「社長，予我落去林仔邊採訪莫拉克風災的新聞好否？」報社記者詹天良給社長拜託。

　　「天良仔，咱只是一間小報社，哪有遐濟人力通派去各地採訪風災新聞？閣再講，干單食蹛佮交通的費用，社裡嘛負擔袂起。」社長目頭結結回應。

　　「社長，假使你答應予我去林仔邊採訪，食蹛佮交通費用，我會當家己發落。」詹天良講。

　　「實在無你法，真正是紅目有仔鬥鬧熱。予你去啦，毋過，愛會記得寫較精彩咧。」社長總算頕頭答應。

　　詹天良駛彼台朋友送伊的烏色二手車，唯土城交流道上福爾摩沙高速公路，這台車齡十外冬的自家用，已經老甲袂輸老牛咧拖車，使致詹天良沿路佇休息站停睏幾落擺，誠無簡單才駛到林仔邊交流道。

　　落交流道，行台17線入去林仔邊鄉，這時，天色紅煌紅煌，日頭漸漸仔欲落山。

　　一入去林仔邊，詹天良目睭內所看著的，攏是滿流直界的路糊仔糜。

　　這是莫拉克風災發生了後第五工黃昏的景緻。

　　佇林仔邊，除了滿流直界的路糊仔糜以外，沿路所看著的鄉民，怹的眼神全是無奈佮哀怨。腹肚咕咕叫的詹天良，想欲揣麵店仔食一碗麵止飢，不而過，店家袂輸講通和仝款，逐家攏關門閂戶，無咧做生理。

　　駛到中林路，看著遠遠一位燈火光澄澄的所在，詹天良給車插咧路邊，行偎一下看，東時仔是一間嶄然仔大間的宮廟，瞻頭看，頂頭一塊金色牌匾，「慈濟宮」三字浮踮面頂。

　　廟的正手爿，有一陣身穿藍色長衫、白色長褲的志工，佇遐無閒切切、闖出闖入，僎飯菜予踮遐排列排甲躼躼長的鄉親食，廟柱佮廟柱之間綁一條白色布條仔，頂面用綠色的字寫「慈濟功德會莫拉克風災食物發放處」。

　　詹天良想欲綴鄉親排隊領燒燙燙的物件食，毋過感覺歹勢歹勢，就佇伊當咧頓蹬的坎站，一位慈濟的女性志工行偎身軀邊，雙手合十：「師兄你好，腹肚枵矣乎？免歹勢，請過來佮逐家作陣排隊領物件，感恩。」

　　「師姊妳好。」詹天良學對方雙手合十，同時抵一張名誌予伊，「我號做詹天良，是唯台北落來的記者，欲來遮採訪莫拉克風災的新聞，拄才到林仔邊無偌久，想欲揣一間麵店仔食麵，煞揣攏無。」

　　「師兄，你有影誠發心，專工唯台北落來採訪。按呢啦，你若無棄嫌，我遐猶有幾粒中晝偆的菜包，你先暫且止飢，較停仔才舀寡燒湯來配。」女志工的胸前結一塊慈濟發的證件，頂面寫「慈濟志工洪惠蘭」。

　　「洪師姊，勞煩妳矣。」詹天良應。

　　詹天良一手提菜包、一手捧燒湯，揀一位壁角仔坐落，併咧食伊今仔日的頭一頓。

　　佇伊邊仔有一位留平頭，看起來做穡人款，頭鬃白一半較加的阿伯仔，飯食飽當咧哱薰，伊掠詹天良金金看，「少年的，你毋是咱在地人乎？」

　　「阿伯仔，我是唯台北落來的報社記者，你敢願意接受我採訪？」詹天良那講那唯衲袋仔撏錄音筆出來。

　　「哦，報社記者哦。」阿伯仔掠詹天良手裡的錄音筆直直看，「少年的，伊手提彼枝是啥？」

　　「阿伯仔，這枝是欲錄音用的錄音筆啦。」詹天良笑笑仔應。

　　「好啊，」阿伯仔給薰橛仔撣咧塗跤，用跤踏予化，「你欲問我啥？」

　　「阿伯仔，借問你啥物大名？」詹天良問。

　　「我小姓姓蘇，單名一字炳，人攏喚我酥餅，按呢較好記啦。」阿伯仔講。

　　阿伯仔講怹兜徛踮水利村，佇遐有一堀魚塭仔，內面飼袂少虱目魚。三十外冬前，林仔邊這箍圍仔開始時行做魚塭仔。怹老爸想講做穡做規世人，攏著看天食飯，若運途嫫搪著風颱，規年昶天的收成凡勢攏會烏有去。聽厝邊隔壁講，做魚塭仔雖然厚工，毋過省本多利，參做田、種果子比起來加誠會和。自按呢起，佇原底的田地挖一堀魚塭仔飼虱目魚，彼陣，阿伯仔拄做兵退伍無偌久，嘛綴老爸潦落去做魚塭仔，目一下睨欲偎四十冬。

