瓦斯爐的火切灼，倒一絲仔沙拉油，敲兩粒卵落鼎。這款動作，桂仔算袂清頭尾做過偌濟擺？這陣，伊那煎卵包那咧流目流，毋是因為油煙蒸[tshing³]目睭的緣故，是為著伊的孤囝俊秀，永遠永遠攏無法度閣食著伊親手煎的卵包咧艱苦心。

　　「桂仔，咱較過彼个夜市仔講欲開一間百貨公司，妳敢知？」厝邊阿霞走來共桂仔thok頭。

　　「是有聽人咧會。開那伊咧開，咱這號散良人哪行會起百貨公司？」桂仔無意啊無意應。

　　「無喏，聽講開幕彼工，一盒雞卵才賣十箍銀，足足僎[tshuan⁵]咧成千盒，咱作陣來去搶好空的。」阿霞那講那嘴笑目笑。

　　「阿霞，妳敢有聽講一人會使買幾盒？」桂仔雄雄目睭展大蕊，耳空搤[iah]利利。

　　「講是一人孤會使買一盒。妳插[tshap]插伊遐濟，」阿霞目尾掠桂仔捽[sut]一下，「咱煞袂曉買一盒了後，先提來去藏，才閣重頭佮人排列。」

　　「有影妳較巧。按呢，我加買幾盒仔，通好煎卵包予阮俊秀仔食。」桂仔講著孤囝俊秀，規个口氣加誠軟略，展現慈母的面容，「著啦，妳敢知影底時開幕？」

　　「聽講這月日十五彼工。」

　　「十五，哪會遐拄好？阮俊秀仔隔轉日十六欲去做兵。」桂仔家己踅踅唸，聲音細聲甲阿霞聽無伊咧講啥。

　　正實十五彼工，早時十點百貨公司開幕，阿霞佮桂仔八點就傱[tsong⁵]去佮人排列。原底掠準怹會當搶著頭香，到位的時，煞看著隊伍早就排甲躼躼長。

　　「今，是咧排頭殼一空的，咱遮呢早來，煞排甲遐呢後壁。」阿霞無好聲嗽。

　　「阿霞，較有耐性咧。為著欲買俗物，較久嘛著等。」

　　「頷頸生瘤──拄著矣，無欲按怎？」

　　差兩分十點，百貨公司的電動鐵門沓沓仔扭[giu²]懸。

　　十點一下到，鑢[lu³]甲金噹噹的大片玻璃門拍開。徛佇玻璃門雙爿邊仔，是兩排穿插齊整，看起來假若百貨公司主管的男男女女。怹向入門的人客拽[iat⁸]手、偃[ann³]腰，聲喉放盡磅號齊喝出「歡迎光臨」。

　　遐的排到夜市仔口，一逝[tsua⁷]長躼躼、躼躼長的人客，才無咧致意遮的斯文人的斯文喟[khui³]。怹一看見玻璃門拍開，眾人袂輸蜈蜞咬蛤，無咧管汰服務人員指揮，作一睏傱落地下一樓食品部。排列那咧排列，到甲這个坎站，彼陣青狂搶欲買卵的人客，早就親像痟狗咧摏[tsing]墓壙，共人百貨公司峙[tshai⁷]咧通路的指示牌撞甲東倒西歪。

　　「請各位排列排乎好勢，」食品部服務人員手提一枝放送頭大聲喝：「一人干單會使買一盒，免相爭，保證逐家通通有獎。」

　　「Hann⁵，閣愛排列哦。」聽著放送，一堆人攏咧吐大喟。

　　當等眾人重頭排列的閬[lang³]縫，跤手猛掠的阿霞，共桂仔牽咧，三步作兩步傱去隊伍頭前。現現峙踮怹面頭前的，是兩排疊甲phing⁷怹較懸的殕[phu²]色塑膠箱仔，徛佇塑膠箱邊仔有三个穿制服的服務人員。

