咻──

　　快速直球。收拾對敵最後一位打擊者。

　　洪櫻掣[tshua⁷]領紅葉少年野球隊得著全國錦標賽冠軍。

　　這粒關鍵球投出去了後，伊的面裡露出微微仔笑，將戴佇頭殼頂的帽仔提落來，向在場幾落千名觀眾拽[iat⁸]手致意。伊原本烏肉底的皮膚照著熱人的日頭，看起來烏甲會發光。

　　洪櫻，布農族（Bunun）的查某囡仔，彼時讀小學六年，加入紅葉少年野球隊欲滿兩冬。伊的發育不止仔好，身懸抽長到百六公分，並[phing⁷]濟濟查甫囡仔猶較躼。伊是厝裡的孤查某囝，由老母一個查某人踮菜市仔賣菜共[ka⁷]伊捏[liap⁸]大漢，老爸佇伊五歲彼冬，踮佇幾落百公里遠的他鄉外里，唯[ui³]鷹架仔頂予一陣強猛風搧落來都市的塗跤兜，頭殼嚴重出血來離開世間。

　　這個跤躼手躼的洪櫻，自細漢運動細胞就並仝沿的囡仔較浮，毋那走相逐[jiok]罕得有人走會贏伊，尚且，不時參一陣查甫囡仔做伙摃野球。

　　彼日，散學轉來厝裡，伊歡頭喜面共老母講：「媽，我自今仔日起參加學校野球隊，以後散學攏會較晏轉來。」

　　伊的老母聽著這句話，面裡無啥物表情，干單呶[nauh]講：「參加野球隊敢愛另外交錢？」

　　「媽，毋免啦。」

　　聽著洪櫻應這聲「毋免」，老母才對嘴吩咐：「查某囡仔人毋通傷[siunn]野馬，拍球千萬愛注意安全，才袂舞甲大空細裂。」

　　事實上，拍野球拍到某一個坎站，一下認真到地，罕得有人無舞甲大空細裂。

　　洪櫻自加入野球隊起，就予林教練選做投手，佮遐的查甫球員仝款，逐日接受嚴格訓練。寢[tshim²]頭仔，伊毋捌任何投球技巧，干單知影出戇力共球投出去。林教練看出伊的優點佮特質，專工為伊傳教一寡投球的鋩[me⁵]角。

　　林教練佮洪櫻仝款攏是布農族出身的野球員。遮的蹛踮山內斗底的原住民族，佮平地漢人較無相像[siang⁷]的所在，就是怹的本性樂天、自然袂彎蹺。佇訓練野球的時陣，教練佮球員難免會有身體的接觸，親像講指導投球的手勢這類動作，甚至有東時洪櫻佇比賽抑是訓練當中，表現了不止仔gio²-toh，林教練嘛會共手幔[mua]咧洪櫻的肩胛頭表示肯定。

　　洪櫻勤學、目色巧，經過林教練調教，無偌久了後，伊就成做紅葉少年野球隊王牌投手。伊的名聲誠緊傳遍規個台灣島，逐回只要紅葉野球隊出外比賽，洪櫻攏是體育新聞報導的焦點，嘛會引起幾落間國中女子壘球隊相爭走來探聽。

　　彼個暑假結束了後，洪櫻隨欲升國中。雖然，幾落間國中的女子壘球隊願意提供獎學金予洪櫻，不而過，伊佮老母猶未做最後決定。干單有一點會當確定，只要洪櫻國中制服穿起哩身軀頂，伊的少年野球夢隨就愛收煞。所致，紲落來欲佇日本東京舉辦的遠東區少年野球賽，檢采有可能成做洪櫻佇野球比賽裡最後的身影。設使紅葉野球隊得著遠東區頭名，洪櫻連鞕[liam⁵-mi]愛綴球隊去到美國威廉波特（Williamsport）爭奪世界冠軍。

　　紅葉少年野球隊猶有一位受林教練致重的投手王俊源。

　　王俊源毋是布農族人。聽老母講，老爸佇伊細漢的時生理失敗，自按呢掣怹母仔囝唯西部走路來到台東的山內斗底，也就是怹所徛起的延平鄉紅葉村。不而過，老母自頭至尾毋捌講過怹永過蹛佇西部啥物所在，老爸以早到底做啥物款生理？伊干單知影，自伊捌代誌起，就足罕得看老爸做啥物正經頭路，三工兩頭只會曉伸長手共老母討錢。錢一下提過手，若毋是跋就是啉，有東時家後無錢通予伊，隨時跤tsinn拳頭侍候。所致，王俊源的老母不管時規身軀都烏青凝血。

　　烏青凝血罔烏青凝血，為著規家口仔生活，王俊源的老母穡頭嘛是愛拚勢做。伊佇菜市仔賣雞肉，佮平平蹛佇紅葉村、洪櫻的老母仝一個所在做生理，會當講是厝邊兼同行。有時陣，到甲菜市仔收市的坎站，怹兩人所賣的物件若猶有偆，就會青菜佮雞肉相換食，省得閣加一條買菜的開銷。

