萬利仔佇大學教冊。今，台灣頭到台灣尾百外外間大學，教授總仔共仔幾落萬个。事實上，「教授」是尊稱，萬利仔佇這間起踮半山腰的私立大學教冊二十外冬，濟濟後輩攏升起來掛教授、副教授，伊老神在在「講師」一路掛到底。毋捌聽講伊有半點仔不滿，當該然，佇文學系教冊，遮爾濟冬來，敢若嘛無人看過伊發表半篇論文。

　　到底萬利仔靠勢啥款關係，抑是有啥物特等的才情？會當二十外冬免生產論文，共「講師」的位坐甲穩在仔穩在，這咱無真知。

　　生成瘦閣薄板的萬利仔，身懸百六捅仔，頂月日才五十足歲，佇四、五冬前規个頭鬃就白蒼蒼。遠遠看過，毋知的人會掠準伊定著六、七十歲矣。這个白頭鬃的因端，到底是遺傳基因所致，抑是用腦過頭？事實講，咱嘛無真知。

　　萬利仔目睭細蕊，你若徛咧面頭前參伊講話，總是看袂出來伊的目睭敢有擘金？伊這个人蓋孤老，佮伊成做同事十外冬，講無超過二十句話。就準講無意中相閃身，伊嘛罕咧參人相借問，連頕頭遮爾簡單的動作，伊攏會儉起來生利息。

　　我較家婆性。有一回，天落霎霎仔雨，佇文學院佮商學院兩棟大樓之間和萬利仔相閃身。彼陣，伊手裡提四、五本冊，經過我身軀邊的時，上頂面彼本文學概論，順勢趨落來塗跤兜。咱紲手向(ànn)腰共冊抾起來還伊，伊毋但無說多謝，連掠我看一目嘛無。

　　講到遮，咱就知影萬利仔佮我的個性是天差咧地。這無打緊，一樣米飼百樣人，無兩个人全然相仝。

　　想袂到，這个性癖參我天差咧地的萬利仔，最近這成冬來，煞有一項佮我仝款的議量。講「議量」敢若較無對筒，凡若是本身有趣味的代誌抑興頭，有閒的時罔做仔罔做，毋才號做「議量」。

　　萬利仔興參加文學獎，有這字「獎」，牽涉著名佮利，實在無妥當講是「議量」。咱興文學獎的時間，上無嘛五、六冬矣。我家己真知，頭殼尖尖、才情有限，毋敢向望著大獎。若三不五時、一半擺仔得著佳作，就歡喜甲趒起來矣。講罔講，需要較濟想像力的現代詩佮小說，我透世人毋捌想欲參人拚輸贏。獨獨散文，這項真拄真的文類，大概我散赤人出身，半世人啉袂少苦湯，總是有寡經驗會當化做粗淺的文字，提出來參人相比並。

咱知影，台灣的文學獎親像流行性感冒仝款。逐冬佇年中彼幾月日時行一輪，會著袂著好歹字運。這个恬恬食三碗公的萬利仔，毋知是頂世人燒好香抑是祖公仔致蔭？才參加文學獎無幾月日，就相連紲得著幾落項頭名，可比講古城文學獎得著散文首獎，海港文學獎得著現代詩第一名，新高山文學獎得著短篇小說正獎，袂輸天拍天晟的文學寫手。

這站倚年，各文學獎頒獎典禮相連紲佇歇睏日舉辦。得獎人除了領著獎金佮獎牌以外，主辦單位嘛會送怹得獎作品集。這幾冬，大部分的縣市文學獎，攏送得獎人五本作品集，較功夫的送十本；往過我頭擺得著南都文學獎，一睏頭送二十本冊，一本五百外頁，重甲欲死，mooh甲強欲歪腰，落尾，遐的冊送規月日才送了。

今年，我頭殼尖尖干焦得著海港文學獎散文佳作，人萬利仔頭擺參賽就提金牌，我毋敢怨妒，只有徛踮壁角欣羨。本底掠準阮會當做陣落南領奬，啥知，海港文學獎參新高山文學獎相siāng佇12月23拜六頒奬。

彼日，罕得參我相借問的萬利仔，雄雄捀一甌咖啡行來面頭前，講欲請我啉。我歡頭喜面，比對著彩券閣較歡喜。原來是欲拜託我替伊領海港文學獎，我除了頕頭，無別項選擇。人總是愛虛華，雖罔干焦過一个癮，會當摸著第一名獎座，心內嘛是爽甲無地講。傍萬利仔的福氣，看明年會當得著這世人第一个頭等無？

領獎轉來北地，已經暗頭仔。中晝主辦單位請阮食自助餐點，我連紲搩(kiat)三盤，飽到無想欲食暗頓。揹仔一囥落，未曾洗手面，隨抽出一本作品集掀看覓。頭一个想欲看萬利仔著第一名彼首詩寫了按怎？我雖罔毋捌寫詩，看人的作品罔鼻芳嘛好。彼首〈港都素描〉其實是三首詩鬥起來的，攏總佔咧四頁；第二、三名嘛才佔兩頁爾爾。敢講萬利仔是寫比別人較濟逝才得頭名？

我好玄掀到冊後面的簡章，現代詩明明規定40行以內，萬利仔用三首詩鬥做80行參賽，按呢對其他參賽者敢有公平？負責收件的行政人員敢是目睭挩窗？加人一倍的行數敢講看袂出來？阿評審咧，敢有盡著怹的責任？

我上蓋㤉潲(gê-siâu)卑鄙小人。今，現現我的同事萬利仔就是這款腳數，為著幾萬箍獎金，做出袂見眾的代誌，按呢敢有夠格成做教育下一代的老師？我凝甲頭殼強欲衝(tshìng)煙，隨想著「大義滅親」這个成語。毋著，啥人佮伊是親？我頇顢罔頇顢，才無咧衰潲佮這款敗類牽連做伙。

兩日後拜一，我共獎座佮五本冊擲咧萬利仔的研究室門口，無講無呾做我去上課。本底按算課上了，欲敲電話予主辦單位檢舉。無閒到地煞袂記得，等我想著的時，早就日落黃昏，文化局的人員攏下班矣。

隔轉早，未曾採取行動，就佇面冊看著閣較譀古的代誌。有人檢舉萬利仔得著新高山文學奬彼篇小說抄人的，檢舉人清楚指出：彼篇除了地號名改掉，賰的內容大體上攏佮原作者相siāng。無偌久，面冊裡眾人議論紛紛，規山坪的人跳出來電萬利仔。

我咧想，新高山的確並海港較偉大！違反規定行數都咧慘死了矣，這聲抄人的，萬利仔跳落淡水河三暝三日嘛洗袂清。

──2018.1.4寫佇赤崁南門仔

    2018.4《台文戰線》第50號