　　「阿伯仔，聽你按呢講，這幾十冬來，魚塭仔對林仔邊的經濟有不止仔大的幫贊。不而過，嘛因為挖傷濟魚塭仔，造成土地落陷的危機，便若落大雨，林仔邊就會做大水。咱遮的鄉親對這款情形，敢有啥物想法？」詹天良問。

　　「欲有啥物想法？」阿伯仔閣點一枝薰，吐一下大喟：「攏嘛為著顧腹肚。你給想啦，種果子仔一冬收成一擺，袂赴市啦，除非是種較好價的烏珍珠蓮霧。不而過，話閣講倒轉來，烏珍珠會當種成功，嘛是因為海水倒頭灌，造成田地鹽分厚，若無遮的『鹹屎地』，恁即馬欲哪食會著甜閣脆的烏珍珠？」

　　「是講，既然烏珍珠遮呢好價，是按怎逐家無欲加種寡，來減少魚塭仔使致土地落陷的危機咧？」詹天良講出伊的僥疑。

　　詹天良咧講話的時，一位中扮體格的中年人行過來佮阿伯仔相借問。

　　「這個阮水利村的村長伯仔啦。」阿伯仔向詹天良紹介。

　　「村長伯仔，這個少年的是唯台北落來的記者。」阿伯仔越頭給村長紹介詹天良。

　　詹天良順這個勢給名誌抵予村長。

　　「詹先生，」村長掠名誌看一下，瞻頭講：「你拄才問的問題我有聽著。實在講，咱林仔邊土地落陷的問題，毋是干單魚塭仔抽地下水這項，台糖公司佮砂石仔場嘛是兇手。」

　　「村長，這按怎講？」詹天良問。

　　「來，我講一個現成的例予你聽。」村長講，頂月日屏東縣政府為著林仔邊地下水位下降，要求台糖設佇力力溪頂流的農場停止抽地下水。結局台糖公司毋肯，諍講怹有給相關單位申請合法的抽水權，顛倒是林仔邊遮的魚塭仔的抽水機攏無申請抽水權，是無合法的。屏東縣政府只好給這件代誌按下。

　　「奚砂石仔場閣較惡質。」阿伯仔接咧村長的話尾講：「佇咱林仔邊溪頂流遐有一間砂石仔場，逐工無日無暝佇彼踏挖砂石仔，一thoo-la-khuh接一thoo-la-khuh的砂石仔車駛離開林仔邊，給咱林仔邊溪溪底品質上界gió-toh的砂石仔，車車去都市砌厝予好額人蹛。」