　　「做雞、做鴨無了時，做雞、做鴨無了時……」

　　王俊源的老母佇山內斗底賣雞肉做生理，無利便嘛無才調使用電動刣雞設備，姑二不終逐隻雞都愛家己親手送怹上西天。為著生活，使致虔誠信仰佛教的伊，著愛做這款殺生的代誌。所致，逐擺伊咧刣雞的時，嘴裡攏會硞[khok⁸]硞唸：「做雞、做鴨無了時，做雞、做鴨無了時……」

　　事實上，伊真知按呢唸，只是求一個心安而已。

　　王俊源佮洪櫻小學六年仝班，除了蹛佇仝一個庄仔內，尚且，嘛同時加入紅葉少年野球隊。

　　洪櫻頭毛剪甲短短、削甲薄厘絲，佇伊胸坎猶未發育，逗逗仔膨起來進前，若莫聽伊講話的聲音，唯外表看起來袂輸查甫囡仔。雖然，洪櫻的皮膚並原本白肉底的王俊源較烏，毋過，伊彼兩蕊重巡[ting⁵-sun⁵]大蕊的目睭，不時睨咧睨咧，看在目睭細蕊的王俊源眼內，活靈靈親像會講話相像。

　　彼款僫[oh]得形容的感覺，王俊源干單囥[khng³]踮心肝穎[inn²]仔，毋敢向任何人提起。

　　咻──

　　變化球。打擊者球棍仔摃出去，煞連球都無磕[khap⁸]著，球直接走入捕手的手套裡。

　　「媠啦。」林教練看洪櫻投出這粒到好球帶雄雄下墜的變化球，共伊比一枝大頭拇。

　　彼時，離遠東區少年野球賽干單偆兩禮拜。

　　林教練向所有隊員講愛好好仔加強訓練，咱這回相當有機會拍敗日本隊，到美國威廉波特參加世界少年野球賽。

　　伊特別要求洪櫻愛共變化球練乎較熟手咧，通好成做佇關鍵時刻拍敗日本隊的秘密武器。

　　彼日，王俊源練球練甲不止仔忝[thiam²]頭。球練煞，轉去厝裡，伊看著老爸坐踮客廳看電視，誠罕得無佮老母冤家勞債。伊心內想講：盈暗老爸毋知是食毋著藥仔，抑是天得欲落紅雨矣？食暗飽，伊連身軀都無洗，就行入去房間仔底，倒落眠床無一搭久仔隨睏甲毋知人。

　　半暝尿緊，王俊源跁[peh]起床欲去便所。伊房間門拍開一縫仔，就聽著一陣哼呻[hainn-tshan]聲。伊趖跤斂[liam²]手行出房間門，看著客廳暗毿[sam³]暗毿，不而過，電視猶咧發出光影，伊目睭揉兩下斟酌看，電視裡一個不止仔粗勇的查甫人赤身露體，硩[teh]佇一個相像赤身露體的查某囡仔身軀頂，彼個查某囡仔嘴裡那發出哼呻聲那講伊聽無半句的日本話。

　　紲落來，王俊源共目睭徙向離電視無幾步遠的膨椅頂。這回，伊看著家己老爸、老母佮電視頂面彼兩個人仝款赤身露體，老爸硩佇老母身軀頂，嘴裡呶講：「按呢，妳有爽無？按呢，妳有爽無？」老母紲嘴應講：「較細聲咧，毋通予囡仔聽著。」王俊源驚予老爸、老母影著，毋敢行去便所，趕緊閣趖跤斂手入去房間。倒佇眠床頂，伊感覺家己膀胱強欲煏[piak⁸]破。伊的腦海內一直轉踅拄才看著的畫面。

　　紅葉少年野球隊王牌投手洪櫻失踪。

　　這聲袂直矣。

　　林教練著急甲袂輸油鼎底的蚼蟻。隔轉日伊就欲掣領紅葉少年野球隊去日本東京，參加遠東區少年野球賽，洪櫻煞佇這個要緊的坎站拍無去。伊集合所有隊員隨個仔隨個探問，逐家攏講自昨日球練煞解散了後，就毋捌閣見過洪櫻的影跡。

　　洪櫻的老母煩惱甲袂食袂睏。伊干單這個孤查某囝，自細漢就參伊相依為命，設使若發生啥物意外，是欲叫伊按怎閣活踮這個世間？

　　警方接著通報洪櫻失踪的消息，毋敢延遷[tshian⁵]，隨時用上界緊快的速度，發布緊急揣人的通知，全國警察展開無暝無日搜查的工課。

　　媒體記者得著消息了後，電視新聞台每點鐘放送一擺，第二日早起，各大報紙攏囥踮頭版頭條報導，甚至連美國CNN佮日本NHK電視台嘛相連紲放送這條予人感覺怪奇的新聞。

　　第二日，天拍昲[phu²]光。林教練就佮紅葉少年野球隊隊員做陣坐飛行機，唯台東飛到桃園。佇桃園機場，林教練對全國野球協會的幹部千拜託、萬交代：「只要一揣著洪櫻，無論如何愛趕緊共伊送來東京。」

