──逐家來讀陳雷的《鄉史補記》

　　便若關心Siraya語言、文化的朋友，kiám-tshái已經注意著一項關係Siraya的大代誌，佇2008年的冬尾時天。由Edgar L. Macapili（萬益嘉）開七、八冬的時間所編著的《西拉雅詞彙初探》正式出版。Edgar用年久月深的時間走揣Siraya語的根源佮書寫系統，咱的確mā ài用閣khah年久月深的時間，來消化遮1200外頁的資料。

　　歷史tshiâng-tsāi kā咱雕古董。小說家陳雷仝款用年久月深的時間，寫出27萬字的台語長篇小說《鄉史補記》（台南：開朗雜誌出版，2008年6月）。這本「主要beh顛覆台灣漢人中心ê史觀，重建平埔族為中心ê歷史價值觀。」的「大河小說」，會使講是陳雷這個被漢化的Siraya後代，抱著贖罪的心情，全生命投入書寫的民族史詩。

　　十九世紀初，tī 台灣縣善化里西堡大內（tsit-mái 台南縣大內鄉大內）附近有一個漢人設防ê隘口，內面有 Si-la-iah（Siraya）人作隘丁顧蕃界。Tsia ê Si-la-iah 隘丁因為bē堪得漢人隘長虐待，thâi死隘長逃生。有ê向東走入山內，經過茄拔溪來到二社（玉井），又koh 向東liâu過楠梓仙溪，來到阿猴廳羅漢內里門（高雄縣美麗鄉pû á寮）。最後puann過荖濃溪、中央山脈，去到卑南（台東）。另外幾個向西走，tùe灣里溪（曾文溪）來到嘉南平地，tī Si-la-iah 人ê原鄉拍拚khiā起。

　　《鄉史補記》tō是teh寫這幾個Si-la-iah 人家庭kap in ê後代tī這個beh 二百年中間所遇著ê事故。

　　In 忍受著外來人ê壓迫，經過天大地大ê變化，流汗流血流目屎，漸漸thoat 變，最後成作新ê、現代ê、咱tsit-mái ta̍k日看會著ê台灣人。

　　Tsia ê代誌tī咱家鄉ê歷史文獻罕得講過，主要是經過作者四界訪問，ùi 鄉親朋友hia口頭探聽來ê，算做是正史以外另外補充ê資料，kā伊記錄落來，所以暫時叫做《鄉史補記》。

　　頂面所引的這段文字，是陳雷用六冬的時間，費盡心血所完成的《鄉史補記》話頭進前的〈《鄉史補記》是teh寫啥？〉。按遮的文字，咱會當清楚了解，陳雷創作《鄉史補記》的起心動念佇佗位？伊欲透過小說家的筆，重建200外冬來Siraya的族群記智。就準講這個族群，數百冬來被漢人透濫、異化、滅族，in的語言、文化到這當今，強欲消失佇歷史的舞台裡，陳雷嘛欲予in的囝孫清楚知bat，Siraya人佇這塊土地頂懸所行過的跤跡。無論遮的過往，是痛苦抑是甘甜，攏是咱祖先確實存在過的悲歡離合。

　　Siraya這個族群徛起的所在，大体上是佇現此時的台南縣市、高雄縣市佮屏東縣的部份地區。Siraya族的四大社：新港社、目加溜灣社、蕭壠社、麻豆社，攏是佇這陣的台南縣境內。Ùi遮會當看出，台南縣的確是Siraya的大本營。陳雷的先祖，就是蹛佇永過的麻豆社。

《鄉史補記》是ùi平埔si-la-iah人ê角度來展現台灣人ê歷史。這是伊khah特別ê所在。Tùe tsit條歷史ê溪流，看tio̍h平埔si-la-iah人án-tsúann對應外來漢人愈來愈大ê壓迫，án-tsúann漸漸失去in ê名字、語言、文化，最後失去族群ê認同，kiông-beh ùi台灣ê歷史完全消失[1]。

陳雷的《鄉史補記》未曾出版進前，就有鄭雅怡的〈《鄉史補記》去殖民及去漢的歷史詮釋〉、〈十字架、百合及尾ia̍h──《鄉史補記》中tùi受難重頭生ê去殖民精神〉以及李勤岸〈平埔族主体性論述ê重現：以陳雷ê長篇小說《鄉史補記》做例〉等相關的單篇學術論文發表。甚至鄭雅怡的碩士論文《陳雷台語作品ê去殖民精神──用《鄉史補記》做中心》，mā是以《鄉史補記》做為研究對象。Ùi遮咱會當看出《鄉史補記》佇台語文學史上的地位佮它的重要性。

陳瑤玲佇伊的碩士論文裡，根據葉石濤、鍾肇政、楊照等人的講法，認定陳雷的《鄉史補記》有幾落項「大河小說」的特點[2]。李勤岸m̄-nā認同陳瑤玲的看法，甚至將《鄉史補記》號做「長河小說」。李勤岸佇伊論文的結論指出：陳雷的《鄉史補記》顛覆台灣文學主流論述中的中文書寫、漢字書寫、漢人史觀佮漢人男性中心的價值觀，重建一個以Siraya女性意識為中心的平埔族主体意識，將台灣人欲達成建國的去殖民、去漢佮去中國，用小說的形式重建出來。李勤岸進一步表示：

陳雷ê小說寫到《鄉史補記》會使講已經相當成熟，展現出大河小說ê大作家氣勢，成就並無輸同時代ê華語小說家，嘛有可能已經超越ah。可惜，現此時華語控制之下ê台灣文學界猶未對伊注目重視，這對陳雷，對台語文學攏是非常無公平ê，嘛暴露出台灣文學ê研究有伊見識淺薄kap局限ê所在。換另外一個角度來看，台語文學tann已經出現大作家，台灣文學ê研究空間算是非常曠闊lah。

關係李勤岸頂面對陳雷參《鄉史補記》的評價，筆者基本tek採取認同佮肯定的態度。我欲強調的是：佇族群認同的過程中，以台語文學來建構平埔認同，有伊現實上的無奈。總講一句，陳雷透過《鄉史補記》的書寫，重現Siraya族兩百外冬來的遷徙、被漢化、自我認同的過程，佇台語文學經典化的路途頂懸，已經扮演真tsiânn重要的角色。未來，伊的重要性將會一日一日增加。

　　Ùi《鄉史補記》內面所描寫的小說片段，咱會當清楚看出兩百外冬前，咱的先祖Siraya的婦仁人勇敢、有自我意識的一面。換一句二十世紀尾時行的學術用語，就是展現「女性主義」。

　　透過陳雷的台語長篇小說《鄉史補記》，咱佇過往的歷史時空裡，參Siraya美麗相會。向望咱的囝囝孫孫，毋通袂記哩家己身軀頂透濫著Siraya的血。逐家鬥陣來走揣Siraya沈匿兩百冬的屈勢。

──2008.12.11寫佇赤崁米街

     2009.3《海翁台語文教學季刊》第三期