　　「桂仔，這盒先予妳。」等咧規晡久，誠無簡單才唯服務人員手裡接過一盒雞卵。阿霞好意欲轉交予桂仔，誰知，後面雄介介伸出一枝手，出力掰[pue²]著貯雞卵的透明薄塑膠盒仔。原底塑膠盒仔的嘴口干單用兩枝釘書針釘咧，予人一下掰，嘴口煞開開，兩粒雞卵無聲無說，佇一目睨仔的時間裡飛出來，卵殼相叩，卵仁、卵清攪濫作伙，拄好滴咧桂仔的頭殼頂佮面裡。

　　「妳這个痟查某，哪會遮呢無家教。」阿霞看著桂仔滿面全雞卵的樣相，規腹肚火作一下夯起來，「差無半分鐘，是咧搶心酸的是否？共人舞甲規面，猶毋緊會失禮。」

　　「妳這隻破狸，妳講啥人痟查某？」對方毋那無會不是，尚且聲喉無咧落軟。

　　「我咧幹恁祖公，呸！」阿霞毋那出嘴幹譙，閣共對方呸一嘴瀾。

　　對方無疑誤阿霞會出這招，煞雄雄愣[gang⁷]去，等伊回神過來，隨出手揪阿霞的衫褲。阿霞倒手手紻[ng²]予伊揪甲破去，規个人掠狂目睭展大蕊，出力唯對方的嘴頗[phe²]共揌[sai]落。

　　嗶！嗶！嗶！

　　百貨公司服務人員看場面強欲無法度控制，趕緊歕嗶仔。

　　「請兩位毋通閣冤家，若無，阮的雞卵欲總收起來。」放送頭閣一擺出聲。

　　「阿霞，莫閣冤矣。」早就共面裡卵汁拭掉的桂仔，倒手提彼盒偆八粒卵的塑膠盒仔，正手伸出來牽阿霞，沓沓仔行向出口。

　　「桂仔，我的卵都猶未買咧。」阿霞心內誠毋甘願。

　　「先來轉，我才共妳講。」桂仔口氣平和，袂輸無發生任何紛爭仝款。

　　「桂仔，手面洗好緊來食早頓，等咧通好去學堂讀冊。」桂仔的老母英仔佇灶跤大聲喝。

　　「阿母，我來矣。」拄才入學讀小學的桂仔那行那應話。

　　事實上，桂仔是英仔佮發仔的養女。英仔嫁予發仔五、六冬猶無生，翁仔某參序大人參詳，走去隔壁庄共拄好滿月的桂仔焣[tshua⁷]轉來育[io]。英仔翁某偎靠做山穡飼一家大細，日子雖然無通偌快活，毋過，怹共養女桂仔當做親生囝疼惜，予伊讀冊捌字兼知影做人的道理。

　　「桂仔，妳看，阿母煎妳上界愛食的菜脯卵。早頓食煞，桌嵌嵌咧，緊去學堂。我欲來去做山穡矣。」英仔話講煞隨行向厝外。

　　桂仔看著桌頂有伊愛食的菜脯卵，緊猛剪一塊囥[khng³]入碗裡，一嘴白飯、一嘴卵，一嘴白飯、一嘴卵，食甲嘴笑目笑、歡頭喜面。講是菜脯卵，其實菜脯濟過卵，毋過，對猶少歲的桂仔來講，這已經是人間好滋味矣。

　　落尾，桂仔讀到小學卒業，真知厝裡環境艱難，共爸母講伊無欲閣考初中。自按呢，綴序大鬥陣做山穡，一直到甲滿十六歲，才去市內織布會社做女工。後來，熟似貨車運轉手忠仔，兩人相意愛組織家庭。頭起先，家庭和樂美滿，無偌久，孤囝俊秀出世，厝裡的氣氛加誠鬧熱，怹翁某逐日笑甲嘴仔裂獅獅。誰知，千算萬算毋值得天一劃。俊秀三歲彼冬，一个落大雨的暗頭仔，忠仔佇轉來厝裡半路，貨車佮人相撞煞來過身。拄知影這層不幸事故的時，桂仔規个人強欲起痟。落尾，伊想著孤囝俊秀猶稚稚漢仔，失去父愛以後閣較需要伊的母愛，這个甜蜜的負擔是伊這世人無法度推卸的責任。