　　遠東區少年野球賽開幕了後，頭一場由台灣隊佮菲律賓隊比賽。雙方實力天差咧地，林教練差派原底第三順位的投手出戰，結局台灣隊以八比零輕輕鬆鬆拍贏頭一戰。紲落來，第二場台灣隊只要拍敗韓國隊，就會當參日本隊爭奪冠軍。

　　林教練心內按呢拍算：先派第二順位的投手王俊源出戰，先拍敗韓國隊才閣講。無定著時到洪櫻已經飛來東京，佇冠軍戰的時，就聽[thing³]好用伊來參日本隊對敵。毋過，若無揣著洪櫻，王俊源前一日已經出戰，按照規定，伊袂當閣出來對戰日本隊，按呢欲怎樣？

　　儘管林教練的心情起起落落，不而過，伊知影袂當予這款無定著的心情影響球員的表現。雖然，韓國是一支強隊，毋過，就林教練所收集的情報判斷，伊認定台灣隊拍贏的機會有八成以上。

　　韓國隊先攻，第一局王俊源投出兩擺三振，收拾對敵球員，另外一個共球摃到左外野，台灣隊的左外野手跳起來承著球，對敵被判出局。下半局，台灣隊靠兩支安打以一比零領先。第二局起，王俊源的表現袂輸變一個款，若毋是球捎[sa]來烏白掔[khian]變做暴投，就是球撣[tan³]出去軟弱無力，對敵輕輕鬆鬆就摃出幾落支全壘打。因為王俊源這款落漆的表現，嚴重影響全隊士氣，到甲第三局結束的時，韓國隊以九比一領先。第四局，王俊源予林教練換落來，行轉來休息區，教練問伊到底是按怎，哪會全然變一個款？王俊源頭殼偃[ann³]低低，據在教練按怎罵，毋應就是毋應。紲落來，替換王俊源擔當投手的球員閣予對敵得兩分，第四局結束，韓國隊以十一比一大敗台灣隊，比賽提早收煞。

　　到遮來，台灣隊包袱仔款款咧，林教練佮遐的隊員假若揜[iap]尾狗仝款，恬恬仔離開東京。當該然，紅葉少年野球隊轉來桃園機場的時，全然無甲半個人來接機。一直到甲怹轉去紅葉村的時，洪櫻嘛是攏無出現。

　　「這箍毋成[tsiann⁵]囝俊源也，是去卡著陰sioh，東時仔變甲遮呢低路。等你轉來，恁爸才講一個仔『完全三振』予你鼻芳。」彼日，台灣隊佮韓國隊對戰電視實況轉播，王俊源的老爸王明安自頭至尾看甲現現現。伊那看那幹天詆[tu⁷]地，那看那啜[sip]高梁酒，等到電視看煞，王俊源早就予伊譙甲無一塊好。

　　佇酒精催化的作用下底，佇茫茫渺渺的意識裡，王明安想起彼段一生中上界奢颺[tshia-iann⁷]的日子。

　　真久進前，王明安是朴子少年野球隊的王牌投手。

　　彼冬，朴子少年野球隊親像秋風掃落葉仝款，毋那佇全國少年野球賽無搪[tng⁷]著強猛的對手；紲落來，佇台北市立野球場舉辦的遠東區少年野球賽，相連紲拍敗印尼、香港、韓國、關島、菲律賓佮日本，每一場攏輕輕鬆鬆贏對敵十分以上；了後，怹取得代表權前往美國威廉波特參加世界少年野球賽，毋那得著彼屆冠軍，尚且，佇第二場出戰代表歐洲的義大利隊時，由王明安擔當投手，創下十八名打擊者全然被伊三振、永遠無可能夆[hong⁵]拍破的世界紀錄。

　　轉來台灣了後，朴子少年野球隊袂輸民族英雄，無論去到佗位行路攏有風。行政院長接見的時，特別對創下「完全三振」紀錄的王明安呵咾甲會觸[tak]舌。

　　自按呢，王明安讀國中佮高中的時，攏有幾落支野球隊相爭欲爭取伊。伊佇青少年佮青年野球隊的表現嘛無予逐家失望，相像捌入選國家隊代表台灣四界征戰。不而過，伊年久月深練變化球練了過頭，使致手骨嚴重損傷，落尾投球一點仔威力都無，最後只好恬恬仔退出野球場。

