偶然地以$19買左哩隻dvd返黎。是被盒上簡介所吸引的~

自己就幾鐘意周星馳套「少功足球」。果團火！嘩！真係好得！張衛堅都拍左套「功夫足球」既，有幾得……明就算啦。但「功」中有一part我幾鐘意：班球員出左名後就因為名為利而迷失左，重差d各散東西。哩套「沙開聯隊」都有類似既描述，講班隊員成名後，晚晚都去「蒲」。有個就成日諗女人，有個就成日食毒品，其他人都好唔到幾多，又煙又酒。個領隊本身又只係為錢，所以先帶隊咋喎。

簡介劇情先：一班係一個落後既「沙開」部落既年青人，為左解決村中既疫病，所以就被領隊帶左去到曼谷踢波，希望得到「國王的藥」(其實即係個獎盃)，救返條村。儘管佢地係初賽時贏左好多場波，但佢地都遇到兩個問題：首先，好多隊員都迷失左自我；另外，隊長瑪蒙漸漸發覺城市人唔重視佢地，只係當佢地係小丑。而佢地個領隊係半推半就下，想叫佢地踢假波。結果‥‥‥當然是happy ending。

話就話係足球片，但，足球部份既戲都無乜睇頭。但劇情都唔錯架喎。我覺得戲中有幾點幾有趣：

1. 泰國人真係好尊重泰皇。當佢地有困難時，突然就會有泰皇既singal出黎(泰皇張相、國王獎盃等)。最妙既都係最後一幕，話班年青人唔知「國王的藥」係點用。點知個盃咁岩就反射左d陽光出森林，畀班醫生知道個部落既位置。果下，當然，個個人都跪哂係個盃前，感謝泰皇啦。咁既情況不其然令人諗起，當年中國人係唔係都係咁拜毛澤東架？

2. 隊長瑪蒙係戲中唯一一個充滿純真、戇直又有自尊心既角色。佢無去夜遊、晚晚練波、畀人當係小丑咁玩，就自問自己係城市中既角色係乜、唔識用個盃，但都日坐夜坐咁等奇蹟出現。好多戲都有咁既角色出現既，但試問，現實中有無咁既人呢？真係想識返個咁既朋友。

瑪蒙唯一迷失既一刻，係佢最後先知佢崇拜既偶像，原來係個網球手，而唔係一個足球員。但畀隊友、劇中有正義感既損友同領隊支持下，佢終於都睇開左。哩一段故事都幾得意架，特別係估唔到個電視遙控會一跌就散哂！

3. 迷失了的隊員中，一個係色鬼，一個係癮君子，一個係唔識過馬路(唔夠果斷)。佢地都用唔同既方法面對自己既問題：(個肥仔唔想自己咁咸濕，竟然以掌上壓同打機機去面對0.0)。好正常既橋段者，但一諗返，佢地係少不更事既年青人，我地又係少不更事既年青人，咁佢地可以面對到自己既問題時，我地又要點面對呢？我自己好鈍、好迂腐、好無主見同自信，咁我又要點做呢？又係做掌上壓？老生常談但又好重要既問題。

4. 人成功後係唔係就會迷失呢？「功夫足球」又係咁，「沙開聯隊」又係咁。慶幸既係「功夫足球」無講哩個問題，最少，個ending話畀我聽，五師弟對發揚少林功夫仍然係好有熱誠。哎呀呀，我呢？我幾時先係成功？係唔係都會迷失(緊)？邊一刻係critial moment？

5. 戲中唯一女角(同肥仔有一夜情緣既女仔)，齋睇樣的話，真係好靚喎！

-----------------------------------------------------------------

唔係因為平，我都唔會買哩套戲既dvd。緣份來的。套戲未算係極品，但我覺得都是值得一看的。