星期日去咗睇, 因為有人請!

原本係因為成龍所以唔想睇, 冇法, 我對人唔對事嘛!

不過,睇完都覺得佢的確係做得幾好, 一時間要諗個可以取代佢既演員又諗唔到..... 可能佢夠老而個樣又真係十下十下咁, 做到嗰種滄桑感. 所以只要忘記佢係成龍, 呢部電影係真係好鬼perfect. 而且亦係一部值得俾錢入場睇既戲.

故事係可歸類為新移民黑幫片,講啲新移民何以變做黑幫, 片中有啲我估係真實訪問片段穿插, 講下啲暴力團體問題. 而呢部片真係幾暴力下, 可能日本黑幫啲style都係咁啦, 畢竟都係有個日本人做劇本顧問嘛.

竹中直人講國語令我諗起扮德文口音講日語演米奇既佢, 今次係正氣好多! 吳彥袓個角色阿傑真係好鬼慘情, 錢嘉樂就精神分裂, 肥佬林雪就走得好冇陰公, 加滕雅也做江口先生就好有型, 我係紀香的話就揀佢囉!

因為係黑幫片, 不期然諗起杜棋峰既"黑社會" 1 & 2. 小寶呢套"新宿事件"可以話係傳統好睇既港產黑社會片, 打得夠多夠實在, 有血有肉, 真正係以暴力解決問題, 而"黑社會"就冇咁多血同打, 但就會令人覺得心寒, 各有千秋啦!