　　王明安高中卒業，因由家境散赤，厝裡無才調栽培伊閣讀大學，伊只好四界做散工，一直到甲入伍算饅頭。退伍了後，王明安才真真正正致覺伊除去野球以外，確實袂曉半項，干單有法度做靠體力的工課，伊捌做過碼頭夯貨、工地擔磚仔佮倉庫管理員。有一回，伊去引一間野球場管理員的頭路，對方知影伊的過去，就共伊詼[khue]講：「阮這間小小野球場，請袂起你這個18K的王明安。」王明安聽著遐的話，心肝凝甲足想欲踮塗跤挖[oo²]一空軁[nng³]入去。

　　無偌久了後，媒人紹介隔壁庄做穡人的查某囝春花也，兩姓合婚結連理。結婚了後，王明安想欲予某囝過較富裕的生活，伊靠標會仔的錢佇市內稅一間店面，開店做小生理。落尾，生理失敗，王明安某囝掣咧透暝溜旋[suan]，一路拚到後山台東，彼時，怹囝俊源也才拄度晬。自按呢，王明安消失佇茫茫人海，伊共家後交代，千萬袂使予後生知影伊的過去。想袂到，後生王俊源最後佮伊仝款行上野球這條不歸路。

　　王明安佇茫茫渺渺的意識裡，閣捀[phang⁵]杯啜一嘴高梁酒，醉倒佇客廳膨椅頂。

　　紅葉少年野球隊親像揜尾狗仝款轉來庄裡。

　　成禮拜後，彼冬第四號風颱唯東部登陸。紅葉村受災慘重，毋那村民種作的農作物規個去了了，春花也所飼的雞嘛予強猛的風颱掃甲屍橫遍野，有影予伊欲哭無目屎。

　　同時，山裡出現不止仔嚴重的塗石流，共一寡道路嵌嵌掉。風颱徙跤了後，經過施工單位無日無暝搶救，三工後，予塗石流嵌掉的道路才規個拍通。

　　有一位駛小山貓的布農族青年，無意中去搉[khat]著一袋烏色糞埽袋仔。伊原本掠準內面貯一般糞埽，偎近一下看，唯頂面的破空流出紅色的血水，伊敨[thau²]開攏總兩沿的糞埽袋仔，發現內面貯一具被人分屍的屍體。伊驚甲大嘴開hann⁷-hann⁷，趕緊敲手機仔通報警方。

　　警方接著通報，隨時稟告檢察官，檢察官佮法醫用上界緊快的速度趕到現場。經過法醫以科學方法驗屍，判斷死者大約十一、二歲的查某囡仔，死亡的時間差不多半個外月。

　　「檢察官，唯死者無完整的處女膜判斷，伊在生的時可能有遭受性侵害。毋過，目前無取得男性精液，嘛有可能是其他原因所造成的，這部分需要閣進一步調查。」法醫目頭結結，表情嚴肅對檢察官講。

　　「到底是啥物人手段遐呢粗殘，心肝掠坦横對遮呢少歲的查某囡仔下毒手？」檢察官看著夆分屍、已經漚爛的屍體，艱苦甲目屎含目墘。

　　檢察官向警方下令，隨時發布通告，請厝裡有查某囡仔失踪的家長前往殯儀館認屍。

　　洪櫻的老母秋娥也，自從查某囝失踪半個外月來，逐日煩惱甲袂食袂睏，有目屎哭甲無目屎。伊的心情霉[bai²]甲透底，自按呢無去菜市仔賣菜，每工早暗徛踮翁婿的遺像頭前祈求：「勝聰也，拜託你保庇緊揣著咱查某囝洪櫻。」

　　伊彼段時間無咧看電視、讀報紙，無想欲知影外面天地發生啥物代誌。因由這個緣故，秋娥也當該然毋知影媒體頂面咧報分屍案的代誌，嘛當該然毋知警方發布認屍通告的消息。好佳哉，厝邊知影這項消息了後，有人走來共伊講，伊才知通去殯儀館認屍。落尾，經過認屍佮DNA比對，證明分屍案的女主角就是秋娥的查某囝洪櫻。

　　咻──

　　下墜球。秋娥也知影洪櫻被分屍，心肝疼搐[tiuh]搐。

　　佇東京拍輸球，面子盡掃落地的林教練，心肝仝款疼搐搐。

　　轉來庄裡的第二日，林正義就向紅葉國小校長辭掉野球隊教練的職務。失去兼任教練的工課都咧悽慘矣，想袂到，承辦洪櫻分屍案的檢察官頭一個憢[giau⁵]疑的對象就是伊。

　　彼日，天咧落霎[sap]霎仔雨。林正義佇厝裡聽著挵門聲，拍開門看著檢察官佮警員徛佇伊面頭前，規個面並天色閣較暗烏。

　　「林正義，洪櫻是毋是妳刣的？」一踏入門，檢察官隨呶這句話。

　　「檢察官，你無證無據，哪會使烏白誣賴人？」林正義面仔氣掣[tshuah]掣，用目睭凝檢察官，「刣死洪櫻對我有啥物好處？這件命案，除了洪櫻佮怹老母，我是上界大的受害者。你共想看覓，假使洪櫻無夆刣死，綴阮去東京拍遠東區野球賽，真有可能得著冠軍，紲落去威廉波特摃世界野球賽，無定著阮即馬已經成做行路有風的英雄，四界受人歡迎，我這個教練嘛袂舞甲無頭路。」

