友人KK惡運纏身半個月,在下亦喺差不多時候有同樣煩惱,而且似乎重要耐啲。

一切都同洗地有關。

上月最尾個星期六,在家。大約中午時,到洗手間,發現個地超濕,即係有人(房東阿媽或阿爸)用好濕嘅地拖拖過地後唔抺乾,打算風乾。初時都不為意,到咗五點幾,想到洗手間丟糖紙時,一下就跣低咗。由於係側身落地,左手手臂撞到門框,右腳中腳趾撞到唔知邊度,痛到爆粗。

傷勢:左手駛唔到力,腰有啲痛,而腳趾好很痛,重腫咗,不過因為重屈到,郁到,知道啲骨冇斷,但懷疑可能有裂到?周未過後去睇跌打,老師將左手啲瘀捽晒出嚟,同埋拉番鬆腰啲肌肉。至於腳趾,老師認為係啲筋撞得好應,骨就冇事。

一個星期後,由於腳趾痛楚痛到前腳板腳趾連位,所以再去老師度。老師話會再痛一排,叫我多做啲鬆筋運動。

由於過咗兩星期都重有痛,為咗快啲好可以打波,所以決定去做針灸。

就喺Appointment前一個鍾,即上星期六,三點左右,因為房東提早返來,又因為要再出去而唔泊架貨車喺Driveway,要我泊架車喺第二個位。我一出廳,就見個地濕晒,所以行時都已經一步一步咁慢行,返入屋時,都已經好小心,但都係撻生魚咁直撻落地。

已經係第二次喇!

好嬲咁入番房,房東阿媽問我有冇事,我話唔知。因為pat pat落地之後係背脊,覺得啲背肌有啲痛,而左手可能因為好番冇耐又整多云所以又唔太用到力。之後去個Appointment,先知係啲中西物理治療嗰種(係朋友姐夫介紹,所以唔知詳情)。同我照過片,腳趾啲骨的確冇事,之後去做針灸同電療。重要去再做(唔知幾多錢,要個保單返嚟先知,而我個保險係deductible嗰種,所以而家都係自己錢)。

第二日,起身,發現今次始乎係尾龍骨撞親。房東阿媽見我按住,問點,梗係痛啦。之後佢話,「咪走咁快嘛」,我立刻話我已經係走得好慢。只係見佢老人家,先唔話係佢因洗得個地太濕。

Anyway,決定呢兩日一定要同房東講(因為要喺佢阿媽唔在塲時先好講),真係太過份喇。