◎改名

　　　　　　　　　　　　　⊕潘文良

　　老一輩的人，相信「粗俗名，好育飼；賤名著好命」，囡仔的名字，號了愈歹聽，著愈好育飼，以後著會愈好命。
　　戶政人員講‥
「高雄旗津地區，著有十幾個人，名字攏有一字屎。
　姓蔡的，叫蔡屎；姓林的，叫林狗屎；抑有人，叫臭屎。
　一個比一個較歹聽，呣知影的人，聽著，抑以為村民愛罵人呢！」
　
　　話講‥
　　林狗屎的囝，自細漢讀國小開始，逐擺若愛老爸簽聯絡簿、簽考試單，看著〈林狗屎〉三字，著感覺誠見笑——老爸的名叫〈狗屎〉，予伊真無面子；甚至伊的外號，嘛被人叫作〈狗屎囝〉，真是奇恥大辱。
　　伊一直愛老爸去改名。
　　老爸攏講‥「這是㐾爸母，賜予我的名，歹聽是歹聽，但我都已經誠慣勢，哪有需要改？人叫我狗屎，我嘛𣍐感覺，有啥麼好受氣，因為‥我的名，雖然是狗屎，但也呣是真正狗屎……」
　　所以‥伊若看著老爸、講著老爸、想著老爸，著真怨𢗧，年久月深，煞呣願認老爸，逐擺攏講‥「林狗屎，則呣是㐾老爸；㐾老爸，則呣是林狗屎！」
　　有一日——
　　林狗屎，過身啦！
　　林狗屎，位戶籍謄本（戶口簿仔）面頂「除名」嘍！土地、房屋、汽車，動不動產，繼承了後，攏總改成囝的名。
　　做囝的，感覺真歡喜‥總算會當解脫，〈林狗屎〉的束縛！
　　但是‥身分證「父母欄」下，抑是〈林狗屎〉，予伊真頭痛。
　　有一日——
　　伊去戶政事務所，提出申請，想要改老爸的名——
將〈狗屎〉，改作〈黃金〉。
　　戶政人員，頭殼𢪈咧燒，呣知要安怎辦較好。
　　有的講‥「老爸的名，安怎歹聽，嘛是恁老爸！」
　　有的講‥「改名愛本人來改，囝是要安怎𠇺老爸改名？」
　　有的講‥「人都死啊！改名有啥意義？」
　　有的講‥「建議用專案處理，要改著給改，予伊活著，會當歡喜自在！」
　
　　　　＊　　　　　　＊　　　　　　＊　　　　　　＊
　
　　有真濟台灣人，對「閩」字真感冒，看得誠不滿、聽得誠𣍐爽，
因為‥「閩」字，「門內一尾虫」，字典解說，講是「東越，蛇種」。
閩，又音瞞（《集韻》謨官切）。
《周禮》七閩〔釋文〕：《漢書音義》服虔，音近蠻。
因此講‥「閩著是蠻。」
認為這是對福建人，輕賤、污辱的稱呼，真是奇恥大辱！
　　祖先為「閩」，予台灣人，感覺真卸面子，有真濟人，煞變𠇺誠矛盾‥
財產要繼承，祖先呣願認。
　　所以‥台灣人，愛為來自福建的祖先，平反、雪恥，討回公道！
一、台灣人的祖先，位大陸福建漳州、泉州、福州等，移民過來；
　　所以‥福建省，愛簡稱為「福」，𣍐使簡稱為「閩」。
二、如是，福建人，所用的「閩語」，
　　分作‥閩東語、閩南語、閩北語、閩中語……
　　愛正名為「福建語」，簡稱「福語」，
　　分作‥福東語、福南語、福北語、福中語……
　　𣍐使講臺語是「臺灣閩南語」，愛講是「臺灣福南語」，簡稱「臺語」。
三、凡與「閩」字，有關的名稱，一律愛改為「福」字。如‥
　　歷史上的「閩國」，改為「福國」。
　　「閩王祠」，改為「福王祠」。
　　「閩江」，改為「福江」。
　　「閩江學院」，改為「福江學院」。
　　「閩南師範大學」，改為「福南師範大學」。
　　「閩Ｘ路」，改為「福Ｘ路」……
　
　　按爾生，則會當使講臺語的台灣人，活著較歡喜自在。
　
　　　　　　　　　　　　　　　　　　　　2017.12.17.日　09:00:00
　
　
　　省思‥
˙名狗屎，非真狗屎。
　著算改名為黃金，亦非真黃金，又豈能抹滅，曾經叫作狗屎？
　真狗屎，非假狗屎。踏著狗屎，人講踏著黃金，但也是去之而後快。
　真黃金，非為狗屎。將黃金，改名叫狗屎，抑是人人愛。
˙雲林虎尾，有一間麵擔仔，名叫狗屎麵。
　頭家娘講‥因為老爸，名叫狗屎，人攏叫伊狗屎伯。
　麵擔仔，是老爸所創立，著用老爸的名，做麵擔仔的名，以為紀念。
　狗屎麵，名是誠歹聽，但因為麵真好食，也無人會掛意，
　連外地人，嘛慕名上門。
˙閩字，門內一尾虫，是蛇種、是蠻族？