　　「無定著你是想欲戲弄伊，戲弄無成，措手共伊刣死，為著消滅證據，只好將屍體剁做幾落塊，埋踮荒郊野外的山裡。佳哉，天公有目睭，風颱水崩山，清理道路的時，予小山貓搉著貯屍體的烏色糞埽袋仔，規個代誌才煏[piak]空。」檢察官講。

　　「洪櫻是我的學生，而且伊猶是一個囡仔疕[phi²]，我哪有可能會去戲弄伊？」林正義應。

　　「林正義，我欲哪會知影你是毋是變態？聽講你平常時咧練球的時，定定共手幔咧洪櫻的肩胛頭，這點我無枉屈你，阮有證人聽好證明。你敢毋捌聽人講『男女授受不親』這個道理？」

　　「檢察官，阮布農族的人天性自然樸實，毋捌遐的漢人的大道理。我會共手幔咧洪櫻肩胛頭，毋是欲食伊的豆腐，只是單純表示鼓勵的意思。」

　　兩個人一句來一句去，那講火氣那大。

　　最後，檢察官欲離開進前放刁：「林正義，你誠敖[gau⁵]辯話骨。上好莫予我揣著明確的證據，若無，阮會直接將你逮捕歸案。」

　　彼暗，王俊源半暝尿緊起床，看著伊這世人頭擺親目所見的畫面。遐的電視內面男女交纏佮膨椅頂懸爸母身疊身的影像，予伊看甲心狂火灼，轉去房間了後，伊的腦海內一直轉踅彼寡若實若虛的鏡頭。因為毋敢去便所，王俊源的膀胱強欲煏破，伊一直忍一直忍，一直忍一直忍，實在忍袂牢，伊才凊采捎一跤塑膠橐[lok]仔，共尿放入內底，了後塑膠橐仔綁乎絚[an⁵]，到甲天光進前，伊確定爸母無佇客廳，才趖跤歛手塑膠橐仔捾咧，共內底的尿倒入便所的馬桶。

　　隔轉日過晝，王俊源藉口頭殼疼，共林教練請假，彼下晡自按呢無練球。行到停車棚，伊鐵馬牽咧，緊猛出力lap，lap無幾分鐘，就拚轉來厝裡。伊真知老母這個時陣猶佇菜市仔賣雞肉，老爸若毋是四界天天醉，就是咧佮彼陣徼[kiau²]友跋甲毋知人去。天氣熱甲，伊共電風揤[tshih⁸]上強速，內外衫總褪掉，褪甲偆一領四角內褲，伊大肆機拍開電視佮光碟機的電源，看著昨暝彼塊片仔猶佇咧，play揤落，傱[tsong⁵]去冰箱提一罐塑膠罐仔裝的冰茶出來，那看影片那啉冰茶，成點鐘的影片看煞，規罐冰茶嘛予伊灌甲焦焦。

　　影片看煞，王俊源緊傱入便所，共內褲扭[giu²]落來，用雙手去消敨伊拄才咧看影片時的慾望，消敨了，轉去客廳衫褲挔[hiannh]咧入去房間，無偌久就睏甲十八殿去。

　　秋娥也確認洪櫻死去的隔轉日，就將伊的相片提去放大加框，掛踮廳頭翁婿洪勝聰的遺像邊仔。

　　秋娥也逐工等待警方早日破案，心情親像海湧浮浮沈沈，根底就無心思閣去菜市仔賣菜。伊每工踮佇厝裡，過日假若咧度年，苦袂得時鐘行較緊咧，趕緊予警方掠著殺害洪櫻的兇手，通好安慰查某囝在天之靈。

　　伊恬恬仔徛佇爸囝遺像頭前，一面目屎掣流，一面想起永過遐的苦甜摻濫的日子。

　　洪勝聰是第一代紅葉少年野球隊隊員洪連發的細漢小弟。佇伊成長的年代，紅葉少年野球隊已經解散幾落冬。小學五年，伊轉學到台東市區免學費閣提供食蹛的學校參加野球隊，因由表現gio²-toh的緣故，國中佮高中階段攏順利加入西部有名的野球隊。