　　自彼時起，桂仔為著予俊秀無煩無惱大漢，佇外頭佮人會當比並[phing⁷]，伊共食苦當作食補，唯[ui³]死的做倒轉來，逐日自透早拚到暝半，啥物工課都做，誠無簡單才共俊秀栽培到大學卒業。

　　自細漢，老母為著生活無停走傱，無偌濟冗剩[liong⁷-siong⁷]時間陪伴佇俊秀身軀邊。雖然，失去老爸疼痛的俊秀，心肝內有一位外人看袂著的暗影，毋過，伊誠捌代誌，不止仔會曉想，無因為按呢來學歹，這是桂仔上界安慰的代誌。俊秀對物質的要求無懸，獨獨興一味，就是桂仔親手煎的卵包。

　　「桂仔，妳是咧著猴是否？也毋是咱毋著啊，妳牽緊緊是咧牽心酸的。」予桂仔牽出百貨公司的阿霞猶咧氣掣[tshuah]掣。

　　「阿霞，我知影毋是咱毋著。失禮啦，無，我這盒卵予妳，當作共妳賠罪。毋過，拜託妳留兩粒予我，另日我才補妳。阮俊秀明仔載欲做兵，盈暗我煎兩粒卵包予伊稍過癮[gian³]咧。」桂仔好聲好禮對阿霞講。

　　「妳嘛咧三八有偆，咱是好厝邊兼好姊妹呢，我才無咧參妳計較。」聽桂仔按呢講，阿霞原底懊嘟[tu⁷]嘟的面容，煞隨時變一个款，「歹年冬厚痟人，算我衰去搪[tng⁷]著痟查某。無差，恁祖媽今仔日袂猴癮食卵。桂仔，妳免插我，緊捾[kuann⁷]轉去煎予恁俊秀仔食。」

　　彼日欲暗，俊秀剃一粒金光頭踏入家門。桂仔一看著彼粒金光頭就目屎流目屎滴，伊毋是咧毋甘俊秀頭殼頂彼簇原底蓊蓊的頭毛，是因為閣過十捅[thong²]點鐘，面頭前這个佮伊互相偎靠二十冬的孤囝，就欲離開身軀邊入營做兵。

　　「媽，妳免煩惱啦。我若有放假，會緊轉來看妳。」俊秀真知老母咧毋甘伊，趕緊出嘴安搭。

　　「你這个憨囡仔，拄入去訓練中心哪有通歇睏？你一到位，知影番號了後，隨寫批轉來，禮拜時仔我才去兵營面會。」桂仔顯露慈母的面容。

　　「媽，妳平常時工課遮呢辛苦，禮拜時仔留踮厝裡歇睏。一逝路長躼躼，妳免來看我無要緊。」

　　「穡頭較按怎無閒，囝咧做兵哪會使無去面會？俊秀仔，我會注意身體，你安心去做兵，毋免煩惱我。」桂仔那講話那貯一碗飯予俊秀，「來，緊來食飯。媽早起佮恁阿霞姨仔，去新開幕的百貨公司搶著一盒十箍銀的雞卵，作一下攏共煎做卵包，盈暗看你愛食幾粒就食幾粒，食無了的，明仔載做早頓抑是紮[tsah]去路裡食。」

　　「媽，妳嘛食一粒。」俊秀唯面頭前的盤仔內，挾一粒卵包囥咧桂仔碗裡。

　　「好，緊食。」桂仔咬一嘴卵包，目屎隨閣輾[lian³]落來。

　　隔轉日早起，天色烏陰烏陰，初昇的日頭匿[bih]佇雲蕊後壁。

　　早頓食煞，桂仔共食無了的卵包佮饅頭貯咧塑膠橐[lok]仔，交代俊秀路裡腹肚若枵，愛會記得提出來止飢。了後，桂仔騎伊彼台十外冬歷史的Oo-too²-bai²，載俊秀去車頭等車。