　　「村長，這款情形敢無法可治？」詹天良問。

　　「台糖佮砂石仔場，一爿白道、一爿烏道，這通人知的代誌。」村長講。

　　彼暗，詹天良佇服侍媽祖婆的慈濟宮廟內，揣一位清氣的所在，展開伊紮來的睏袋仔，就地安歇。

　　雨，袂輸免錢的超級大港水道水，唯天頂一直濺落來，無甲一時停，給規個林仔邊淹甲親像水底世界，逐家叫苦連天。

　　林仔邊溪的埠岸，佇莫拉克風颱掃過了後，嘛規個予大水沖甲崩崩去。

　　大水淹到一層樓仔懸，救難小組駛橡奶船，四界走闖搶救災民。

　　雨，愈落愈大陣，愈落愈粗殘……

　　「啊－啊－」詹天良規身軀重汗，喝甲大細聲。

　　「師兄，你是按怎？」詹天良感覺有人咧搖伊的肩胛頭，雄雄睜神，原來拄才是咧做惡夢。伊目睭揉揉咧，擘金，看著徛佇伊邊仔的是慈濟的洪惠蘭師姊。

　　「洪師姊，歹勢，我拄才做一個林仔邊淹大水的惡夢。」詹天良趕緊跁起來。

　　「師兄，這予你拭汗。」洪惠蘭唯衲袋仔撏一條素色的手巾仔，提予詹天良。

　　「洪師姊，勞力。」詹天良雙手合十。

　　這時，天拄拍昲光。

　　一陣慈濟的師兄、師姊，已經來佇慈濟宮，展開一工的空課，款早頓的款早頓，拚掃的拚掃，逐家用勞動佮汗水來迎接新的一日。

　　詹天良給睏袋仔收好勢，行入便所簡單洗一下手面，手面洗好，來到慈濟志工咧款早頓的所在，真拄好閣搪著洪惠蘭師姊。

　　「洪師姊，今仔日恁慈濟志工敢有欲給林仔邊鄉親鬥清厝內？」詹天良問。

　　「師兄，這項清厝內的空課，短期內阮會一直做落去，予鄉親會當早一日重建家園。較停仔，唯各地來的志工會陸續到位。」洪惠蘭講。

　　「按呢，我想欲綴慈濟的隊伍作伙行動，敢會使？」詹天良的笑容袂輸初升的日頭。

　　「師兄，歡迎你作伙來種福田。」洪惠蘭掠詹天良笑一下，「毋過，欲種福田進前，嘛著愛先食予飽才有元氣。今，素糜已經煮好，先來食一碗。」

　　早頓食飽無偌久，慈濟救災隊伍逗逗仔到位。怹的穿插不止仔整齊，佮洪惠蘭仝款頂身藍色長衫，下底白色長褲。眾師兄姊的手裡攏提傢俬，親像沙銚、戕仔、掃帚、畚箕、鐵桶仔這寡拚掃的物件，逐項都僎甲齊勻啊齊勻。

　　「詹師兄，這位是今仔日救災的總領隊林文通師兄。」洪惠蘭掣詹天良到一位看起來斯文款的中年人面頭前。

　　「林師兄，這位詹天良師兄是台北來的記者。伊誠發心，今仔日欲綴咱的隊伍作伙給鄉親鬥清厝內，較停仔勞煩你拍派空課予伊。」洪惠蘭對林文通講。

　　「詹師兄，歡迎、歡迎。」林文通主動佮詹天良握手。

　　這日，天氣不止仔翕熱，日頭袂輸咧展雄威仝款，溫度蒸甲三十外度，未曾做穡汗就流甲規身軀。詹天良頭戴葵笠仔，頷頸頂披一條面巾，跤底襱一雙烏色靴管，兩爿褲跤總襞起來，手舉一枝沙銚，親像欲落田做穡的模樣。

　　詹天良綴慈濟師兄姊去媽祖廟邊彼條巷仔裡鬥清路糊仔糜，這踏的路糊仔糜差不多三十公分厚，連欲行路都相當困難。好佳哉，這條量約百外米長的巷仔，除了慈濟志工以外，另外彼爿頭猶有穿草綠色軍服的阿兵哥咧鬥相仝。詹天良心內按呢想，有遮的青春少年的阿兵哥，救災的速度檢采會較緊快。

　　慈濟志工排做兩列，有的舉沙銚搉路糊仔糜，將路糊仔糜搉入鐵桶仔佮塑膠畚箕，有的傳接鐵桶仔佮畚箕裡的路糊仔糜，一個接一個，給遮的破壞鄉親家園的兇手，拚出去外面。

　　佇詹天良所徛的正對面，拄好是一位地勢較低的正身護龍，這踏路糊仔糜淹到跤頭趺，遮有兩隻行動猛醒的山貓佇咧展威，閣較按怎講，機器的效率總是併人工緊咧幾落倍。確實有影，無到半工的時間，原本淹到跤頭趺的路糊仔糜，已經清一半較加。

　　早時十點外，透世人罕咧做粗重的詹天良，規身軀衫仔褲早就澹甲出汁。伊歇一下喘，提頷頸仔頂的面巾給額頭稍拭一下，閣再唯後壁褲袋仔撏礦泉水出來啉兩嘴。這陣，伊聽著尻脊後有人咧喚伊：「少年的，阮厝內全全路糊仔糜，干單阮兩翁仔某佇咧拚，仙拚都拚袂離，你敢會當給阮鬥相仝？」

　　詹天良越頭看，是一位量約五十外歲的奧巴桑徛踮伊後壁。

　　「奧巴桑，妳稍等一下，我給阮領隊講一聲。」詹天良講。

　　詹天良向慈濟領隊林文通報告，得著同意了後，伊隨綴奧巴桑行入厝內。一入去厝裡，漚翕的空氣佮空氣內面的怪味，予詹天良差一屑仔烏暗眩。伊緊給嘴掩掛起來，「奧桑巴，奚是啥物味，哪會遮呢歹鼻？」透過嘴掩，詹天良開嘴問。

　　「少年的，奚是阿摩尼仔的味。阮佇路口開農藥店，厝裡當做倉庫，做大水一寡農藥袋仔煞破破去，才會規厝間攏阿摩尼仔的味。」奧巴桑用手紻拭扞，續落講：「你若感覺味歹鼻，清幾分鐘就行出去外口，吮一下仔新鮮的空氣咧。」

　　事實上，這個坎站、這款地頭，欲哪有新鮮的空氣通吮？

　　中晝，慈濟志工隊轉去媽祖廟歇睏。洪惠蘭師姊提一個素食便當予詹天良，詹天良雙手合十回禮。雖然，伊早就枵甲大腸告小腸，不而過，鼻規早起阿摩尼仔的氣味，予伊的腸仔腸肚強欲反腹。飯扒無幾嘴，詹天良就食袂落，只好加灌寡礦泉水止飢。