　　台灣成立職業野球聯盟了後，洪勝聰隨加入鷹隊效勞。彼時，伊佇鷹隊內面，是一位不止仔上腳[tsiunn⁷-kioh]的投手，逐月日的薪水予伊過甲相當富裕。

　　不而過，伊並無因為日子奢颺來袂記家己的出身。

　　秋娥也是洪勝聰小學同窗，嘛是青梅竹馬的愛人仔。彼時，伊佇台北百貨公司徛專櫃賣化粧品，外表看起來穿甲媠噹噹，事實上，一日徛咧上班成十點鐘，不時徛甲撐[thenn³]腿，若歹運搪著漚客，滿腹委屈干單會當吞腹內。

　　「秋娥也，共百貨公司的頭路辭辭掉，我即馬趁的錢咱兩個人用，猶閣誠冗剩[liong⁷-siong⁷]。」洪勝聰毋甘秋娥食苦。

　　無偌久了後，秋娥也有影共百貨公司的工課辭掉，嫁予洪勝聰，專心踮佇厝裡發落家內事。閣過冬外，秋娥生一個目睭大蕊閣重巡的查某嬰仔，號名洪櫻。

　　初開始，世間的幸福、美滿假若攏降臨佇洪勝聰這口灶。有某、有囝、有厝閣有車，洪勝聰平素時仔認真投球，球季佮球季之間的閬[lang³]縫，車駛咧掣某囝四界遊山玩水，人生的樂暢不過如此。

　　啥知，人心較大咧牛肺。洪櫻度晬過無偌久，洪勝聰佮鷹隊一綰若肉粽綰的球員，受組仔頭重利唌[siann⁵]龜弄甕，佇兩軍對敵的時刁意故放水、拍假球。這款明顯做手的情形相連紲發生幾落擺，引起檢調單位注目。落尾，經過長久調查，洪勝聰夆判刑一年，緩刑三年，嘛被職業野球聯盟列入開除名單，永遠離開野球界。

　　發生這件見笑代，洪勝聰車佮厝總賣掉，某囝掣咧回轉故鄉重新開始。轉來紅葉村，洪勝聰才發現伊除了野球以外，無甲半項穡頭做會上手。寢頭仔，手頭猶有進前趁的錢儉儉仔開，時間一下久，秋娥也感覺按呢毋是辦法，伊聽厝邊春花也的嘴，開始佇就近的菜市仔排擔賣菜，洪勝聰姑不終只好四界溜溜去，綴人佇每一角勢的工地做粗工。啥知，天公伯偏偏仔欲佮伊做對頭。有一日，伊唯鷹架仔頂予一陣強猛風搧落來塗跤兜，頭殼嚴重出血來離開世間。彼時，洪櫻猶未滿五歲。

　　洪勝聰永過參野球所有牽礙的代誌，秋娥也全然毋捌講予洪櫻知影。伊閣較料想袂到，洪櫻會踵[tsing²]著老爸拍野球的細胞，佇紅葉少年野球隊重新成立了後，變做王牌投手。

　　洪櫻分屍案爆發了後，檢警雙方無論按怎拚命調查，較查都查無明確的證據。有一日，檢察官掣警員來洪櫻厝邊王家挵門，彼時，厝裡干單王明安啉酒醉佇客廳睏。王明安佇眠眠中予一陣呯嗙[pin² piang³]叫的挵門聲吵精神，拍開門看著檢察官佮警員，「恁來阮兜是欲創啥？」王明安夆吵精神，一口喟無地敨，聲嗽無通偌好。

　　檢察官有探聽著王明安食飽閒閒無代誌做，規日浪溜漣，毋是跋就是啉，懷疑伊凡勢酒後亂性，措手刣死洪櫻。王明安講伊自頭至尾根本毋知影啥物分屍案，尚且，分屍案發生彼段期間，伊攏佮朋友咧跋徼，人哪有可能是伊刣的？

　　「我王明安雖然是一個廢人，毋過，我猶知影攑頭三尺有神明的道理，拍死，我嘛袂去刣人。」

　　彼暗，家後春花也轉來，王明安佇伊面頭前操幹譙，「幹，毋知啥人遐呢夭壽骨，一個查某囡仔人伊也刣會落手，這款人應該愛予伊落地獄。」春花也無應甲半句話，直接行入灶跤。

　　落尾，經過警方調查，發現王明安涉嫌的可能性誠低。

　　咻──

　　上飄球。過無幾日，一個落雨天的透早，一個查某人行入派出所。

　　春花也無攑雨傘嘛無穿雨幔，規身軀沃甲澹漉漉，頭鬃散掖掖，一行入派出所，就向值班警員表明，講伊本人就是洪櫻分屍案的兇手。

　　值班警員先提一條面巾予伊共頭鬃拭乎焦，順紲斟[thin⁵]一甌燒茶予伊。

　　警方簡單替春花也做一份筆錄，就將伊移送地檢署。

　　「江春花，洪櫻佮妳無冤無仇，妳是按怎欲共伊刣死閣分屍，老實招來？」春花也被送入地檢署，承辦分屍案的檢察官問伊的頭一句話。

　　「我按呢做，攏是為著阮後生。」春花也面裡無任何表情，勻勻仔應這句話。

　　「到底啥物理由，講來聽看覓？」

　　「眾人攏知影洪櫻是野球隊王牌投手，我咧想，設使伊若失踪，阮後生王俊源去東京拍球，就聽好接伊的缺。」

　　「因為這款理由，妳就共一個查某囡仔刣死閣分屍，這是我聽過上界譀[ham³]古的刣人原因。」檢察官目睭展大蕊凝春花也，「事實證明，咱的野球隊佇東京拍輸球，第一號罪人就是恁後生王俊源。」

