終於逼到埋身啦～～

各「大機構」開始請人，我只希望執到份好似「鐵飯碗」咁穩定的工作，咁就正啦！話之佢升唔升，總之份工有咁HEA得咁HEA，唔駛我點用腦，準時收工，準時出糧，等我可以過番以前晚晚九點就ZZZ的生活，同黑眼圈講「死開」！

講開HEA，我開始覺得皇上肯帶我做份FYP係一件超級幸福的事！

（當然～～要我好似游擊隊咁守係佢門口捕佢時例外，或者走落八樓茶水房到同佢玩捉依人時都係例外）

早幾日Faculty請飲酒（真係淨飲咁濟，小女子自知酒力欠佳，飲左一杯白同兩杯紅就收手，但某Ｄ老師好似好興奮咁，係咁飲係咁飲），呢Ｄ屬於以前我唔會參加的活動，最近開始玩下，因為計過後覺得幾扺，同埋有見於開始要為我搵工鋪路（例如睇下邊個阿SIR有門路咁＜－－睇下我幾卑鄙～～），所以最近開始「積極」參與！

唔．．．個日都叫做有少少收穫，起碼阿AD派左張咭片俾我地，同埋叫我地如果搵唔到工可以搵佢介紹，我唔理佢講真定假，始終其中一個走後門的機會叫做開左．．．

講番個日，飲酒當然包吹水啦！吹吹下水，突然殺出一個外籍老師，佢一開口就問我FYP跟邊個，我當然要幫老細賣下面光，係駛咁讚老細自由度高，人脈夠廣．．．跟著阿外籍人仕就開始同我講佢都收左一個我個班的學生跟佢，佢又話自己好Aggressive（我讀英文時，Miss話呢個係美化自己係工作狂的最佳用詞），希望佢個學生可以點點點，又講佢點樣Push佢個學生做好份FYP，聽完之後，我開始有Ｄ滴汗，心唸：「佢係咪傻架！無錯！跟到你係會學到好多野，但我驚係佢學成之前，已經俾你擠乾啦！」個腦開始出現幻象，佢好似殺人狂咁住把刀，係咁捉佢學生交功課俾佢．．．

我覺得跟一個咁Aggressive的老細，真係有好有唔好，學到野梗係好，但係俾佢咁追法，我一定會痴線！（從來只有我追人交野俾我，而我就最唔鍾意人趕我做野！總之我係Deadline前交到，你理我呀～～所以我都叫做半將心比己，通常我都係會過左Deadline之後先追人交）

講番我老細同份FYP，一如以往，自己帶晒Ｄ料上去同佢「礇報」（同公益金一樣，多多益喜，做得多與少就真係問心），之後佢就根據你所「礇報」的資料同埋我有興趣的題目，創作一Ｄ我原本想做，但經佢把口講出黎的題目，總之就係個題目有咁長得咁長，但係到底要寫Ｄ乜，佢就無乜所謂，反正佢係唔係都會批，之後的日子就開始寫呀～寫呀～寫呀～寫呀～交完份初稿俾佢，又係一如以往，佢係唔係都批，但問題係我淨係寫左個Methodology，其他只係起左個標題，佢都批！所以話跟著一個咁悠閒的好人，一定要自律，如果唔係我相信佢真係會唔理你，直到你交Final Version個日！但係講真，同老細吹水又真係幾開心，同埋佢有Ｄ時候真係好可愛，跟著佢快快樂樂咁Happy埋最後呢年大學生活，都算係唔錯～～