　　「俊秀仔，人講『在家日日好，出外朝朝難。』做兵代不比佇厝裡，凡事愛較吞忍咧，毋通搶欲出頭，知否？」俊秀欲上車進前，桂仔特別共吩咐。

　　「媽，我知啦。」

　　「媽，我知啦。」聽著俊秀應這句話，桂仔的心內有淡薄仔安慰，伊知影俊秀會聽伊的嘴，一冬十個月後，伊的孤囝會平平安安踏入家門。

　　俊秀欲入兵營進前應的這句話，袂輸一分鐘前才傳入來桂仔的耳空。誰知，偆無一月日就挺好退伍的俊秀，予老母等著的毋是平安健康的笑容，是一具冰冷無血色的遺體。

　　彼日過晝，桂仔佮厝邊阿霞佇門嘴開講。講有一睏仔，本底就烏陰的天色開始霆[tan⁵]雷公，兩人當欲煞鼓的坎站，一个規身軀草綠色制服、頭戴圓盤帽仔的郵差，騎一台Oo-too²-bai²來到面頭前，喝一聲：「張阿桂，限時掛號批。」

　　「我入來提印仔。」桂仔提印仔領著批了後，嘴裡呶[nauh]講：「咱哪有這號限時掛號批？」

　　阿霞目色巧，看著牛皮紙做的批殼倒手爿印郵政信箱的番號，隨臆著是部隊寄來的。

　　「阮俊秀仔偆無一月日就欲退伍，部隊閣寄掛號批是有啥物要緊的代誌？」桂仔那講目睭皮那咧趒[tio⁵]跳。

　　「桂仔，先免緊張，拆開看覓就知代誌輕重。」阿霞佇邊仔安搭桂仔的心緒。

　　批殼拆開，抽出批紙。雖然頂面才短短幾行字，毋過，彼幾行字予桂仔的打擊，袂輸去予雷公熾爁[sih-nah]摃著心慒。桂仔那看一雙手那咇[phih⁸]咇掣，目屎親像掣流的溪水，作一睏唯伊兩蕊目睭拚出來。伊足希望伊的目睭脫窗看重誕[ting⁵-tann⁵]去，「查　上兵陳俊秀因公殉職……」遐的字是拍字兵拍毋著去，伊的俊秀連鞭[liam⁵-mi]就欲轉來身軀邊，佮伊享受天倫之樂。

　　雷公熾爁一聲紲一聲，天頂開始咧摔[siang³]大雨。

　　阿霞看毋是勢，緊共桂仔牽入厝裡。

　　搦[lak⁸]佇桂仔手裡彼張公文紙，予雨沃甲澹去，頂面的字親像烏墨予水喥[too³]開仝款。

　　「我的心肝仔囝，我的心肝仔俊秀……媽媽隨來去看你……」桂仔那哮那欲傱出去，予阿霞揪牢[tiau⁵]咧。

　　「桂仔，代誌發生都發生矣。古早人講：『人死不能復生』，妳著較儼[giam²]硬咧。這陣外口咧落大雨，明仔透早我陪妳來去兵營，為咱俊秀仔討一个公道。」

　　彼暗，桂仔一暝哭天光。

　　第二日透早，桂仔參阿霞坐頭班火車，坐兩點外鐘久，落車了後閣搬一班客運，坐咧點捅鐘，才來到踮佇小鎮外圍的兵營。

　　徛佇兵營大門的衛兵長檢查桂仔搦踮手裡的公文了後，請怹兩人先入去會客室聽[thing³]候，紲落敲電話通知連長。無到五分鐘久，連長、輔導長、排長作陣行入會客室，怹代先共軍帽提落來，向桂仔佮阿霞行一个禮。

　　「陳太太，實在真失禮。攏是阮的疏忽，無共陳俊秀照顧好，才會予伊彈銃自殺。」連長激一个苦瓜面講。

　　「阮俊秀一个好好囡仔送來兵營，偆無一月日就欲退伍，你講…你講，到底…到底…」桂仔那講那哭，身軀因為激動煞來咇咇顫[tsun³]。

　　阿霞看桂仔話講袂清楚，共伊扶來椅仔坐，家己徛起來替伊發聲：「連長啊，你今仔日愛予阮一个交代。公文頂面明明寫『因公殉職』，是按怎即馬你講伊自殺，到底發生啥物代誌？」