　　春花也予檢察官尾後這句話詆一下，頭頕[tam³]頕無話通應。

　　「江春花，妳共按怎刣人分屍的過程，原原本本講出來。」

　　檢察官向書記官使一個目尾，書記官準備佇伊面頭前的Notebook頂面拍字。

　　春花也啉一嘴茶，開始講伊刣人的經過。

　　彼日下晡，我雞肉賣了較早收擔。轉到厝前，拄好搪著洪櫻唯學校轉來。我心內想講機會來矣，就共伊講：綴阿姨入來厝裡，我有好料的欲予妳食。洪櫻綴我行入客廳，我喚伊先坐咧，家己一人入去灶跤，用果汁機絞一甌西瓜汁，順紲佇內面偷偷仔摻一包迷魂藥。我共西瓜汁捀予洪櫻，喚伊先啉西瓜汁止嘴焦，我隨入來剁一盤土雞仔肉請伊食。洪櫻西瓜汁啉無幾嘴，迷魂藥藥效隨起磅，伊規個人自按呢死死昏昏去。我趕緊將伊拖入浴間仔，走去灶跤攑一枝上利的菜刀，用我普通時刣雞的手勢，唯頭開始，紲落雙手、雙跤，才閣規個身軀，攏總剁做七、八塊。我一面剁一面嘴裡那唸：「做雞做鴨無了時，做人嘛無了時。……」我那剁伊的血那霧，噴甲規個浴間仔。我提兩跤烏色的糞埽袋仔套做伙，了後，共伊的屍體一塊仔一塊橐入糞埽袋仔。我緊用水濂頭共浴間仔的血水洗清氣，趁無人注意的時，拖一台搡[sak]車將屍體運到後山埋起來。

　　「妳咧做這件代誌的時，恁厝裡敢猶有其他的人？」春花也一講煞，檢察官隨接咧問。

　　「無，獨獨我孤一人佇咧。」春花也應甲不止仔肯定。

　　「書記官，共筆錄提予江春花簽字。」檢察官吩咐。

　　春花也筆錄簽了，檢察官認為伊刣人嫌疑誠重，即時裁定收押禁見。

　　洪櫻失踪進前成禮拜。

　　彼日，伊唯學校轉來厝裡，雄雄狂狂共老母秋娥也扭入房間。

　　「媽，我有代誌想欲共妳講。」

　　「戇囡仔，妳有啥物代誌毋著緊講。」

　　「媽，我身軀流血矣。」洪櫻的嘴仆踮秋娥耳空邊，細細聲仔講。

　　「是佗位咧流血？」秋娥也不止仔緊張，掠洪櫻的跤手佮身軀金金相。

　　「是遮啦。」洪櫻共內外褲作一下褪落來，露出規片暗紅色的血跡。

　　秋娥也拄才緊張的面色轉淡薄仔笑意。

　　「媽，妳哪會咧笑？」洪櫻捎無寮仔門。

　　「洪櫻，媽媽愛共妳恭喜，因為妳轉大人矣。」

　　「轉大人？」

　　「是啦。以後妳每個月攏會來一擺，這號做『月經』，嘛有人講是『月信』抑是『月洗』。行，咱來去浴間仔拭乎清氣。」

　　「我的衛生棉妳暫且先用，另日，才來去藥房買一包予妳。」入去浴間仔，秋娥也教洪櫻按怎使用衛生棉。

　　「媽，妳看。」下身清理好勢，洪櫻共運動衫掀起來，伊的胸坎略仔膨起來，親像一座小山崙仔。

　　「妳有影大漢矣。」秋娥也那看那嘴笑目笑。

　　「洪櫻，媽媽對不起妳。袂赴掣妳去買奶帕仔，妳就無張無持來過身。」徛踮洪櫻遺像面頭前，秋娥也一面回想一面流落悲傷的目屎。

　　承辦洪櫻分屍案的檢察官，暫且將春花也收押。伊召來法醫，共春花也的口供提予法醫看。法醫看了後，唯春花也刣人的手法判斷，初步斷定伊是兇手的可能性有九成以上，不而過，必須愛先將兇刀揣出來。檢察官再度調問春花也，問出兇刀可能的下落。紲落，檢察官指揮警方，經過三暝三日，誠無簡單才揣著兇刀。經過檢驗，兇刀頂面確實有洪櫻的血跡佮春花也的指紋。檢察官喚春花也手攑兇刀，閣做一擺當初刣人的手勢，法醫看煞，向檢察官頕頭。到甲這個坎站，檢察官直接向地方法院提起公訴，雖然，春花也是自首，毋過，檢察官認定伊惡性重大、手段粗殘，決定共伊求處死刑。