　　下晡，詹天良請洪惠蘭師姊轉告林文通領隊，伊欲家己一個四界行行看看咧，順續寫一寡採訪稿，明仔載通好刊出來。

　　詹天良雙跤步輦，往市中心逗逗仔行。伊行到一間超市，想欲入去內面買兩罐礦泉水，煞看著這間超市袂輸一座空城仝款，內面干單偆一寡這個坎站用較袂著的物件，其他較搶市的，親像礦泉水啦、泡麵啦，老早就夆掃甲空空。

　　「先生，歹勢啦，礦泉水早就無貨矣。連阮家己欲啉的，嘛是給救災的志工討來的。」坐踮櫃枱後面是一位中年婦仁人。

　　「勞力。」詹天良無意無意回應。

　　「媽，我出去一下。」內面行出來一位二十外歲的查某囡仔，伊頂身穿一領白色T-shirt，下身一領短褲節仔，烏肉底，目睭大蕊、重絢，頭毛削甲短短薄薄。

　　「妳這個死查某鬼仔，厝裡攏蹛袂牢，今是欲去佗位樂陶？」中年婦仁人無好聲嗽。

　　「林仔邊車頭。」查某囡仔頭連越一下都無，闖出外口發動伊的Oo-too-bai。

　　詹天良綴查某囡仔尻脊後行出店口，「小姐，妳拄才講欲去林仔邊車頭。」

　　「無毋對，我欲去林仔邊車頭。」查某囡仔口氣肯定。

　　「林仔邊車頭聽講淹甲規個攏路糊仔糜，車班暫停，妳欲去遐創啥？」詹天良問。

　　「我佮朋友相招欲去鬥清路糊仔糜。」查某囡仔應甲直理直路。

　　「我敢會當佮妳作伙去？」

　　「當然嘛好。來，起來。」查某囡仔手比椅座仔。

　　「Hann？」詹天良一時反應袂過來。

　　「起來，我載你去。」查某囡仔出力拍椅座仔。

　　「敢無欲戴安全帽仔？」

　　「你台北來的乎？真正是都市倯，阮遮無時行戴安全帽仔啦。」查某囡仔給詹天良詼。

　　「我是台北來的記者，請問欲按怎稱呼？」詹天良抵名誌予查某囡仔。

　　「我號做胡玉真，人攏叫我烏珍珠。」

　　詹天良坐起50c.c的Oo-too-bai後座，因為車細台，兩個人身軀不止仔偎，後壁無所在通捍，詹天良一時毋知雙手欲囥佇佗？胡玉真誠大方，喚詹天良攬伊的腰無要緊。若無，較停仔伊油門摧落，恐驚會跋落車跤。

　　來到林仔邊車頭，詹天良看著路糊仔糜淹甲強欲和月台平懸。遮有幾落位鐵路局的員工佮一陣在地的青年男女，逐家手提傢俬拚勢咧清路糊仔糜。胡玉真佮眾人拽手相借問，順續紹介詹天良參這陣朋友熟似。

　　詹天良中晝雖然飯扒無幾嘴，腹肚枵甲大腸告小腸，毋過，伊看著這陣青年男女遮呢仔拚勢，伊嘛緊給褲跤襞起來，佮逐家作伙出力清淹甲規車頭的路糊仔糜。閣較按怎講，這踏的環境總比早起佇充滿阿摩尼仔的厝間較gió-toh。

　　眾人佇林仔邊車頭清路糊仔糜，清甲日頭欲落山才停睏。提著鐵路局分的便當了後，其他的人攏紮轉去厝裡食，干單詹天良佮胡玉真留咧月台頂，那食便當那開講。已經枵規工體力早就透支的詹天良，無三兩下手就給規粒便當掃甲空空。胡玉真知影伊中晝無啥食，緊給家己食偆一半的便當抵予伊。

　　詹天良接過便當的時，看著胡玉真白色T-shirt胸前沐甲規個攏路糊仔糜，胡玉真承著詹天良的眼光，激媤妮的口氣講：「天良兄，你掠人的胸坎一直看，人會歹勢呢。」

　　「玉真，失禮，我毋是刁工的。」詹天良面仔紅貢貢。

　　「免緊張，佮你滾耍笑的。」

　　「玉真，妳便當予我食，較停仔腹肚會誠快枵。」詹天良淡薄仔毋甘。

　　「我在地人呢，哪會驚食無？」胡玉真笑笑仔應。

　　詹天良便當食了，胡玉真提議去水利村的埠岸邊搧海風。

　　胡玉真講伊欲報路，喚詹天良騎伊的Oo-too-bai載伊去。

　　無一搭仔久天色齊暗落來，詹天良路況無熟，車毋敢騎傷雄。未曾到埠岸邊，就感受著海風那來那透，一陣閣一陣搧過來。怹兩人攏干單穿一領短紻的T-shirt、無疊外衫，胡玉真給頭輕輕仔靠踮詹天良的肩胛頂，雙手給伊的腰攬牢牢。