　　連長共排長使一个目尾，排長紲咧講話：「是按呢啦。最近陳俊秀的情緒無啥穩定，阮有共伊苦勸幾落擺，嘛有減輕伊的勤務。想袂到，陳俊秀利用暗時徛衛兵的時彈銃自殺。」

　　「我的心肝仔囝，我的心肝仔俊秀…」桂仔聽著排長講遐的話，喉管閣滇[tinn⁷]起來。

　　「陳太太，請節哀。」輔導長出嘴安搭，「阮會為陳俊秀申請上界優惠的慰問金，家屬若有需要部隊鬥跤手的所在，請恁直接講免客氣。」

　　「人講『生欲看人，死欲看屍』，阮俊秀的屍體即馬囥佇佗位？」阿霞問。

　　「佇鎮上的殯儀館。」連長應。

　　桂仔佮阿霞堅持欲共俊秀屍體運轉厝裡。連長只好派一台軍用卡車，由排長押車，焣幾落位阿兵哥，作陣去鎮上殯儀館，護送俊秀遺體轉去百外公里遠的故鄉。當等貯俊秀遺體的冰櫃，予彼幾位阿兵哥扛落軍卡車的坎站，桂仔目屎那滴嘴裡那唸：「俊秀仔，咱到厝矣，你著綴乎牢。」

　　貯俊秀遺體的冰櫃，暫且囥踮厝邊空地仔。阿霞一落車隨聯絡葬儀社，過無偌久，葬儀社就派人來搭一頂布篷。

　　「阿霞，這个禮拜時仔妳有閒否？想欲招妳來去參俊秀仔面會。」俊秀入訓練中心無幾日，桂仔就接著後生寄轉來報平安的批。伊一接著批，隨嘴笑目笑走來厝邊招阿霞。

　　「桂仔，我當然嘛有閒。俊秀仔是我自細漢看甲大漢的呢，無來去共面會，欲哪會過心？」

　　「阿霞，勞力哦。」桂仔雙手共阿霞搦牢牢。

　　「三八毋才咧按呢。」阿霞正手勼[kiu]倒轉來，唯桂仔的手盤掰一下，「咱先品乎好，彼日早起妳只要煎恁俊秀仔愛食的卵包就好。偆的，可比講果子抑是四秀仔，交予我來僎就好。」

　　面會彼日，有影阿霞早早就揹一大袋的物件，來桂仔怹兜咧聽候。桂仔那煎卵包那問：「阿霞，妳到底是僎啥款物件？揹甲遮呢大包，予妳破費矣。」

　　「時到妳就知。」阿霞笑笑仔應。

　　彼早起，怹兩人先坐火車到烏日的成功車站，才閣倩[tshiann³]一台計程仔直透駛到成功嶺新兵訓練中心。來到成功嶺，怹兩人袂輸行入一座曠闊的大觀園，目睭展甲大大蕊，四界相過來相過去。

　　「猶未來進前，聽講成功嶺闊莾莾。這陣一下看，有影闊甲看袂著盡磅。我看，寧可來去問人較快。」阿霞看著面頭前人山人海，欲揣人親像海底咧摸針。

　　「阿霞，我來問人。」離怹量約二十公尺，拄好一位穿兵仔衫的青年行過來。桂仔行偎過，提出俊秀寄轉厝的批殼問：「這位阿兵哥，你敢知遮欲按怎去？」

　　「這个所在有淡薄仔遠，大約愛行十外分鐘才會到位。」阿兵哥應。

　　「拜託共阮報路，看欲行唯佗位去？」阿霞行偎來問。

　　「我直接焣恁來去較緊。」

　　「按呢，敢袂耽誤你的代誌？」桂仔問。

　　「袂啦。今仔日會客日，我的任務就是引焣逐家揣著面會的所在。」阿兵哥掠阿霞看一下，「阿姨，妳這跤kha-bang²我來替妳揹。」

　　「阿兵哥，勞力哦。」

　　誠無簡單行到位，三个人攏行到大粒汗細粒汗。阿霞雙手接過kha-bang²，按算捝[thuah]開jia-khuh提一罐涼水請阿兵哥，阿兵哥細膩推辭，向怹行一个禮隨離開。