　　法院開庭彼日，天色烏陰烏陰，霆[tan⁵]雷公欲落雨。

　　春花也的翁婿王明安佮後生王俊源攏來法院旁聽，苦主秋娥也嘛佇現場。當等法警將春花也押出庭，秋娥也緊猛傱偎，出手唯春花仔胸坎舂[tsing]兩下，那摏那詈：「春花也，妳哪會遮呢夭壽骨，無采我共妳當做姊妹仔，按呢妳也刣會落手。」

　　「鄭秋娥，妳若閣擾亂法庭，本庭就欲請妳出去。」法庭庭長大聲喝[hat]，秋娥也才乖乖仔轉去伊的座位。

　　審判開始。審判長當欲開始宣讀被告犯罪事實，王俊源雄雄攑手，「人毋是阮媽媽刣的。」法庭內眾人齊[tsiau⁵]予這句大聲甲產生回音的話掣一趒，春花也原本無表情的面嘛規個變款。

　　「人是我刣的。」王俊源紲落這句話閣較予逐家著驚。

　　「俊源也，你是咧烏白講啥？」王明安佇邊仔共王俊源掩嘴。

　　「我無烏白講。」王俊源共老爸的手掰[pue²]掉。

　　「逐家恬恬，聽伊按怎講？」審判長出聲。

　　王俊源將代誌發生的頭直來尾直去作一睏講出來。

　　彼日，王俊源佮洪櫻球練煞，做陣唯學校轉來。行到門嘴，王俊源共洪櫻講：來阮兜，我有好看的物件分妳看。入去客廳，王俊源代先斟兩甌冰茶，隨人面頭前囥一甌。伊拍開電視佮光碟機電源，唯 play揤落，內面的光碟片開始轉踅。電視螢幕頂面代先出現「野球迷」三字片名，紲落，一位身穿粉紅色洋裝，目睭重巡大蕊的媠姑娘仔出現佇野球場，伊歡頭喜面走向一位體格粗勇的野球員，見面就熱情共對方攬咧，閣踮伊的面唚[tsim]一下。閣紲落，鏡頭直接徙來一間賓館的房間，一入門，媠姑娘仔自動將衫褲褪掉，野球員嘛做仝款的動作。這寡畫面，頂日仔王俊源早就看過一擺，伊無想欲閣浪費時間，片仔繼續走，伊規個人心狂火灼，緊猛共洪櫻攬絚絚，一手去挲洪櫻的胸坎，順紲欲共褪衫，洪櫻出力踜[liong³]開，大聲喝：「我欲來轉。」王俊源閣揤偎過，洪櫻踢著伊的下身，王俊源無顧咧疼，大力共洪櫻規個人硩咧下底，洪櫻雙手一直掰，雙跤一直踢，洪櫻愈踢，王俊源愈掠狂，一個措手，共洪櫻的頷頸摧甲斷喟。佇內底睏晝的春花也，予外面呯呯嗙嗙的聲音吵精神，出來一看，後生措手拍死人，伊唯後生的嘴頗[phe²]出力共搧落，「俊源也，你哪會做這款戇代誌？」「我攏嘛是學恁的。」王俊源對嘴應。春花也那看電視頂的畫面目屎那流，「你緊匿入去房間，偆的我來處理。」紲落，就是春花也將洪櫻拖入浴間仔了後分屍的過程，這部份伊頂回已經向檢察官講過。

　　「俊源也，你哪會遮呢戇？」王俊源將規個過程講煞，春花也呶這句話。

　　王俊源因為猶未滿十四歲，按照刑法規定免受處罰。落尾，少年法庭根據少年事件處理法，裁定王俊源接受感化教育三冬。

　　江春花予法官以刑法第247條侵害屍體罪，宣判上重的五年有期徒刑。

　　王俊源入去少年感化院無偌久，林正義來共伊面會。

　　「俊源也，你敢會當共我講，彼回佇東京，你投球哪會失常？」

　　「教練，我投球的時，目睭前一直出現洪櫻的人影，一時失神，球才會烏白投。」

　　咻──

　　指叉球。一個禮拜下晡時，林正義閣倒轉來紅葉國小。校園裡除了蟬仔聲以外，無看著半個人影。

　　徛佇日頭光艷的運動埕。林正義心內上界大的遺憾，是赴袂教洪櫻伊第一在手的指叉球。

──2013.6.10寫佇赤崁南門仔

    　2014.3.5《台江台語文學》第九期