　　「玉真，風那來那透，咱攏無紮外衫，我驚妳會感著，咱來轉好否？」佇頭前搧風的詹天良不止仔體貼。

　　「天良兄，有你佇頭前替我擋風，我毋驚。」胡玉真給詹天良攬愈牢。

　　到甲水利村埠岸邊，給Oo-too-bai插好勢，詹天良看著頭前十公尺一個熟似的人影，等對方行較偎近，伊代先相借問：「蘇炳伯仔。」

　　天暗，老人目色無啥好，認袂出來徛佇伊面頭前的是誰人？「少年的，你是…」

　　「阿伯仔，你敢袂認得？我是台北來的記者詹天良，昨暗咱才佇媽祖廟見過面。」詹天良講。

　　「哦，是詹的哦。」阿伯仔目睭貼偎瞋，總算予伊認出來，「今，日頭都落山，風閣遮呢透，你來埠岸邊欲創啥？」

　　「我佮朋友來埠岸邊搧海風。」詹天良應。

　　「恁即馬的少年乎，毋知咧想啥？」阿伯仔幌頭。

　　「阿伯仔，恁兜敢蹛佇遮？借我一領外套好否？較停仔欲走，我會提去還你。」詹天良講。

　　「阮兜就蹛佇頭前，你若無嫌臭老羶，才綴我轉來攇。」阿伯仔誠阿沙利答應。

　　詹天良綴阿伯仔轉去怹兜借一領外套，轉來埠岸邊，給外套幔咧胡玉真身軀頂。胡玉真伸手牽詹天良跁起埠岸頂，兩人肩胛相併坐咧，胡玉真給一半外套披咧詹天良肩胛頭，「按呢較袂寒。」伊輕聲仔講。

　　「天良兄，你啥物時陣欲轉去台北？」胡玉真問。

　　「我大概後禮拜就欲轉去，袂當一擺落來傷久。若無，恐驚會予社長刣頭。」詹天良笑笑仔應。

　　「過幾工仔，等林仔邊車頭清甲差不多，阮遮的在地青年欲作伙組織『林仔邊青年重建工作室』，為故鄉盡淡薄仔喟力。天良兄，你敢會來參加阮的成立大會？」胡玉真講話的口氣雄雄變較嚴肅。

　　「遮呢要緊的代誌，我當然嘛愛去參加。」詹天良輕輕仔搦胡玉真的手，「玉真，按呢妳本底的頭路欲按怎？」

　　「莫拉克風災發生了後，我本底佇高雄旅行社的頭路就辭掉矣，決心轉來故鄉拍拚。」

　　「妳給頭路辭掉，恁序大人敢有啥物看法？」

　　「阮爸母顛倒頭歡喜，想講紡見的查某囝閣抾轉來。」

　　「這話按怎講？」

　　「我本底佇旅行社做導遊，不時愛掣團四界溜溜去，規年昶天罕得佮厝裡的人見面。」

　　「妳轉來故鄉，除了參與重建的空課以外，生活欲按怎打揲？」

　　「我會使給阮母仔鬥顧店，嘛會當給阮爸仔佮阿兄鬥顧園裡的烏珍珠。」

　　詹天良佮胡玉真佇埠岸頂開講到月娘佇天頂探頭，才結束這場初秋的約會。詹天良先給外套攇轉去還蘇炳伯仔，才騎著五十仔搢風載胡玉真轉去厝裡。了後，伊逗逗仔散步行轉去媽祖廟，準備用伊的Notebook寫今仔日的新聞稿。

　　續落來成禮拜，詹天良攏佮胡玉真作伙去林仔邊車頭清路糊仔糜，會當講是仝出仝入、仝行仝命。逐日早起，詹天良先佇媽祖廟食慈濟志工僎的素食早頓，八點跤兜，胡玉真會騎Oo-too-bai來載伊去林仔邊車頭。雖然，每工攏唯早仔做到暗，舞甲滿身重汗，衫仔褲沐甲烏嚜嚜，毋過，對怹兩人來講，會當互相佇身軀邊相放伴，較苦嘛會變甘甜。

　　佇林仔邊車頭最後彼日，眾人知影直欲完工，所致做代誌特別拚勢，量約偎晝就給空課做了。鐵路局為著表示對這陣青年志工的感謝，彼日中晝的便當特別加菜，順續送逐家「永保安康」的紀念車票一套。