　　「這个少年家實在誠可取。」桂仔講。

　　「媽、阿霞姨。」俊秀接著通報，三步作二步傱來桂仔佮阿霞面頭前。

　　「才幾日無看著，這个囡仔就曝甲烏攄[lu]攄。」桂仔掠俊秀金金相。

　　「行，我焣恁來去樹仔跤較袂熱。」俊秀行頭前，順紲替阿霞揹kha-bang²。

　　「俊秀，阿霞姨仔紮足濟你愛食的物件。」一到樹跤，阿霞隨捝開kha-bang²的jia-khuh，物件一項一項提出來，「你愛食的果子：蓮霧、菝仔、旺梨，我隨項啊隨項削甲好勢溜溜，」阿霞提一枝攕[tshiam²]仔予俊秀，紲落閣提一包物件出來：「猶閣有我昨昏去咱遐市仔買的豬肉干。」

　　「阿霞姨，妳紮遮呢濟物件，我哪食會了？」俊秀那講那比腹肚膨起來的動作。

　　「憨囡仔，無采恁阿霞姨仔遮呢惜你。」桂仔那講那共伊紮來貯卵包的便當匣仔提出來，「別日仔你若出社會，千萬愛會記得報答人。」

　　「家己人，講啥物報答。」阿霞嘴仔笑微微，「俊秀仔，時間猶閣長躼躼，沓沓仔食，莫去哽[kenn²]著。」

　　「我先食一粒卵包。」俊秀直接用手去抳[ni]便當匣仔裡的卵包。

　　彼日，俊秀規个腹肚食甲飽篤[tuh]篤。桂仔、阿霞一面陪伊食一面開講，時間咻一下連鞭過。下晡三點跤兜，怹才依依難捨離開頭擺踏跤到的成功嶺。

　　紲落來三个禮拜，桂仔佮阿霞仝款一透早就出門，相像大包細包揹來成功嶺參俊秀面會，予伊感受親情的溫暖。一直到甲俊秀入訓練中心一月日了後，開始會當放假，怹才無閣踏入成功嶺的大門。

　　俊秀的遺體囥踮冰櫃夆[hong⁵]扛轉來，暫時峙佇倩葬儀社搭的布篷裡。桂仔自按呢共手頭的工課放下，逐日糜飯食袂落，暗時睏袂安眠，心內的苦楚毋知欲按怎敨[thau²]放？伊目金的時，大體上攏會攑一隻椅古頭仔，坐佇俊秀遺體邊仔。有時陣直直對俊秀講話，有時陣恬恬仔流目屎。桂仔雖然活踮極度的哀傷裡，毋過，伊無袂記每日替俊秀煎兩粒卵包佮僎跤尾飯。

　　厝邊死忠兼換帖的阿霞，看桂仔按呢袂食袂睏，除了苦勸伊著看較開以外，嘛不時過來相放伴。

　　有一暗，桂仔仝款坐佇俊秀遺體邊仔，伊感覺人僐僐煞坐甲睏去。眠眠中，伊看著俊秀予銃子彈著，頭殼一空，血水淹淹流。俊秀一步一步沓沓偎近桂仔，眼神充滿驚惶，「媽，我死甲足冤枉。媽，我死甲足冤枉……」伊的聲音好親像唯第三度空間傳來，逐字逐句都有迴音。「俊秀，我的心肝仔囝。俊秀，媽媽毋甘……」桂仔予惡夢佮家己的喝聲驚精神，規身軀全凊汗。

　　隔轉日早起，桂仔共前一暝的夢境講予阿霞聽。

　　阿霞聽煞隨應講：「桂仔，妳做這个夢，定著是母囝連心，俊秀仔來託夢。我早就感覺俊秀的死因無單純，部隊為著掩嵌怹的罪證，凊采編一个理由應付咱。我知影有一位王媽媽，怹囝幾冬前佇軍中冤枉死，伊為著追查真相，有組一个『軍中冤案真相調查會』。較停仔我來去探聽看覓，拜託伊共咱鬥幫忙。」

　　阿霞有影透過朋友聯絡著王媽媽，王媽媽一聽著發生這款代誌，無第二句話隨答應欲鬥相共。兩日後，王媽媽焣調查會的義務律師佮一位外科醫生來拜訪桂仔佮阿霞。經過外科醫生詳細檢查俊秀遺體，發現銃子彈過的空嘴根本無可能是自殺所造成的。

