所有的紛紛擾擾，這當今

原在踮人世間紛紛擾擾

先輩對序細的教示，到tann

世傳世猶未得著教示

左派右派攏相thīng佮食爸偎爸食母偎母

一點仔tī代都無，心胸毋通kheh-e̍h

協助文化文化協助鬥爭帝國主義

是讀冊人對弱勢者伸跤出手的一帖藥方

使鬼弄蛇的統治階級kā in假冒偽善的痟鬼仔殼

戴佇總督府的深宮內院

年久月深的聽診器聽會出tāi-jîn心跳加速

市仔尾的醫生館大門開開歡迎大駕光臨

走街仔先khah tsia̍p佇醫生館

佮患者的厝兜出入內外，伊罕得

佇台中州以外的外埔頭四界賴賴趖

Kiám-tshái安呢king体家己

懶尸的雲，khîng實，伊無ài出風頭

夜暝點to̍h臭油燈，佇燈下

Ta̍uh-ta̍uh-á望春風，大筆一撇

撇出做穡人192 tsūa

流離失散的故事詩，用心做犁

犁出覺悟下的犧牲，用目屎譜曲

譜出讚嘆賽德克勇士的南國哀歌

仝款佇油燈跤，伊舉一枝稱仔

Tsham心狂火熱的秦得參

Kiāu無閒tshih-tshah的巡查tāi-jîn鬥鬧熱

用偆無幾枝毛的毛筆搵紅色墨水

沿那讀沿那改無啥鬥貼的白話文

終其尾改出頭kioh-sai-á[1]的普羅小說

踮文藝欄hông óo不止仔大扇的天窗

帝都腹腸開闊，用二賞

補thīnn破空的人道主義

第一醫生、第二賣冰趁錢若趁水

Ài看當事者的人格一斤值偌濟

見若新年頭舊年尾，二撇喙鬚

菩薩心腸的先生人袂輸半線媽祖

救苦救難kā散良人規tsí siàu單

參火ínn作伙燒上天

無因無端踞踮內籬仔操心peh腹

暝日煩惱厝內大細食飽穿燒的事俗事

獄中日記透露外頭債務ná tha̍h ná懸

毋是oh得掩嵌的見笑代

Hānn過二個戰亂tak纏的世紀

社會主義、共產主義、資本主義

毋值得滿腹熱情的人道主義

一直行進前的跤步無停

一直世傳世的跤步無停

先輩對序細的教示

親像馬耳東風繼續佇風裡

轉彎se̍h角

後記：向台灣新文學之父賴和（1894-1943）致敬。

──2008.9.7寫佇赤崁米街

        2009.4《台文戰線》第14號