　　胡玉真仆踮詹天良的耳空邊細聲講：「紀念車票咱給收落來，今仔日便當莫領，我掣你來去食好料的。」

　　「欲去佗位食好料的？」詹天良問。

　　「較等咧你就知。」胡玉真激神秘款。

　　這工中晝無雲薄日，胡玉真的心情嘛參天氣相像，伊的歡喜攏寫佇面裡。伊載詹天良往西北爿一直騎，騎到林仔邊佮東港的交界，看著「東港鎮」的路標，詹天良一問，才知影胡玉真欲載伊去東港食新鮮的海產。

　　這回莫拉克，雖然東港嘛受災殃，不而過，無親像林仔邊遐呢傷重，到甲這個坎站，嘛恢復甲差不多，胡玉真才會想欲趁這半工的時間，掣詹天良去東港食海產，順續四界行行看看咧。

　　Oo-too-bai佇東港海產街光復路的「佳珍海產店」門口停落來，詹天良唯外觀看這棟四層樓懸的海產店，袂輸五星級的飯店，佮一般海產擔予人的感覺袂輸天差咧地仝款。

　　伊問胡玉真：「妳掣我來遮呢高級的海產店，價數無俗乎？」

　　「你免煩惱，遮佮其他海產店的價數差毋成物，會當講是平民價數、高等享受。尚且，出名的大導演李安佮旅遊節目主持人Janet攏來過幾落擺。」聽胡玉真的口氣，假若對遮不止仔熟似的款。

　　行入海產店，服務人員看怹干單兩個人，誠好禮掣怹起哩二樓的包廂。

　　「做你點無要緊，這攤算我的。」胡玉真展開設計甲媠噹噹的菜單，囥咧詹天良面頭前。

　　「咱干單兩個人，毋通點傷濟討債人的物。」詹天良應。

　　「我看，點三菜一湯加兩碗白飯拄拄仔好。」

　　「遮妳較熟，妳來點就好。」

　　「好，我來點店裡的手路菜。『旗魚白玉』、『天蠶絲』、『那個魚』佮『魚翅丸湯』。」胡玉真一面講一面指菜單頂面的菜色，一面拽服務人員過來。

　　服務人員看著胡玉真拽手招呼隨行偎來，用烏色原子筆佇點菜單頂面做記號。

　　「小姐，我閣加點一盤『招牌黑鮪魚』。」胡玉真想著烏甕串迷人的滋味，嘴瀾水強欲津落來。

　　因為風災拄過無偌久，閣再加上毋是歇睏日，所致店裡生理無甲偌佳易，怹點的四菜一湯無一時仔齊送過來。

　　詹天良原底煩惱胡玉真點傷濟食袂了，看著上桌的菜色重質無重量，伊才給心肝底的石頭囥落來。

　　「玉真，我會記得妳拄才有點『那個魚』，到底是佗一盤？」詹天良誠好玄。

　　「就是你面頭前這盤糋甲外表金黃金黃，內底食起來軟軟綿綿的物件。」胡玉真那講那挾一塊塞咧詹天良的嘴。

　　「有影足好食的，妳嘛來一塊。」詹天良隨挾一塊回敬胡玉真。

　　「對啦，『那個魚』到底是啥物魚？」詹天良發揮記者逐項代誌問到底的本色。

　　「『那個魚』的學名號做『小鰭鎌齒魚』，是東港出名的特產，一年四季攏會當佇這踏的外海看著怹的影跡。天良兄，你敢知影這款魚是靠啥物生存？」胡玉真講甲不止仔專業，閣袂輸欲考倒學生。

　　詹天良笑笑幌頭。

　　「你絕對想袂到，就是拄才菜單頂面嘛有的『櫻花蝦』。」胡玉真公布標準答案。

　　這頓美味續嘴的中晝頓，佇樂暢、輕鬆的氣氛裡，量約食點外鐘結束。

　　行落樓跤，詹天良給皮包仔提出來想欲納數，胡玉真跤手猛掠，唯牛仔褲後爿衲袋仔撏出幾張銀票，搶佇詹天良頭前交佇櫃枱小姐手裡。

　　兩個人四蕊目睭相相，差一屑仔笑出來。

　　「天良兄，咱來去小琉球繞繞咧好否？」離開佳珍海產店，胡玉真講。

　　「小琉球欲按怎去？」詹天良問。

　　「唯東港碼頭坐交通船，大概半點鐘以內就會到小琉球。」胡玉真應。

　　怹拆兩張公營交通船往回船票，攏總760箍，這條錢詹天良堅持伊欲出。下晡兩點，怹所坐的「吉祥如意輪」準時起行，兩點半跤兜，交通船佇大福漁港靠岸。

　　這陣，離尾班交通船唯小琉球起行的時間只偆三點鐘，無法度予怹逐位耍透透。怹決定今仔日干單去烏鬼洞、山豬溝佮美人洞這三個所在就好，其他景點後回才閣來。

　　詹天良佮胡玉真租一台Oo-too-bai相載，怹沿環島公路按順時針方向騎，頭一站先到小琉球西南爿的烏鬼洞。

　　怹佇烏鬼洞外面票口買兩張全票240箍，這條錢胡玉真搶咧納。胡玉真感覺開這條錢誠會和，因為開一擺錢連山豬溝佮美人洞攏會當耍透透。入去內面，佇洞口邊仔看著一塊水藍色的告示牌，頂面簡單說明烏鬼洞的起源。唯遐會當看出來三百外冬前，荷蘭人派兵攻打小琉球，蹛佇島上的原住民匿踮洞裡，結局三百外人予荷蘭人用火燻死佇內面，後來的人才給這個所在號做「烏鬼洞」。