　　「唯這銃子空來看，絕對是別人彈的無毋著。」醫生講。

　　兩日後，天色烏陰的下晡時仔，桂仔接著一通自稱是俊秀部隊同僚敲來的電話。對方無報出家己名姓，毋過，伊共桂仔講俊秀毋是自殺，伊親目睭看著俊秀予部隊裡的人彈死。桂仔問伊到底啥物人遮呢粗殘彈死俊秀？對方講伊無方便講傷濟，喚桂仔揣軍事檢察官調查，就共電話切斷。

　　桂仔隨共這通神秘電話的代誌講予阿霞聽。阿霞接嘴講：「桂仔，這个兵仔毋敢共真相講清楚，是驚代誌爆[piak]空家己嘛會遭受不幸，可見軍中偌呢仔烏暗。」

　　「阮俊秀仔死甲足冤枉。阿霞，紲落來欲按怎辦？」桂仔悲傷甲一時捎[sa]無總[tsang²]。

　　「作妳安心，我隨來聯絡王媽媽。」

　　紲落來，王媽媽請律師替桂仔向軍事檢察署提出告訴，按算欲為俊秀洗清冤屈。軍事檢察署組一个調查小組，入去俊秀原底的部隊，自連長起，相關人員隨个啊隨个喚來召問，問規晡久，逐家攏講俊秀是自殺的無毋著，尚且部隊提出法醫所開的死亡證明，死亡原因頂面清清楚楚寫「自殺」兩字。

　　軍事檢察官查袂出來真正的殺人兇手，王媽媽佮死者家屬桂仔對怹的回覆攏誠無滿意。紲落，王媽媽以「軍中冤案真相調查會」的名義，佇台北立法院召開記者會，向望透過媒體連紲報導，予軍中感受壓力。在野黨立法委員佇對行政院施政總質詢的時，一个接一个對國防部長開砲，慎重要求國防部愛負起責任，國防部長當面答應會要求軍事檢察署重新調查，予死者家屬一个交代。

　　「俊秀仔，明仔下晡咱連上考銃，想欲拜託你擔任靶溝報靶的勤務。」規身軀曝甲烏金烏金的排長走來揣俊秀。

　　「排的，我即馬已經破月矣。敢揣無其他菜鳥仔通做這項工課？」俊秀聲嗽無甲偌好。

　　「你知影咱連上最近袂少人去外地支援，一寡菜鳥仔閣著愛徛衛兵，拄好欠一跤毋才會來拜託你。無，你敢欲去徛衛兵長？放心啦，我會共連頭仔提報，予你記功放榮譽假。你退伍進前，排的會揣一日好好仔請你一頓。」

　　「無，好啦。」俊秀頭殼抓[jiau³]抓咧勉強頕[tam³]頭答應。

　　考銃彼日，俊秀夆安排佇上尾一个靶位。彼下晡天色雖然略仔烏陰，毋過，風絲仔斷點，予人感覺漚翕[au³-hip]漚翕。

　　「學長，來一罐清涼的退火。」徛佇俊秀邊仔靶位的一兵旺仔，偷偷仔揜[iap]兩罐銅管仔裝的麥仔酒，等閬縫抵[tu]一罐過予伊。

　　「旺仔，你誠好膽。若去夆摠[tsang]著，是會記過、禁假呢。」俊秀攑頭四界瞭[lio²]看有予外人看著否？

　　「學長，我都無咧驚，你破月的人是咧驚頭殼一空的。」旺仔那啉那笑笑仔講。

　　四點較加，天色比拄才閣較烏陰，偆最後一波六个兵仔考銃。

　　「報靶。」最後一波考銃煞，放送頭傳來值星官的聲。

　　「一粒。」頭前五个靶位報煞，輪著俊秀報靶。

　　當等伊報「一粒」的時，旺仔佇邊仔詼[khue]講：「今是佗一个菜鳥仔遮呢頇慢，干單考著一粒。」

　　旺仔這句話才拄講煞，伊前一秒鐘的笑面連鞭變款。因為徛佇伊邊仔的俊秀後擴[khok]去予一粒銃子彈著，規个人隨仆咧塗跤兜，到死都毋知欲挃[tih⁸]伊命的是啥人？旺仔佇邊仔看甲一个嘴仔開hann⁷-hann⁷，伊雖然有看著二十公尺外彈銃的人面容，毋過，對方共銃描準伊，比一个擊發的動作，伊驚甲跤尾咇咇掣，緊猛傱離開現場。

