仇恨對方，老死不得往來，按爾敢著？
甭講著呣著，著講‥按爾敢好？
　　為啥麼，有一大堆台灣人（尤其是少年人），會「仇中、反中」？
　　因為自細漢，被「教育」去啦！
　　父母自囡仔細漢，著給伊講‥「街尾彼口灶，全家攏壞人，攏咧做壞載誌……你呣𢓶佮𪜶的囡仔 接近、往來，無會去予拐去賣……」
　　如是，囡仔莫名其妙，細漢到大漢，對「街尾彼口灶」，著是又㤉目、又厭惡、又恨又驚。
　
　　美國家己佮「中共」建交，卻是四界「揪團」，愛別國聯合「對抗中共」——
四界宣傳‥中共威權、無人權……講𠇺中共若親像「魔鬼」共款！
中共若是魔鬼，美國卻是佮魔鬼咧交易（貿易往來），
按爾生，敢𣍐矛盾？是神經錯亂，抑是人格分裂？
　　美國舞來舞去、變來變去，明眼人，看嘛知‥著是咧為家己國家的利益拍算，為著要佇國際，繼續「做老大」拍算而已！
　
　　臺灣民進黨政府，也𨓚美國咧「仇中、反中」。
　　想當年，猶在野的民進黨蔡英文主席講‥「ECFA是糖衣毒藥……」
痛批國民黨政府‥「與對岸簽ECFA，是把台灣當乞丐。」
　　如今，民進黨，執政五年外，ECFA呣但無廢，也呣敢廢（佫求對岸呣好廢）。
蔡英文總統，抑多次強調‥台灣出口（到大陸的）貿易額，屢創新高。
　　看來，民進黨政府，是食「糖衣毒藥」，食𠇺「上癮」，也一直樂於予臺灣做乞食的款。
　　今昔對照，豈不教人懷疑‥民進黨，是呣是患了精神分裂症，有雙重人格？
　　恔恔人，只要好好觀察、分析、思辨，是非烏白，明明在眼前也！
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
├劉和通。2021.06.30.三　13:27:00
潘文良：
　　問題一：「去不去中」不是重點。這土地上的人，要主張自己用的是「台語」說的，是「台灣話」，有何不可？
　　難不成，英國人要禁止美國人說ABC……是英語，不能說是「美語」嗎？（只差英國人不那麼老粗罷？）
　　閩南？閩南語？再不用幾年對台灣人來說，遙如天邊一顆不知名的小星星。
　　台語與閩南語的關係，一定要天天掛在嘴邊溜嗎？就留給語言學家去做功課了！
　　你意思說「台語」與「閩南語」的講法，九成八以上，攏是共款的嘛！請問這有何公信力的研究統計嗎？或是你心急了，不管公信力如何了？
　　不要忘了語言是活的，祖孫生活在一起，語言用詞多所不通，何況兩地相隔一甲子以上，還會有九成八，以上共款？能不說是自欺欺人？
　
　　問題二：你何以將語言，視為實質的財產？什麼享用？什麼繼承？
你這說法，可以成立的話，那地球上，可以控訴追索的例子，不勝枚舉。
這樣是很粗俗的觀念，不值得一駁。
　　還罵台語人：「盜版、剽竊、抄襲」，閩南人，乃至中國人的資產？真正是「不肖子孫」啊！
　　同是台灣人，不忍你再口出惡言，看扁自己！
　　視野、眼界開闊且放遠！不要繞不出角尖！恕不奉陪！
~~~~~~~~~~~~~~~~~~~~~~~~~~~~~~
├潘文良。2021.06.30.三　13:27:00
　　一、本人呣𧧸講過‥𣍐當用「台語」呰個名稱。
　　二、本人主張的‥「臺語即是閩南語。」
　　著算是九成共款、八成共款，也是「大同小異」——
至少嘛愛是有「七成、八成」，無共款，如是「小同大異」，嘛則會當講「臺語呣是閩南語」。
　　三、語言、文字者，「文化資產」呀！
　　祖先來自福建漳州、泉州，明明是「傳承」關係——
福建自古簡稱「閩」，福建北部稱「閩北」、東部稱「閩東」、南部稱「閩南」，有啥呣著？
台語人，棄嫌「閩」字，講閩是「門內一尾虫」。
棄嫌家己的的祖先，來自「閩南地區」——
於是講‥「台語呣是閩南語！」
　　阿文所以講‥「財產要繼承，祖先呣願認。」
　
　　台語語文，敢是台語人，家己創製的？
如是否認「傳承」的關係，豈不是「盜版、剽竊、抄襲」他人之「文化資產」？
　　（所以‥則有一派台語人，會主張‥全面用「羅馬拼音字」——
便是為了「去中化」——與「中華文化」脫鉤也！）
~~~~~~~~~~~~~~~~~~~~~~~~~~~~~~
├潘文良。2021.06.30.三　15:06:00
　　呵呵呵！原來如此‥
臺語即是閩南語——學術也！
臺語呣是閩南語——政治也！
　　看來，學術佮政治，目前是難以達成共識的。
　　政治也時常，會干涉、壓制學術的自由。
　　看來，只有等到兩岸「和平統一」（或者是被武力統一），
主張「臺語呣是閩南語」的人，則會改口講‥「臺語即是閩南語。」
　
==========================================================
※本文首舖於「新聞台」。
◎潘文良《自大一點著是臭》。2021.06.29.二　07:22:39
　https://mypaper.pchome.com.tw/avun01/post/1380666872
※本文轉舖於「臺語學院」。2021.06.29.二　07:29:00
　https://www.facebook.com/groups/978821105480673/posts/4721572164538863/
※本文轉舖於「母語教學網」。2021.06.29.二　07:33:00
　https://www.facebook.com/groups/317918739507276/posts/495455118420303/
　
■標籤：自大、華文、台語文、客語文、英語文、日語文、形容、款程、濕度、簡便、高明、仇中、反中、反智、幻象