　　「荷蘭人實在足粗殘的。」那看告示牌，胡玉真那慼喟。

　　洞外，有一個阿婆仔峙一塊紙枋，頂面寫講租手電仔一枝十箍。詹天良看頭前幾落個人客攏給阿婆仔捧場，伊嘛撏十箍銀角仔出來。胡玉真看著，直接牽伊的手行入洞內，唯褲袋仔提手機仔出來，揤落，靠手機仔的光就挺好照路。事實上，洞內雖然坎坎坷坷隘擠擠，不而過，干單短短仔一節路，無偌久就行透。

　　離開充滿血淚傳奇的烏鬼洞，詹天良佮胡玉真騎Oo-too-bai到下一站山豬溝。這踏除了柴枋仔做的步道佮柴椅以外，大體上維持上界自然的景緻。遮有礁岩石洞、一線天、觀海平台佮四界攏看會著的老榕樹，佇這個天然的園區內底，心情放輕鬆勻勻仔行踏，會當享受森林的芬多精，有影予人心涼脾肚開。

　　行出園區了後，胡玉真才看著正爿入口有一塊山豬溝的簡介，頂面所寫山豬精給仙女偷藏衫仔的典故，佮烏鬼洞的傳說相比併，的確加誠趣味，嘛較符合人性。伊用兩枝踵頭仔，給詹天良的鼻頭揬懸，笑笑仔講：「你看，恁查甫人就是豬哥性帶遮重。」

　　怹本底按算欲閣去美人洞，毋過頭前彼兩個景點時間節無好勢，若無緊趕去碼頭坐尾班船，今仔日恐驚愛夆留踮小琉球隔暝。

　　「有影誠無采，無法度去美人洞蹉跎。」胡玉真一個嘴仔翹甲半天懸。

　　「妳本人就是一位大美人矣。」詹天良輕輕仔唚胡玉真的嘴頗。

　　「你真討厭呢。」胡玉真無料著詹天良會來這招，出手搥伊的胸坎。

　　天色漸黃昏，欲暗仔五點二十跤兜，怹環島公路箍差不多規半輾，總算順序轉到大福漁港碼頭，會赴坐尾班船。

　　　八月十五彼一工，船欲離開琉球港，
　　　只有船煙白茫茫，全無朋友來相送，
　　　滿腹憂悶心沉重，看無愛人伊一人，
　　　堅心忍著純情夢，帶著寂寞來出帆。

　　　……………………

　　回航的船隻起行，胡玉真徛佇甲板頂憂憂仔唱歌。

　　海風吹來透心涼，幾隻海鳥展翅唯面頭前飛過。

　　「玉真，頭擺聽查某囡仔唱〈行船人的純情曲〉，無想著唱甲遮呢仔有感情。」詹天良手比大頭拇。

　　「天良兄，是你毋甘嫌。」胡玉真聲調併平素時仔較嚴肅，「你敢知？過身七、八冬的陳一郎是東港人，阮叔伯大兄佮伊是死忠兼換帖的好朋友。阮林仔邊的討海人，足濟人攏真恰意這首〈行船人的純情曲〉。」

　　隔轉工早時十點，一陣青春活跳的林仔邊在地青年，佇大路角附近的鄉立圖書館三樓會議室，舉辦「林仔邊青年重建工作室」成立大會。現場攏總來二、三十位青年男女，予在來恬靜的會議室鬧熱滾滾。胡玉真佮詹天良嘛準時到位。為欲落實環保理念，會場無結紅布條仔，干單踮白枋頂面寫字代替。