　　第二日，部隊隨請軍法醫開一張陳俊秀自殺死亡的證明。旺仔嘛予人喚入去連長室，吩咐伊「飯會當亂使食，話袂當亂使講。若無，恐驚看袂著明仔載的日頭。」

　　俊秀予人銃殺前一暝暗時十點，部隊連長室的燈火猶光澄[tenn⁵]澄。連長以外，副連長、輔導長、排長、士官長五个人，佇遐那啉酒那配話，門口派一位心腹的下士顧守，外人無法度知影怹到底是咧計謀啥物代誌？

　　國防部長雖然當立法委員的面答應重新調查，予死者家屬一个交代。毋過，經過軍事檢察署大動作調查，成禮拜後公布的結果猶是相像無啥物進展。「軍中冤案真相調查會」會長王媽媽陪苦主桂仔召開記者會，佇濟濟媒體頭前講：「軍事檢察署大動作調查，全全是表演予媒體看的，部隊裡相關人員早就套話套好，欲查出真相恐驚著愛等天落紅雨矣。」

　　紲落，王媽媽焣桂仔、阿霞佮幾落位囝兒佇軍中枉死的婦仁人以及聲援的大學生，佇立法院門口埕扭白布條仔，布條仔頂面寫「軍中烏暗無人權」、「官官相護查無真相」、「母親的心咧滴血」。當等國防部長唯立法院開會煞行出來，王媽媽喝一聲是，數十粒雞卵作一睏飛出來，雖然國防部長身邊有幾落位侍衛保護，猶原走閃袂過這陣攻擊，伊的面裡佮目鏡仁頂面攏滒[ko⁷]著卵汁，伊提出手巾仔共卵汁拭掉，激一个苦瓜面離開現場。這場抗議焣頭的王媽媽佮桂仔、阿霞等人，隨予台北市警察局中正第一分局警員焣轉去問口供、作筆錄。

　　彼暗，轉去厝裡，桂仔早就忝甲歪腰。伊一躺[the]咧椅仔頂，無一搭久仔隨睏甲毋知人。佇夢裡，桂仔來到一个好親像毋捌踏跤到的荒郊野外，彼个所在草仔發甲不止仔蓊，無偌久，伊看著一位頭毛剃甲薄厘絲的少年家向伊行來。等到彼位少年家離伊三步遠的時，伊才看清楚是伊的孤囝俊秀。俊秀規个面色白蒼蒼無任何表情，行過伊的身軀邊攏無停跤，無論伊佇後面按怎大聲喚，俊秀毋回頭就是毋回頭，一直到甲消失形影。過一時仔，天頂開始摔大雨，雨陣袂輸天公伯的目屎流無停。桂仔攑頭看，雨水齊[tsiau⁵]變作紅色的。伊想欲匿煞匿無路，大聲哮煞哮甲精神。

　　第二工早時，薄日唯雲裡探頭。桂仔閣接著頂回彼位神秘客敲來的電話，神秘客佇電話中講：「我最近定定夢著俊秀予銃彈著的影像。」伊講伊的良心自責甲睏袂落眠，伊講過幾日等伊放假，伊願意佮桂仔猶閣有王媽媽作陣開記者會講出真相。「你敢毋驚死？」桂仔問伊。「毋驚。」神秘客應甲直理直路。

　　彼日中晝，桂仔共瓦斯爐的火切灼，倒一絲仔沙拉油，敲兩粒卵落鼎。伊招姊妹仔伴阿霞過來作陣食晝，阿霞看伊面裡的表情有較春風，紲嘴問：「桂仔，妳今仔日無仝款哦，是毋是有啥物好消息？」桂仔無應話，干單頕頭。伊咬一嘴俊秀上界愛食的卵包，兩滴目屎無聲無說唯面裡津落來。

──2013.8.18寫佇赤崁南門仔

     2013.11.5《台江台語文學》第八期