　漢民族，講是〈龍的傳人〉，結果是「女媧摶土造人」——
　女媧者，上身為人形、下身為蛇軀。
　漢民族，其實是「蛇的傳人」——蛇者，小龍也！蛇歹聽、龍好聽？
　神話故事，也要當做是真的？
　台灣人，自慚形穢，煞棄嫌、看𣍐起家己的祖先，拍死都無愛承認！
．粵客人，稱福建人為〈福佬〉，福建人講的話，號作〈福佬話〉。
　台灣人，無合意，講「佬」是一種輕賤、侮辱人的稱呼。
　如是「合事佬」，敢是一種輕賤、侮辱人的稱呼？
　講「台客」，嘛是一種輕賤、侮辱人的稱呼。
　如是「俠客、劍客、墨客」，敢是一種輕賤、侮辱人的稱呼？
˙華諺講‥「面子是別人給的、臉是自己丟的。」
　一個人，著算講，名叫作〈總統〉，抑是真正佇做「總統」——
　做無好，自然受人批評，乃至詈罵；做若好，自然受人阿咾、稱頌——
　叫做啥麼名、啥麼身分地位，敢著會有差別？
　名總統、做總統，著會當揚名萬世，永遠𣍐卸面子？
˙台灣人，若是脫𣍐開，家己予家己的枷鎖，
　呣免別人輕賤、侮辱，家己著會活了誠鬱悴、誠痛苦！
　眼若開、心若開，一念之間，著趁好海闊天空！
　
　　　　　　　　　　　　　　　　　　　　2017.12.19.二　05:00:00
　
【閩】華：ㄇㄧㄣˇ
　　　台：{文}ㆠㄧㄣˊ bin5　{變}ㆠㄧㄣ├ bin7
　　　　　　　　　　　　　　　{泉變}ㆠㄧㄣ└ bin3
　　　　　{白}ㆠㄢˊ ban5　{變}ㆠㄢ├ ban7
　　　　　　　　　　　　　　{泉變}ㆠㄢ└ ban3
【𢪈】{文}ㄇㆦˋ　moo2　{變}ㄇㆦ　moo1
　　　{白}ㄇㆦㆷ　mooh4　{變}ㄇㆦˋ　moo2　抱、並持。
【見笑】ㄍㄧㄢˋ　ㄒㄧㄠ└　kian2 siau3　害臊、羞愧。
【怨𢗧】ㄨㄢˋ　ㄘㄝㆷ(漳)　／　ㄨㄢˋ　ㄘㄨㄝㆷ(泉)
　　　　uan2 tsheh4(漳) / uan2 tshueh4(泉)　怨恨、怨尤。
【感冒】ㄍㆰ　ㄇㆦ├　kam1 moo7
　①著涼。病症名。
　②比喻對某人、某事物，感到不合意、憎惡。
【過身】ㄍㄨㄝˋ　ㄒㄧㄣ(漳)　／　ㄍㄝˋ　ㄒㄧㄣ(泉)
　　　　kue2 sin1(漳) / ke2 sin1(泉)　過逝、去逝。
【矛盾】ㄇㄠ├　ㄉㄨㄣˋ　mau7 tun2　比喻言語行為等，自相牴觸。
【掛意】ㄍㄨㄚˋ　ㄧ└　kua2 i3　在意、介意。
【鬱悴】ㄨㆵ'　ㄗㄨㆵ　ut8 tsut4　心情愁悶不暢快。俗作鬱卒。
【卸面子】ㄒㄧㄚˋ　ㆠㄧㄣ└　ㄗㄨˋ　sia2 bin3 tsu2
　丟臉、沒面子。
【年久月深】ㄋㄧ├　ㄍㄨˋ　ㆣㄨㄝ└　ㄑㄧㆬ(漳)　／
　　　　　　ㄋㄧ└　ㄍㄨˋ　ㆣㄝ└　ㄑㄧㆬ(泉)
　　　　　　ni7 ku2 gue3 tshim1(漳) / ni3 ku2 ge3 tshim1(泉)
　　積年累月。
　
~~~~~~~~~~~~~~~~~~~~~~~~~~~~~~
■延伸閱讀
※TVBS新聞。2004/08/02 13:02
　記者 吳昭君 李讚盛 高雄 報導
◎狗屎雞屎一蘿筐，屎尿為名求好命。
　https://news.tvbs.com.tw/other/482625
※TVBS新聞。2004/08/28 11:56
　記者 游勝龍 雲林 報導
◎我爸叫〈狗屎伯〉，虎尾「狗屎麵」，遠近馳名。
　https://news.tvbs.com.tw/entry/478807
　
※本文發表於新聞台。2017.12.17.日　09:44:00
　http://mypaper.pchome.com.tw/avun01/post/1374269670
※本文轉貼於臺語學院。2017.12.17.日　09:54:00
　https://www.facebook.com/groups/978821105480673/permalink/1939685772727530/