　　會中，胡玉真予眾人推搡出來擔當執行長。

　　這個工作室的組織，初期簡單分做活動組、事務組佮公關組。活動組佮事務組的組長攏由在地青年自願擔任，公關組組長逐家你看我、我看你犀牛仔照角，攏無甲半個人舉手認注。

　　「各位，我邊仔這位詹天良先生，是台北報社的記者，伊的人面併咱較闊，我建議由伊來擔任公關組的組長。」胡玉真大聲向眾人推薦。

　　「玉真，我踮佇台北恐驚無方便，尚且我嘛毋是在地人。」詹天良舉手回應。

　　「只要認同阮重建林仔邊的宗旨，攏會當參與工作室的事務，無定著在地人才會使，逐家講對否？」胡玉真口氣堅定。

　　「對啦，對啦。」眾人贊聲。

　　「煞袂曉搬來林仔邊佮阮作伙拍拚。」有人按呢鼓吹。

　　「即馬通訊遮呢利便，天良兄你就莫閣推辭矣。」胡玉真講。

　　「既然逐家無相棄嫌，小弟願意擔任公關組長，請各位多多指教。」詹天良徛起來給逐家行禮。

　　現場噗仔聲一陣響。

　　「玉真，我等咧就欲直接上高速轉去台北，明仔載愛去報社上班。」詹天良載胡玉真轉去，佇怹兜門嘴告別。

　　「天良兄，此去請你保重。毋通袂記，林仔邊有人咧等你。」胡玉真給詹天良的雙手搦牢牢。

　　第二工，詹天良準時到報社上班。

　　伊給這段期間所寫關係林仔邊的新聞揣出來，用限時掛號各寄兩份予胡玉真。

　　欲暗，社長喚助理請伊入去社長室。

　　「天良仔，阮這間細間廟仔無才調服侍你這仙大佛。」詹天良一踏入社長室，社長毋那倒摳正削，閣給伊去林仔邊採訪彼幾張新聞紙撣咧面頭前。「你按呢，我毋知欲按怎給遐的股東交代。」

　　「社長，你有話直接講無要緊。」詹天良心內有數。

　　「你落去林仔邊一禮拜較加，才報這幾條仔新聞，實在講袂得過。」社長的口氣有較軟略，「天良仔，莫講我虧待你，這是這月日的月給，內面有加算半個月予你，請你一禮拜內給空課交接清楚。」社長提一包牛皮紙袋仔抵予詹天良。

　　詹天良無講無譫，越咧行出社長室。

　　雖然，伊知影社長按呢做違反勞基法，毋過，伊的心內已經有按算。

　　一禮拜後，詹天良空課交接好勢。伊佮辦公室內面所有同事握手講再會，不而過，伊無閣踏入社長室一跤步。

　　欲離開報社的時，總機小姐交予伊一箱拄才宅急便送來的物件。唯箱仔外殼看會出來是胡玉真寄予伊的。

　　行落樓跤，外面當咧落西北雨。

　　詹天良無紮雨傘，半行半走闖到巷仔內駛伊彼台二手銅管仔車。

　　轉去稅厝徛，詹天良去浴間仔捎一條毛巾，凊采給頭鬃拭兩下仔。

　　拍開胡玉真寄來的物件，原來是一箱烏珍珠蓮霧。

　　續落來成禮拜，詹天良給台北一寡人情世事處理好勢，順續給伊用袂著的冊裝箱，寄落去林仔邊圖書館當做相送。了後，伊給偆的傢伙攏擠咧車的後座佮後斗，家己一個恬恬仔載落林仔邊。

　　到甲林仔邊，詹天良才敲手機仔通知胡玉真，胡玉真看伊給所有物件攏擠咧銅管仔車，有影予伊驚一趒。

　　「天良兄，你哪會載遮呢濟物件落來？」胡玉真問。

　　「我予社長刣頭，順這個勢搬落來林仔邊佮恁作陣。」

　　「你哪會無事先通知，我通好先替你揣厝？」

　　「想講予妳一個surprise。」

　　「我有影誠surprise！你按呢臨時臨要…，無，你暫且蹛佇工作室，厝我才給你鬥揣。」

　　胡玉真給詹天良鬥搬物件入去工作室，搬好了後，伊講：「天良兄，人給你鬥搬物件真忝呢。你欲按怎補償我？」

　　「只要妳講會出嘴，我攏照品照行。」

　　「咱閣來去小琉球好否？頂回美人洞耍無著。」

　　詹天良載胡玉真去東港碼頭坐交通船。

　　雖然天色漸漸暗，毋過，這回怹無咧趕時間，會當佇小琉球隔暝。

　　船逗逗仔駛起行，海風陣陣吹來，予怹感覺心涼脾肚開。這回，換詹天良開嘴唱歌：

　　　……………………

　　　船若入港兩三工，又擱趕緊欲出港，

　　　阮的愛人無來送，叫阮怎樣來出帆，

　　　行船的人免怨嘆，心情著愛放輕鬆，

　　　等船重入琉球港，約束心愛伊一人。

　　詹天良的歌聲帶淡薄仔滄桑，聽佇胡玉真的耳空內，伊感覺身軀邊這個人有影佮島嶼南方透濫作伙。

　　這日，咱人八月十五，中秋月當圓。

──2012.8.23寫佇赤崁南門仔

      2013.1《台文戰線》第29號